SPORTChILAR OILASI

Sportni salomatlik kaliti, deyishadi. Shu sababdan ham unga oshno boʻlgan insonlar doimo harakatda boʻlishga, mashaqqatli boʻlsayam sportning mashqlarini doimo bajarishga intiladilar.

Shunday insonlarning biri, hamyurtimiz Allayor Yoʻldoshev kichkinaligidanoq sportga havas qoʻydi. Sport bilan betinim shugʻullanishi natijasida u oʻquvchilik davrlaridayoq koʻpgina musobaqalarda ishtirok etardi. Musobaqalarning hammasida emas, ayrimlaridagina erishgan gʻalaba Allayorning shu sohaga boʻlgan qiziqishini tobora oshirib borardi.

Sportga boʻlgan qiziqish, oʻz maqsadi sari intilish Allayorning Oʻzbekiston Davlat jismoniy tarbiya institutiga oʻqishga kirishiga sababchi boʻldi. Oliygohni muvaffaqiyatli tugatgan Allayor oʻqituvchi sifatida dastlabki ish faoliyatini 1978 yilda oʻrta maktabda jismoniy tarbiya oʻqituvchisi boʻlib ishlashdan boshladi. U maktabda jismoniy tarbiya muallimi boʻlib ishlagan paytida oʻquvchilarning jismoniy tarbiya va sportga boʻlgan qiziqishlarini oshirishga harakat qildi.

Keyinchalik, 40-sonli hunar-texnika bilim yurtida oʻquv ishlari boʻyicha direktor oʻrinbosari, 1-sonli Bolalar va oʻsmirlar sport maktabi murabbiyi, uslubchi mutaxassis, shu sport maktabi direktori lavozimlarida faoliyat yuritganida ham yosh avlodning jismonan va aqlan sogʻlom boʻlib voyaga yetishlariga doimo eʼtibor berib keldi.

A.Yoʻldoshev 2012-yildan buyon 1-sonli Bolalar va oʻsmirlar sport maktabida murabbiy vazifasida faoliyat koʻrsatmoqda. U turmush oʻrtogʻi Darmon Jumamurodova bilan birgalikda 3 nafar oʻgʻilni yaʼni, 3 nafar sportchini voyaga yetkazishdi. Allayorning rafiqasi Darmon Jumamurodova Amudaryo agrobiznes kasb-hunar kollejida oʻqituvchilik qiladi. Shu bilan birga u kollej xotin-qizlar qoʻmitasining raisi, kollejda ayollar oʻrtasida voleybol boʻyicha oʻtkazilgan musobaqalarning bir necha bor gʻolibi hisoblanadi.

Oilaning katta farzandi Behzod Yoʻldoshev 2012-yilda Nukus Davlat pedagogika institutining jismoniy tarbiya fakultetiga oʻqishga kirdi. U oʻtgan yili Samarqand shahrida voleybol boʻyicha oʻzbekistonlik talabalar oʻrtasida oʻtkazilgan musobaqalarda faxrli 2-oʻrinni va Toʻrtkoʻl shahrida voleybol boʻyicha oʻtkazilgan musobaqada 1-oʻrinni egallashga muvaffaq boʻldi. Ayni kunda Behzodga tajribali murabbiy Allayor Kazakov ustozlik qilmoqda. Oʻrtancha farzand Bunyod Yoʻldoshev oʻrta maxsus maʼlumotga ega boʻlgan sportchi. U Amudaryo agrobiznes kasb-hunar kollejini jismoniy tarbiya yoʻnalishi boʻyicha tugatgan. Bunyod hozirgi kunda ham tumanimizda oʻtkazilayotgan sport musobaqalarining koʻpchiligida ishtirok etib, yaxshi natijalarga erishib kelmoqda.

– Kenja oʻgʻlingiz Jahongir ham sportga qiziqadimi? – deya savol berganimda Allayor Yoʻldoshev mening qoʻlimga "Jismoniy tarbiya va sport” jurnalini tutqazdi-da:

– Haqiqiy sportchi kenja oʻgʻlimiz Jahongir boʻladi-yov chamamda, – dedi.

Jurnalni varaqlab, uning qoʻsh sahifasida eʼlon qilingan Nukus shahrida boʻlib oʻtgan futbol boʻyicha XVI Respublika musobaqalarining hududiy saralash bosqichi ishtirokchilari – Qoraqalpogʻiston futbol jamoasining kattakon suratini, ular orasida Jahongir ham borligini koʻrib ham hayratlandim, ham quvondim.

Allayorning aytganicha bor ekan, Jahongir haqidagi maʼlumotlarni koʻzdan kechirib, haqiqatan ham unda sportga boʻlgan havas va ishtiyoqning kuchli ekanligini angladim. Negaki u 5-sinfdan Nukus shahridagi futbol maktabiga oʻqishga borib, oʻqish jarayonidayoq musobaqalarda faol ishtirok etib, futbol boʻyicha 1-darajali diplomni, "Eng yosh sportchi” faxriy yorligʻini, "Mini futbol” turnirining 2-darajali diplomini va boshqada bir qancha mukofotlarni olishga erishgan ekan.

2013-yilda futbol maktabini muvaffaqiyatli tugatgan Jahongir Yoʻldoshev Olimpiya zahiralari kollejiga oʻqishga kirdi. Ayni kunda unga taniqli sport murabbiyi Nigmatulla Qutiboyev ustozlik qilmoqda.

Biz ushbu maqolamizda Qipchoq ovulida hamma havas qiladigan sportchilar oilasi – Allayor Yoʻldoshev va uning turmush oʻrtogʻi Darmon Jumamurodovalar oilasida tarbiya koʻrib, voyaga yetayotgan sportchi farzandlar haqida qisqagina hikoya qildik.

Bu ahil oilada oʻsib-ulgʻayayotgan farzandlarning baxtli kelajagi, quvonchli kunlari hali oldinda.

Biz bu yoshlarga nufuzli sport arenalarida gʻoliblik nashidasini surib, yuzi yorugʻ boʻlishini tilab qolamiz.

Allambergan JUMANIYoZOV, "Mening oilam”

gazetasi muxbiri.