«GSM Repitor» qurilmalaridan qonunga xilof ravishda foydalanmang

Mobil aloqa xizmatisiz kundalik turmushimizni koʻz oldimizga keltirishimiz qiyin boʻlib bormoqda. Ularning sifatli ishlashi operatorlarning asosiy maqsadi boʻlib hisoblanadi.

Lekin bugungi kunda mobil aloqa xizmatlarining sifatsiz ishlashi boʻyicha koʻplab murojaatlar kelib tushmoqda. Ushbu murojaatlar oʻrganilib, sabablari aniqlashtirilganda fuqarolar tomonidan oʻzlari bilib-bilmagan holda mobil aloqa signallariga halaqit beruvchi qurilmalardan foydalanish holatlari aniqlanmoqda. Bunday qurilmalar xalq tilida «GSM repitor»lar deb ataladi. Bu – mobil aloqa signallari past boʻlgan joylarda operator signallarini kuchaytirib beruvchi qurilma boʻlib hisoblanadi. Bu qurilmalardan odatda binolar ichida (ofislar, uylar, podvallar) signal darajasi past boʻlgan joylarda foydalanish holatlari koʻp uchramoqda.

«GSM repitor» qurilmalaridan foydalanganda radiochastota spektorida ishlovchi mobil aloqa stantsiyalarining ishlashiga oʻz taʼsirini koʻrsatadi. Buning natijasida «GSM repitor» oʻrnatilgan hududda ushbu qurilmadan foydalanuvchidan tashqari, boshqa abonentlar ham mobil aloqa xizmatidan foydalanishida cheklovlarga olib keladi.

Yuqoridagi holatlarni bartaraf etish maqsadida Radiochastotalar boʻyicha Respublika Kengashining 2022-yil 23-avgustdagi «Oʻzbekiston Respublikasi hududida mobil aloqa signallarini kuchaytirib beruvchi retranslyator qurilmalaridan foydalanish tugʻrisida»gi tegishli Qarori qabul qilingan.

Ushbu Qarorga asosan, Oʻzbekiston Respublikasi hududida ishlab chiqarilgan, modernizatsiya qilingan, chet ellardan olib kiriladigan retranslyator qurilmalari Respublikada belgilangan tartibda elektro-magnit moslashuv normalariga va texnik talablarga muvofiqliligi boʻyicha sertifikatga ega boʻlishi shartligi belgilangan.

Yuqoridagi Qaror talablarining bajarilishini hamda mobil aloqa xizmatlarining sifatli koʻrsatilishini taʼminlash maqsadida Oʻzkomnazorat inspektsiyasi Qoraqalpogʻiston Respublikasi hududiy boʻlimi hamda Qoraqalpogʻiston Respublikasi Elektromagnit moslashuv xizmati mutaxassislari tomonidan mobil aloqa xizmatlari sifati boʻyicha kelib tushgan murojaatlar asosida rejali monitoring ishlari olib borilmoqda.

Jismoniy va yuridik shaxslar tomonidan Qonunda belgilanmagan radio qurilmalaridan tegishli tartibda ogohlantirish xatlari berilgandan keyin qayta foydalanish holatlari aniqlansa, bu radio qurilmalar tegishli tartibda olib qoʻyilib, ushbu shaxslarga nisbatan Oʻzbekiston Respublikasi Maʼmuriy javobgarlik toʻgʻrisidagi Kodeksining 152-moddasiga asosan maʼmuriy jazo choralari koʻrilishiga sabab boʻladi.

J.Dauletova, Oʻzkomnazorat QR hududiy boʻlimi,

Mobil aloqa tarmoqlarini nazorat qilish boʻlimi yetakchi mutaxassisi.