«Taraqqiyot koʻzgusi» gazetasi maxsus muxbiri Oygul Rajabova «Mehnat faxriysi» koʻkrak nishoni bilan taqdirlandi

Oʻzbekiston faxriylarining ijtimoiy faoliyatini qoʻllab-quvvatlash «Nuroniy» jamgʻarmasi Vasiylik kengashining 2023-yil 27-maydagi «Mehnat faxriysi» koʻkrak nishoni bilan taqdirlash toʻgʻrisida”gi qaroriga muvofiq, mamlakatimizning iqtisodiyot, ishlab chiqarish, ilm-­fan, madaniyat, taʼlim, sogʻliqni saqlash, yurisprudentsiya va boshqa sohalarida koʻp yillar davomida halol va samarali mehnat qilgan pensiya yoshidagi bir guruh yurtdoshlarimiz «Mehnat faxriysi» koʻkrak nishoni bilan mukofotlandi.

Mukofotlanganlar qatorida uzoq yillardan beri tumanimiz matbuotiga oʻz hissasini qoʻshib kelayotgan tajribali jurnalist Oygul Rajabova ham bor.

U ilk jurnalistik faoliyatini 1985-yilda «Amudaryo haqiqati» (hozirgi «Taraqqiyot koʻzgusi») gazetasi tahririyatida qishloq xoʻjalik boʻlimi muxbiri lavozimida ishlashdan boshlagan. Koʻp yillar davomida mazkur gazetaning boʻlim mudiri, masʼul kotibi vazifalarida samarali mehnat qilib, tumanimiz ijtimoiy-iqtisodiy hayotida, yurtdoshlarimiz turmushida roʻy berayotgan yangiliklarni faol yoritib keldi.

Ijodiy faoliyati davomida “Mashaqqatlarda toblangan umr” ocherki, “Tushlarimga kirib turing” esse janridagi ijod namunalarini kitobxonlar eʼtiboriga taqdim etdi. Mohir tarjimon sifatida qoraqalpoq shoir va yozuvchilarining asarlarini oʻzbek tiliga oʻgirib, millatlar va adabiyotlar doʻstligining mustahkamlanishiga hissa qoʻshdi.

Fidoyi jurnalistning mehnatlari davlatimiz tomonidan eʼtirof etilib, turli yillarda Qoraqalpogʻiston Respublikasi Joʻqorgʻi Kengesining, Oʻzbekiston Jurnalistlari ijodiy Uyushmasining Faxriy yorliqlari, «Oʻzbekiston Respublikasi mustaqilligiga 20-yil» koʻkrak nishonlari bilan taqdirlangan.

Tahririyatlarimiz nomidan Oygul Rajabovaning II Darajali «Mehnat faxriysi» koʻkrak nishoniga sazovor boʻlgani bilan tabriklab, uning kelgusidagi ijodiy ishlariga zafarlar tilaymiz!

"Taraqqiyot koʻzgusi" gazetasi va Amudaryo televideniyesi tahririyatlari.