Xotiralar uygʻonganda...

HAYoTDA ERIShGAN YuTUQLARIM – OTA-ONAM TARBIYaSI TUFAYLI

Inson keksaygani sari bosib oʻtgan yoʻliga nazar tashlab, umr daftarini varaqlayverarkan, oʻz-oʻzini  sarhisob qilarkan. Shunday damlarda  hayotingning  nurafshon boʻlishini taʼminlagan, ulgʻaytirib oyoqqa turgʻizgan insonlar – ota-onang koʻz oʻngingda jonlanadi.

Men hozir 83 yoshdan oshdim. 36-yildan beri maishiy xizmat koʻrsatish sohasida ishlayman. Avval ekskavatorchi boʻlib, qurilish tashkilotlarida ishladim. Ayni kunda ham  “Mangʻit” masʼuliyati cheklangan jamiyatining ijrochi direktoriman. Korxonamizning muvaffaqiyatli faoliyat yuritayotgani bois necha oʻnlab xodimlarimiz oʻz vaqtida oylik olib, doimiy daromadga ega boʻlishayapti.

Oʻtgan umrimga nazar tashlar ekanman, erishgan barcha muvaffaqiyatlarim ota-onamning toʻgʻri tarbiya berib, hayotda intilib yashashga oʻrgatganlari natijasi, deb bilaman.

Otam Ahmad Jumaniyozov 1907-yilda  tumanimizning Xitoy ovulida tugʻilgan. Maktabda oʻqib, keyinchalik 1937-yilda Toʻrtkoʻl shahridagi kadrlar tayyorlash bir yillik kursini tamomlagan. 1938-1939-yillarda qishlogʻimizdagi  boshlangʻich maktabda oʻqituvchilik  qilgan. 1940-yilda sobiq Qipchoq  tumaniga qarashli Oxunboboyev nomli kolxozda chorvachilik fermasi mudiri, keyinchalik chorvachilik boʻyicha rais oʻrinbosari  boʻlib ishlagan. Xoʻjalikka zarur kadr sifatida Ikkinchi jahon urushidan bron bilan qoldirilgan. Onam bir umr  fermada sogʻuvchilik qildilar.

Otam odamshavanda, borini el bilan baham koʻradigan, tadbirkor odam edi. Fermada ishlaydigan odamlarning tashvishini xuddi oʻzinikiday qabul qilar, imkoni boricha yordam berar edi. Bolaligimni eslasam, doim otamning doʻstlari, qoʻni-qoʻshnilar bilan gavjum boʻladigan hovlimiz koʻz oldimga keladi. Shunday damlarda otam soz chaladigan, ashula aytadigan tanishlarini ham  chorlar, uyimizda tonggacha soz-u suhbatlar davom etardi. Otam ayniqsa, mumtoz ashulalarni  juda sevar, sanʼatkor doʻstlari  koʻp boʻlar edi. Rahmatlik mashhur hofiz Nazir Rahimovning ijrosiga  tan berar, uyimizga tez-tez chorlab turar edi. Nazir Rahimovning har bir tashrifidan uyimiz nurga toʻlib ketar, qarindoshlarimiz, qoʻni-qoʻshnilar qilt etmasdan u kishining qoʻshiqlari ohangiga sehrlanib oʻtirishar edi.

Otam, onam men yolgʻiz farzand boʻlsam har ortiqcha erkalatmasdan foydali mehnatga  jalb etishgan, oʻqib, ilmli boʻlishimga gʻamxoʻrlik qilishgan.

Endi oʻylab qarasam, ular mening hayotda oʻz oʻrnimni topib, elga  xizmat qiladigan odam boʻlishimga harakat qilishgan ekan. Men ularning orzularini roʻyobga chiqarganimdan, 80 yoshdan oshgan vaqtimda ham elimga xizmat qilayotganimdan quvonaman, ota-onamni doim joylari jannatda boʻlgay, deb duo qilaman.

Ha, azizlar, hayotda kim, qanday yashashi ota-ona tarbiyasiga bogʻliq. Shunday ekan, farzandlari oldidagi burchini hech kim unutmasligi lozim.

Tursunboy AHMEDOV, “Mangʻit” MChJ ijrochi direktori, Qoraqalpogʻistonda xizmat koʻrsatgan savdo va maishiy xizmat xodimi.