FERMER XOʻJALIKLARINING 1500 GEKTAR MAYDONIGA KARTOShKA EKILADI

Kartoshkani xalqimiz bejizga ikkinchi non, deb atamaydi. Chunki kartoshka ham asosiy oziq-ovqat mahsulotimizdan biri, toʻyimli, shifobaxsh boʻlganligi uchun ham muhim ijtimoiy ahamiyatga ega. Bozorlarda kartoshkaning arzon, toʻkin va sifatli boʻlishini taʼminlash – xalqimizning rizq-nasibasi moʻl boʻlishini taʼminlash demakdir.

2020-yil 6-mayda qabul qilgan Oʻzbekiston Respublikasi Prezidentining “Respublikada kartoshka yetishtirishni kengaytirish va urugʻchiligini yanada rivojlantirish chora-tadbirlari toʻgʻrisida”gi qarorida kartoshka yetishtirishni koʻpaytirish, isteʼmol va urugʻlik kartoshkaga boʻlgan ichki bozor talabini qondirish, zamonaviy kartoshka plantatsiyalarini barpo etish, isteʼmol va urugʻlik kartoshkani saqlash, saralash, yetkazib berish va qayta ishlashni yoʻlga qoʻyish, sohaga ilgʻor innovatsion texnologiyalarni joriy etish belgilangan edi.

Qarorda shuningdek, kartoshka yetishtirishda klasterlar, kooperativlar tashkil etish, ekinni yirik-yirik kartalarga yaxlit ekish boʻycha topshiriqlar berilgan edi.

Amudaryo tumanida ham kartoshka yetishtirishga ulkan eʼtibor qaratilmoqda. Xalqimizning asosiy oziq-ovqat mahsuloti – kartoshkachilik borasida tumanimiz dehqonlarining ham oʻziga xos tajriba va mahorati shakllanganki, shu tufayli bozorlarimiz toʻkin, narxi hamyonbop.

Quvonarlisi, endilikda isteʼmol uchun ham, urugʻlik uchun ham kartoshka yetishtirish hajmi ortadi. Endilikda bu boradagi ishlar klaster usulida tashkil etiladi.

Xolimbeg ovulidagi “Zafarbek Shermetov” fermer xoʻjaligida urugʻlik kartoshkani sifatli ekishga bagʻishlangan koʻrgazmali seminar boʻlib oʻtdi.

Koʻrgazmali seminarda tuman hokimi Sultonboy Yoʻldashev, Qoraqalpogʻiston Respublikasi Vazirlar Kengashi Raisi oʻrinbosari Daryabay Qaypov, sektorlar rahbarlari, qishloq xoʻjaligi masʼullari, fermerlar, tomorqa yer egalari ishtirok etdilar.

Tadbirda isteʼmol va urugʻlik kartoshka navlarini sifatli ekish va moʻl hosil yetishtirish borasida fikr almashildi hamda bu boradagi kelgusi rejalar belgilab olindi.

Seminarda joriy yilda tuman boʻyicha qishloq xoʻjaligi korxonalarining 236 gektar, aholi tomorqalarining 1200 gektar yer maydonlariga ertagi kartoshka ekilib, parvarish qilinayotganligi taʼkidlandi. Endilikda kartoshkachilik klasteri tashkil etilishi munosabati bilan yuqori avlodli urugʻlik kartoshka yetishtirish uchun hududlarning tuproq-iqlim sharoitiga mos keladigan, suv bilan taʼminlangan 1500 gektar maydonlari tanlab olindi. Jumladan, Toʻlqin ovuli hududidan 700 gektar, Xolimbeg ovuli hududidan 800 gektar paxta maydonlarini qisqartirish hisobiga mazkur dalalarga kartoshka ekiladi. Bunda hudud aholisining kartoshka yetishtirishga boʻlgan qiziqishi, bu boradagi tajribasi ham inobatga olinganligi tushuntirib oʻtildi.

Shu kungacha Rossiyadan “Gala” navli R1 avlodga mansub kartoshka urugʻi olib kelinib, Xolimbeg ovulidagi 20 gektar maydonga, Toʻlqin ovuli hududidagi 20 gektar maydonga ekildi va moʻl hosil yetishtirish choralari koʻrilmoqda.

Oygul RAJABOVA.