“OROL – MENING TAQDIRIMDA” MAVZUSIDAGI INShOLAR TANLOVI YaKUNLANDI

Tumanimizda faoliyat yuritayotgan “Jayxun ilhomlari” nodavlat notijorat tashkiloti tomonidan “Besh tashabbus – besh imkoniyat!” nomli grant loyihasining ish rejasi boʻyicha tumanimizning barcha hududlarida yoshlar bilan uchrashuvlar, badiiy kechalar, tanlovlar, turli tadbirlar oʻtkazilib kelinmoqda. Loyihaning asosiy  maqsadi – yoshlar maʼnaviyatini yuksaltirish, ularning isteʼdodlarini yuzaga chiqarish, yoshlarni turli zararli illatlardan himoya qilishdir.
Shu yilning yanvar oyida “Jayxun ilhomlari” NNT tomonidan “Taraqqiyot koʻzgusi” gazetasi tahririyati bilan hamkorlikda manzilli qoʻllab-quvvatlash daftarlariga kiritilgan yoshlarning adabiyotga qiziqishini oshirish va isteʼdodlarini yuzaga chiqarish maqsadida ular oʻrtasida “Orol – mening taqdirimda” mavzusida insholar tanlovi  eʼlon qilingan edi.

Oʻtkazilgan insholar tanlovi tumanimiz yoshlarining ona tabiat, atrof-muhit, yurtdoshlarimiz salomatligi, Vatan kelajagi uchun fidoyi ekanliklarini yaqqol namoyon etib turibdi. Ular oʻzlari qalamga olgan ushbu mavzuda Orol dengizi tarixi, bugungi ayanchli ahvoli, uning insoniyat koʻz oldida butunlay qurib yoʻq boʻlib borayotganligi, tabiat va hayvonot olamiga salbiy taʼsirlari haqida jon kuydirib, fikr yuritgan.

Tashkilotimizga ushbu mazmunda kelib tushgan insholar badiiy kengash aʼzolari tomonidan koʻrib chiqilib, gʻolib va sovrindorlar aniqlandi. Unga koʻra tumanimizdagi 73-sonli maktabning 10-sinf oʻquvchisi Sohiba Sobirova “Eng yaxshi, tahliliy fikrlari uchun” 1-oʻringa, 69-sonli maktabning 9-sinf oʻquvchisi Sarvinoz Yarashboyeva “Eng yaxshi ezgulik targʻibotchiligi uchun” 2-oʻringa, 36-sonli maktabning 9-sinf oʻquvchisi Javlonbek Oʻrozaliyev “Mavzuga oid eng yorqin fikrlari uchun” 3-oʻringa munosib deb topildilar.

Shuningdek, 73-sonli maktabning 11-sinf oʻquvchisi R.Madrahimova, 10-sinf oʻquvchisi G.Gulimmatova, 11-sinf oʻquvchisi K.Gulimmatova, 10-sinf oʻquvchisi S.Zaripova, 69-sonli 7-sinf oʻquvchisi D.Erkinboyev, 8-sinf oʻquvchisi Z.Bozorboyeva, 9-sinf oʻquvchisi K.Madrahimova, 11-sinf oʻquvchisi D.Rahimboyeva, 24-sonli maktabning 8-sinf oʻquvchisi A.Soliyboyeva, 84-sonli maktabning 11-sinf oʻquvchisi S.Usmonova, 32-sonli maktabning 7-sinf oʻquvchisi Sh.Saʼdullayeva 13-sonli maktabning 10-sinf oʻquvchisi S.Xolboyeva, 83-sonli maktabning 10-sinf oʻquvchisi M.Yoʻldosheva, 39-sonli maktabning 10-sinf oʻquvchisi S.Bozorboyevalar “Eng yaxshi samimiy fikrlari uchun” sovrindorlar safidan joy oldilar.

Gʻolib va sovrindorlarga “Jayxun ilhomlari” NNT tomonidan tayyorlangan sovgʻalar va maqtov yorliqlari topshirildi.

Oʻrozali REYIMOV.