Vatan bayrogʻi

Xilpiraydi Vatan bayrogʻi,
Quyosh taftin oʻzida jamlab.
Koʻz ochadi mehr bulogʻi,
Tashna dilga quvvat bagʻishlab.

Xilpiraydi Vatan bayrogʻi,
Yuzim silar mayin shabada.
Chamanzorning xushboʻy ifori,
Bulbullarni qilar devona.

Sayra qushim, sayragin shadon,
Mugʻanniy ham bastakor oʻzing.
Samolarni qoldirib hayron,
Qanot qoqsin kuylarda sozing.

Yoʻlga chiqdik qoʻllarda bayroq,
Bizni chorlar yulduzlar tamon.
Beruniylar tutgan shamchiroq,
Yana ming yil porlaydi ishon.

Xilpirayver kumush bayrogʻim,
Ona zamin baxtini soʻylab.
Uynab kulsin oʻgʻil qizlarim,
Ona Vatan madhini kuylab.

Odil ShOMURODOV.