BOGʻ-QATOR ORALARIGA DUGA USULIDA TOʻQSONBOSTI EKINLAR VA KOʻKATLAR EKISh BOʻYIChA SEMINAR BOʻLIB OʻTDI

Amudaryo tumanida kuzgi ekin ekish ishlarini yanada samarali oʻtkazish, bogʻ-qator oralariga duga usulida toʻqsonbosti va koʻkatlar ekish boʻyicha seminarlar oʻtkazilib kelinmoqda. Seminarlarda mutaxassislar, tajribali dehqonlar tomonidan ekinlarni ekish va parvarishlash boʻyicha tegishli tavsiyalar, maslahatlar berilib, tajribalar almashilmoqda. Shu oʻrinda aytish joizki, Amudaryo tumanida 2024-yil hosili uchun bogʻ-qator oralariga 789 gektar yer maydoniga toʻqsonbosti usulida piyoz, sarimsoqpiyoz hamda koʻkatlar ekish boʻyicha ishlar olib borilmoqda. Shu paytga qadar 126 gektar yer maydoniga toʻqsonbosti ekinlari ekilgan.

30-oktyabr kuni Qangli ovuli hududidagi “Bahodir Hamdam” agrofirmasi dalasida boʻlib oʻtgan ana shunday seminarda tuman hokimi oʻrinbosari Anvar Yoʻldoshev, tuman Fermer, dehqon xoʻjaliklari va tomorqa yer egalari Kengashi raisi Ilhom Polvonovlar ishtirok etishdi. Seminarda “Bahodir Hamdam” agrofirmasiga qarashli dalada 0,3 gektar yer maydoniga toʻqsonbosti usulida bogʻ-qator oralariga piyoz, sarimsoqpiyoz hamda koʻkatlar ekish rejalashtirilgani, ushbu ekinlarni ekish texnikasi, unib chiqqanidan keyin agrotexnik tadbirlarni oʻz vaqtida bajarish lozimligi toʻgʻrisida soʻz yuritilib, taklif va maslahatlar berildi. Shundan soʻng, ajratilgan maydondan yer tayyorlandi va piyoz urugʻlari sepildi.

Qipchoq muqobil mashina traktor parkiga qarashli bogʻda davom ettirilgan seminarda tuman hokimi Sobir Xoʻjametov, tuman hokimi oʻrinbosari Anvar Yoʻldoshev, tuman Fermer, dehqon xoʻjaliklari va tomorqa yer egalari Kengashi raisi Ilhom Polvonovlar qatnashishdi. Masʼullar ushbu bogʻda toʻqsonbosti usulida bogʻ-qator oralariga piyoz, sarimsoqpiyoz hamda koʻkatlar ekish rejalashtirilgan 0,8 gektar yer maydonini koʻzdan kechirishdi. Seminar davomida yetishtirilgan sabzavotlarni ekishdan to pishib yetilgunigacha boʻlgan jarayon haqida soʻz yuritildi. Shuningdek, tuproq-iqlim sharoitini inobatga olgan holda ochiq maydonlarga va bogʻ-tok qator oralariga toʻqsonbosti usulida sabzavot ekinlarini navlar boʻyicha ekish va parvarishlash borasida tajriba almashilib, koʻrsatmalar berildi.

Seminar Toʻlqin ovuli hududidagi “Ahmedov Rajapboy” fermer xoʻjaligi bogʻida davom ettirildi. “Ahmedov Rajabboy” fermer xoʻjaligi tomonidan rejaga koʻra 1,8 gektar yer maydoniga toʻqsonbosti usulida bogʻ-qator oralariga piyoz, sarimsoqpiyoz hamda koʻkatlar ekilgan. Ayni kunlarda unib chiqa boshlagan ushbu ekinlarni parvarishlash ishlari amalga oshirilmoqda. Seminarga tashrif buyurgan masʼullar yurtimiz aholisini ertaki sabzavot mahsulotlariga boʻlgan talabini toʻliq qondirish maqsadida hosildan boʻshagan maydonlarga sovuqqa chidamli ekinlardan shu kunlarda piyoz, sarimsoqpiyoz, noyabr-dekabr oylarida esa toʻqsonbosti ekinlaridan sabzi, osh lavlagi, koʻkatlardan – kashnich, petrushka, salat, rediska va karam ekib yetishtirish yaxshi foyda keltirishini taʼkidlashdi.

Shundan soʻng, seminar ishtirokchilari Choykoʻl ovuli hudududagi “Mangit omad savdo” masʼuliyati cheklangan jamiyatiga qarashli uzumchilik xoʻjaligi bogʻida amalga oshirilayotgan kuzgi ishlar bilan tanishishdi. Ushbu bogʻda 2,8 gektar yer maydoniga toʻqsonbosti usulida bogʻ-qator oralariga piyoz, sarimsoqpiyoz hamda koʻkatlar ekish rejalashtirilgan. Seminar davomida tajribali dehqonlarning yoʻl-yoʻriqlari tinglanib, oʻzaro tajriba almashildi, qishloq xoʻjaligi sohasi mutaxassislari tomonidan zarur tavsiyalar berildi.

Tumanda kuzgi ekin ekish ishlarini yanada samarali oʻtkazish, bogʻ-qator oralariga duga usulida toʻqsonbosti va koʻkatlar ekish boʻyicha tashkil etilgan seminar boshqa hududlarda ham davom etdi va kelgusi yil hosili uchun bogʻ-qator oralarni shudgorlash, hudud iqlim sharoitiga koʻra ekinlarni oqilona joylashtirish, toʻqsonbosti ekinlarini ekish borasidagi masalalar muhokama etildi.

Ozoda Xudoyberganova.