DEPUTAT TAShABBUSI BILAN “JAHOLATGA QARShI - MAʼRIFAT” MAVZUSIDA TADBIR OʻTKAZILDI
Oʻtgan asrning 79-89-yillarini hali-hanuz xalqimiz dard-alam bilan eslaydilar. Azobli xotiralar tilga kirganida mashʼum oʻn yilga “qora kunlar”, deya taʼrif berishadi. Chunki aynan shu yillarda qardosh Afgʻoniston zaminida sobiq SSSRning cheklangan harbiy qismlari kontingenti oʻsha paytdagi Afgʻoniston Demokratik Respublikasi (keyinchalik Afgʻoniston islom respublikasi) qurolli kuchlari bilan birgalikda xalqaro terrorchilik toʻdalariga qarshi urush olib borar, Markaziy Osiyo Respublikalari hududidan koʻplab navqiron yigitlar ham oʻzga yurtda jon olib-jon berishardi, Amudaryo tumanidan 13 nafar 18-20 yoshli navqiron yigitlar ana shu Afgʻoniston zaminidagi qaqshatqich janglarda qurbon boʻldilar.
Joriy yilning 15-fevral sanasida Afgʻonistonda sobiq sovet qoʻshinlarining harbiy harakatlari tugatilganiga 34-yil toʻlishi munosabati bilan Amudaryo tumanidagi koʻplab idora va jamoat tashkilotlarida Afgʻon urushi ishtirokchilari bilan uchrashuvlar, maʼnaviy-maʼrifiy tadbirlar boʻlib oʻtdi.
Ana shunday tadbirlardan biri Mangʻit shahridagi 16-sonli Ixtisoslashtirilgan davlat umumtaʼlim maktabida ham oʻtkazildi. “Jaholatga qarshi - maʼrifat” mavzusida oʻtkazilgan mazkur tadbirni xalq deputatlari Amudaryo tuman Kengashi deputati Oybek Begimov tashkillashtirdi va olib bordi.
Uchrashuv tadbirida Afgʻoniston zaminida xalqaro terrorchilik toʻdalariga qarshi kurashda ishtirok etgan Mambatsoliy Abdullayev, Bahodir Jumaniyozov, Ozodboy Xoʻjaniyozovlar tashabbusi bilan tumanning turli hududlarida istiqomat qiluvchi sobiq afgʻonchi faxriy-jangchilar taklif etilib, oʻquvchi-yoshlar bilan dildan muloqot qilish muhiti yaratildi.
Uchrashuv davomida faxriy jangchilar oʻquvchilarga Afgʻoniston zaminida oʻzlari boshlaridan kechirgan qonli voqealar, bemavrid xazon boʻlgan quroldosh doʻstlari haqidagi xotiralaridan soʻzlab berdilar. Ayniqsa, Mambatsoliy Abdullayev va Ozodboy Xoʻjaniyozovlar mamlakatimizda yoshlarning qobiliyat va iqtidorlarini namoyon etishlari uchun barcha sohalarda zarur shart-sharoitlar yaratilganini, bugungi yoshlarning oʻqib-izlanishdan boshqa tashvishlari yoʻqligini, mamlakatimizdagi tinchlik-osoyishtalikning qadriga yetish zarurligini aytishib, tumanimizdan mazkur urushga ketib, bemavrid shahid boʻlgan 13 nafar yigitning nomlarini, ularning qahramonliklarini birma-bir yodga olishdi. Ana shu fidoyi jangchilar xotirasi oldida har birimiz qarzdorlik hissi bilan yashashimiz, ona Vatanga munosib xizmat qilishimiz, tinchligimizni koʻz qorachigʻidek asrash burchimiz ekanligini yoshlarga qayta-qayta taʼkidladilar.
Oʻz navbatida oʻquvchi-yoshlar faxriy jangchilarga oʻzlarini qiziqtirgan savollarni berishdi va dildan, samimiy muloqotda boʻlishdi. Ayniqsa, oʻquvchi-yoshlar faxriy-jangchilarning janggohlardagi xotiralaridan nihoyatda taʼsirlandilar, har qanday vaziyatda ham ona Vatanga sodiqlik tuygʻusi bilan yashash, jaholatga qarshi kuchli maʼrifat bilan javob berishga har lahzada tayyor turish zarurligini qalban his etdilar.
Robiya YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
