XALQQA YaQINLAShAYoTGAN TIBBIYoT: BU ODAMLAR HAYoTI VA UMR MAZMUNINI QANDAY OʻZGARTIRMOQDA?

Sogʻliqni saqlash tizimining barcha darajasida tibbiy xizmat koʻsatish koʻlamini kengaytirish va sifatini oshirish, aholining tibbiy xizmatlardan foydalanish qulayligini taʼminlash, jumladan, zamonaviy, yuqori texnologik ixtisoslashtirilgan tibbiy xizmatlarni aholiga yanada yaqinlashtirish, bunday xizmatlar sifatini oshirish, undan barcha aholining teng foydalanishini taʼminlash, kasalliklarning oldini olish, barvaqt aniqlash va davolashni yaxshilashga yoʻnaltirilgan aniq chora-tadbirlar amalga oshirilmoqda. Natijada ixtisoslashtirilgan tibbiyot markazlari soni oxirgi 7-yilda 10 tadan 24 taga yetdi.

Ilgari bunday markazlar faqat poytaxtda joylashgan boʻlsa, bugunga kelib hududlarda ularning 270ta filiali, tumanlarda 300dan ziyod boʻlimlari tashkil etildi. Markazlar amaliyotiga 106 turdagi, viloyat darajasida 202 turdagi, tuman darajasida 85 turdagi yangi diagnostika va jarrohlik usullari tadbiq qilingan. Bunday saʼy-harakatlar orqali hududlardagi yuqori texnologik operatsiyalar ulushi 23 foizdan 55 foizgacha yetkazildi.

Yurtimizda inson aʼzolari transplantatsiyasi amaliyoti joriy etilib, bunday operatsiyalar ayrim hududlarda ham oʻtkazilayapti.  Bugungi kunda bemorlar poytaxtga emas, aksincha, markazlarning professor, mutaxassislari joylarga chiqqan holda bemorlarga yordam koʻrsatadigan, hududlardagi mutaxassislarga mahorat darslarini oʻtadigan tizim yaratildi.

Ixtisoslashtirilgan tibbiy xizmatlardan biri – kardiologiya yoʻnalishi isloh qilinishi yurak-qon tomir xastaliklari tufayli yuz berishi mumkin boʻlgan noxush vaziyatlarning oldini olishga katta imkon bermoqda.  Respublika ixtisoslashtirilgan kardiologiya ilmiy-amaliy tibbiyot markazi davlat muassasasiga aylantirilib, tibbiy xizmatlar koʻrsatishning kardiologiya yoʻnalishi boʻyicha mamlakatning bosh muassasasi etib belgilandi, barcha hududlarda ushbu markazning filiallari tashkil etildi.

Yana bir hayotiy misol. 7-8-yil avval respublika boʻyicha 3ta ixtisolashtirilgan tibbiyot markazida hamda Xorazm va Namangan viloyatlarida angiograf uskunasi boʻlgan. Hozirgi kunda angiograf oʻrnatilgan tibbiyot muassasalari soni 40tadan oshgan. Joriy yilda Respublika ixtisoslashtirilgan kardiologiya ilmiy-amaliy tibbiyot markazining Buxoro va Fargʻona filiallarida interventsion kardiologiya binosi ishga tushirilib, ularda ham angiograf uskunasi oʻrnatildi. 

Mamlakatimizda ochiq usuldagi kardiojarrohlik amaliyotlari oʻtkazilishi ham yoʻlga qoʻyildi.

Ixtisoslashtirilgan markazlar faoliyatida yana bir muhim yangilik shundaki, tibbiy sugʻurta mexanizmlari joriy etilgani, kafolatlangan tibbiy xizmat doirasida yuqori texnologik amaliyotlarni ham davlat byudjeti mablagʻlari hisobidan oʻtkazish imkonini bermoqda. Xususan, bu tizim ixtisoslashtirilgan markazlarga joriy qilinganidan buyon oʻtgan 1,5-yil davomida 850dan ziyod bemorlarda yuqori texnologik, interventsion, aritmologik va kardiojarrohlik amaliyotlari bepul oʻtkazilgan.

Xulosa oʻrnida aytish mumkinki, sohada amalga oshirilayotgan islohotlar natijasida bemorlarda yuqori sifatli tibbiy xizmatdan foydalanish imkoniyati yanada kengaydi. Bu esa xalqimizning yashash sifatini yaxshilashga, oʻrtacha umr koʻrish davomiyligini uzaytirishga xizmat qilaveradi.

Zumrad Bekatova,

Oliy Majlis Qonunchilik palatasi deputati,

Oʻz MTDP fraktsiyasi aʼzosi.