MAKTABIM – FAXRIM

Har bir inson hayotda yashar ekan, sevimli bir kasbning egasi boʻlib, shu kasbi orqali kamol topadi. Men oʻqituvchiman. Kasbimni juda yaxshi koʻraman. Bu kasb insondan fidoyilikni, jonkuyarlikni talab qiladi. Albatta, bunday oʻqituvchi boʻlish uchun esa sizga yaxshi bir jamoa, barcha shart-sharoitlarga ega muassasa kerak boʻladi. Sizni qoʻllab-quvvatlovchi rahbarlar boʻlsa-ku, nur ustiga aʼlo nur…

Men ana shunday faxrlanishga va maqtashga arzigulik namunali ilm dargohlaridan biri boʻlgan 55-sonli maktabda oʻquvchilarga taʼlim beraman.

Ushbu maktab 2008-yilda ishga tushirilgan. Maktab direktorining talabi va oʻquvchilar kontingentining koʻpligi bois, maktab kengaytirilib, 2022-yilda 330-oʻrinli qoʻshimcha bino qurib berildi. Endilikda, maktab quvvati 960 oʻquvchi oʻrniga yetdi. Maktabda barcha fanlar boʻyicha oʻquv-mashgʻulot xonalari, sport zali, oshxona, kutubxona va tantanalar zali mavjud.

2021-2022 oʻquv yilida 83 nafar oʻquvchi 11-sinfni bitirgan boʻlsa, shundan 26 nafari oliy taʼlim muassasasiga, 8 nafari texnikum va kollejlarga qabul qilindi.

Hozirgi kunda maktabimizda 1012 nafar oʻquvchi taʼlim-tarbiya olmoqda. Bu oʻquvchilarga 80 nafardan ortiq oliy maʼlumotli oʻqituvchilar dars berishadi. Oʻqituvchilarning 9 nafari oliy, 24 nafari birinchi va 29 nafari ikkinchi toifaga ega.

Prezidentimizning 2023-yilga “Insonga eʼtibor va sifatli taʼlim yili" deya nom berishi biz oʻqituvchilarga kuch-quvvat, shijoat bagʻishladi. Demak, endilikda taʼlimga boʻlgan eʼtibor yanada yuqori pogʻonaga koʻtariladi. Shunday ekan, biz oʻqituvchilar oʻz fanimizning mohir bilimdoni boʻlib, kelajak avlodni har tomonlama barkamol qilib tarbiyalamogʻimiz zarur. Buning uchun esa oʻz ustimizda tinimsiz izlanishdan toʻxtamasligimiz kerak.

Men talabchan rahbar va har bir ishda yakdil boʻlgan jamoa bilan birga ishlayotganimdan faxrlanaman. Chunki talabchanlik bor joyda tartib-intizom, tartib-intizom bor joyda muvaffaqiyat, birdamlik bor joyda yuksalish boʻladi.

Shahlo Rahimboyeva,

55-sonli maktab oʻqituvchisi.