“YuRT UZRA HILPIRAR VATAN BAYROGʻI, MUJASSAMDIR UNDA MUSTAQILLIK IQBOLI” ShIORI OSTIDA TADBIR OʻTKAZILDI

Oʻzbekiston Respublikasining “Davlat bayrogʻi toʻgʻrisida”gi Qonuni qabul qilinganga bu yil 32-yil toʻldi. Yurtimizning barcha hududlarida ushbu sana munosabati bilan tantanali tadbirlar oʻtkazilib, keng nishonlandi.

17-noyabr kuni Amudaryo tumanidagi 36-sonli maktabda ham yoshlarni harbiy-vatanparvarlik ruhida tarbiyalash, ular qalbida davlat ramzlariga boʻlgan hurmat-ehtirom, faxru-iftixor tuygʻularini yanada mustahkamlash hamda Oʻzbekiston Respublikasi Davlat bayrogʻi qabul qilingan kunni munosib nishonlash maqsadida “Yurt uzra hilpirar Vatan bayrogʻi, mujassamdir unda mustaqillik iqboli” shiori ostida maʼnaviy-maʼrifiy tadbir oʻtkazildi.

Tadbirda tumandagi Davlat xavfsizlik xizmati chegara qoʻshinlariga qarashli harbiy qismning masʼul xodimlari Otabek Madolimov, Azizbek Akramov, Sherzod Atayev hamda 36-sonli maktabning oʻqituvchi va oʻquvchilari ishtirok etishdi.

Tadbir tantanali tarzda davlat madhiyalari bilan boshlandi va dastlab maktab oldida harbiy qismga tegishli qurol-aslahalardan tashkil etilgan koʻrgazma namoyish etildi. Shuningdek, tadbirga tashrif buyurgan harbiy qism xizmatchilari barchani ushbu muhim sana bilan tabriklab, mustaqil davlatchiligimiz ramzlaridan boʻlgan bayrogʻimiz oʻzida Vatanimiz oʻtmishi va bugunining muhim qirralarini aks ettirishini, yurt bayrogʻiga nisbatan hurmat tuygʻusini yuksaltirish, uning ulugʻvorlik kasb etuvchi mohiyatini anglash barchamiz uchun muhim vazifalardan biri hisoblanishini eʼtirof etishdi.

Taʼkidlanganidek, mamlakat taraqqiyoti hamda uning barqarorligida davlat ramzlarining alohida oʻrni bor. Shu maʼnoda bayrogʻimiz davlat va jamiyatning hayoti uning jahon hamjamiyatida oʻrni va rolini koʻrsatishda muhim ahamiyatga ega boʻlib, har birimiz uchun faxr-iftihor sanaladi. Bugun yurtimizdagi turli bayram tantanalarida mamlakatimiz delegatsiyalari qatnashayotgan xalqaro tadbirlar, nufuzli sport musobaqalarida mamlakatimiz sharafi, xalqimizning gʻurur va iftixorini yorqin aks ettiradigan omillardan biri ham aynan bayrogʻimizdir.

Tadbir maktab oʻquvchi-yoshlari ishtirokidagi stol tennisi, shashka, shaxmat musobaqalari bilan davom ettirildi. Koʻtarinki ruh bilan boshlangan stol tennisi musobaqalari davomida yoshlar oʻz mahoratlarini namoyish etib, gʻoliblik uchun harakat qilishdi. Shaxmat-shashka musobaqalarida ishtirok etgan sportchilar ham oʻyinlar jarayonida biri-biridan zakovatli ekanligini koʻrsatishdi.

Tadbir ishtirokchilari maktabning boshlangʻich sinfida oʻqituvchisi Saragul Yusupova tomonidan tashkil etilgan ochiq oʻquv mashgʻulotida ham qatnashishdi va oʻquvchilar bilan davlat ramzlari xususida savol-javob oʻtkazishdi. Oʻquvchilar davlat bayrogʻi Oʻzbekiston Respublikasining 1991-yil 18-noyabrdagi «Oʻzbekiston Respublikasining Davlat bayrogʻi toʻgʻrisida»gi qonuni bilan tasdiqlangani, davlat ramzlari har bir mamlakatning suvereniteti va mustaqilligini ifodalovchi muqaddas timsollar ekanligini, shu yurtda yashovchi fuqaro sifatida ular bilan faxrlanishini gʻurur bilan soʻzlab berishdi.

Maktabning faollar zalida davom etgan tadbirda esa tumandagi Davlat xavfsizlik xizmati chegara qoʻshinlariga qarashli harbiy qism masʼullari harbiy xizmatchilarning Vatan bayrogʻi poyida tiz choʻkib, muqaddas Ona tuprogʻini matonat va sadoqat bilan himoya qilishga qasamyod qilishi bejiz emasligini, chunki bayroq jasorat, gʻurur, fidoyilik, or-nomus timsoli ekanligini iftixor bilan taʼkidlashdi. Shuningdek, oʻquvchi-yoshlarni harbiylashtirilgan yoʻnalishdagi oʻquv yurtlarga qabul qilish tartibi haqidagi batafsil maʼlumotlar bilan tanishtirib oʻtishdi.

Tadbir yakunida sana munosabati bilan maktabda tashkil etilgan sport musobaqalari gʻoliblari taqdirlandi va muqaddas bayrogʻimizni jahon arenalarida, nufuzli sport musobaqalarida baland koʻtarib yurishlarini aytib, ezgu tilaklar bildirildi.

O.Xudoyberganova.