OʻQITUVChILAR OILASINING MUNOSIB VORISI

Dunyo tarixiga nazar solsangiz, eng rivojlangan davlatlar taraqqiyotiga taʼlim-tarbiya tizimiga yuksak eʼtibor qaratilgani sabab boʻlganini koʻramiz.

Ha, yurt osoyishtaligi, avlodlar barkamolligi ustoz-muallimlarning mahoratiga, taʼlim- tarbiyasi samarasiga bogʻliq. Zero murgʻak qalblarga ezgulik urugʻini sochadigan, oilasiga, doʻstlariga, ona yurtiga muhabbat hissini tarbiyalaydigan, ilmga havas uygʻotadigan tabarruk insonlar oʻqituvchilar.

Amudaryo tumanidagi 16-sonli maktabning maʼnaviy-maʼrifiy ishlar boʻyicha direktor oʻrinbosari Rahimajon Safarboyeva ana shunday moʻʼtabar kasbni tanlab, shu tufayli sharaf topayotganlarning biri.

Uning muallimlik kasbini tanlagani bejiz emas. Chunki u oʻqituvchilar oilasida dunyoga kelib, yosh avlodga mehr-muhabbatni, ularni ilm-maʼrifatli qilish yoʻlidagi fidoyilikni ota-onasidan oʻrgandi, otasi Sobir aka Safarboyev, elning eʼzozli nuroniy onaxonlaridan biriga aylangan Gulora Eshimbetovalar bir umr 16-sonli maktabda oʻqituvchilik qilishdi. Ulardan ibrat olgan farzandlar ham zaxmatlaridan choʻchimay, ustozlik yoʻlini tanlashdi, Rahimajondan tashqari akasi Azimboy, singillari Dilfuza, Dilshodalar ham bugungi kunda mahoratli va taniqli ustozlar boʻlib yetishdilar.

Rahimajon Safarboyeva 1991-yilda Nizomiy nomidagi Toshkent davlat pedagogika instituti (hozirgi shu nomdagi Universitet)ni matematika-informatika oʻqituvchisi ixtisosligi boʻyicha tamomlab, 36-sonli maktabda ilk oʻqituvchilik faoliyatini boshladi. 1994-yildan 2016-yilgacha 16-sonli maktabda oʻquvchilarga matematika-informatikadan dars berdi. 2016-yildan beri esa shu maktabda maʼnaviy-maʼrifiy ishlar boʻyicha direktor oʻrinbosari vazifasini aʼlo darajada uddalab kelayotir. U maktab oʻqituvchilar jamoasida sogʻlom maʼnaviy muhit yaratib, ularning faoliyati samarali boʻlishiga intiladi.

Maktab – muqaddas dargoh, u yerda kelajagimiz egalari kamolga yetadi. Ularni yuksak iqtidorli, salohiyatli qilib voyaga yetkazishda oʻqituvchilar, ayniqsa, maʼnaviyat va maʼrifat ishlari boʻyicha direktor oʻrinbosari saʼy-harakatlari ham juda muhim. Buni chuqur his etgan Rahimajon oʻquvchilar bilan turli maʼnaviy-maʼrifiy tadbirlar, tanlovlar, davra suhbatlari oʻtkazadi, “Besh muhim tashabbus” doirasidagi va fan toʻgaraklari faoliyatini nazorat qiladi, oʻquvchilar orasidagi intellektual salohiyatli va iqtidorlilari bilan oʻqituvchilarning alohida ham shugʻullanishiga sharoit yaratadi. Natijada erishilayotgan natijalar biri-biridan quvonarli.

Bu borada gap ketganida maktab oʻqituvchilar jamoasi haqida aytib oʻtish oʻrinli. Maktabning 17 nafar oʻqituvchilari turli toifadagi milliy, xalqaro sertifikatlar sohibi, koʻpchiligi oliy toifali.

Ular taʼlim-tarbiya bergan, 2021-2022 oʻquv yilida maktabni tugatgan 75 nafar bitiruvchilarning 25 foizi turli oliygohlar talabalari boʻlishdi. Joriy yilda 93 nafar bitiruvchilarning oliygohga kirish test sinovlarida imtiyoz beruvchi milliy, xalqaro sertifikatlarni himoya qilib olganlari bor. Bu yilgi bitiruvchilarning oliygohlarga kirish koʻrsatkichlari oshishi kutilmoqda.

Buningdek yutuqlarda maʼnaviyat fidoyisi Rahimajon Safarboyevaning ham munosib hissalari bor.

Biz uning kelgusi ishlariga ham muvaffaqiyatlar tilab qolamiz.

Oygul RAJABOVA.