“JAHOLATGA QARShI MAʼRIFAT BILAN” MAVZUSIDA TADBIR OʻTKAZILDI

Amudaryo televideniyesi tahririyatining “Yuksak maʼnaviyatli va axloqli yoshlar – kelajak poydevori” nomli grant loyihasi doirasida tumanning barcha hududlarida yoshlarning maʼnaviyatini yuksaltirish, ular ongida Vatanga muhabbat milliy va umuminsoniy qadriyatlarga sadoqat ruhini shakllantirish maqsadida turli tadbirlar tashkil etilib kelinmoqda. Ushbu tadbirlar yoshlarning boʻsh vaqtini mazmunli oʻtkazishlarida, dunyoqarashni kengaytirib, maʼnaviy dunyosini boyitishda, jamiyatda ijtimoiy-maʼnaviy muhitni sogʻlomlashtirishda muhim ahamiyat kasb etmoqda.

20-dekabr kuni 16-sonli ixtisoslashtirilgan davlat umumtaʼlim maktabida grant loyihasi rejasiga muvofiq “Jaholatga qarshi maʼrifat bilan” mavzusida maʼnaviy-maʼrifiy tadbir oʻtkazildi.

Yoshlarni milliy va umuminsoniy qadriyatlarga hurmat ruhida tarbiyalash, ularning maʼnaviyatini yuksaltirish, kelajagimiz egalarini “ommaviy madaniyat” niqobi ostidagi madaniyatsizlikning zararli taʼsirlaridan himoya qilishga qaratilgan ushbu tadbirda Din ishlari boʻyicha qoʻmitaning Amudaryo tumanidagi bosh mutaxassisi Muzaffar Sherimbetov, Respublika Maʼnaviyat va maʼrifat markazi tuman boʻlimi mutaxassisi Mahmud Eshmanovlar qatnashishdi. Shuningdek, grant loyihasi ijrochilari, tahririyat xodimlari hamda maktab oʻqituvchi va oʻquvchilari ham ishtirok etishdi.

Tadbirda dastlab grant loyihasi doirasida amalga oshirilayotgan ishlar, hududlarda oʻtkazilayotgan turli tadbirlar, yoshlarni kitobxonlikka jalb etishga qaratilgan tanlovlar, adabiy kechalar, ijodkorlar bilan uchrashuvlar haqida soʻz yuritilib, batafsil maʼlumotlar berildi. Ushbu tadbirlar va grant loyihasi doirasida tumandagi ommaviy axborot vositalarida yoritilayotgan turli maqolalar, yoshlarning ijod namunalari barchaga manzur boʻlayotgani taʼkidlab oʻtildi.

Shundan soʻng, Din ishlari boʻyicha qoʻmitaning Amudaryo tumanidagi bosh mutaxassisi Muzaffar Sherimbetov, Respublika Maʼnaviyat va maʼrifat markazi tuman boʻlimi mutaxassisi Mahmud Eshmanovlar tashkilot xodimlari tomonidan amalga oshirilayotgan ishlar xususida keng toʻxtalishdi. Undan tashqari, “ommaviy madaniyat”ning zararli taʼsiri, mafkura maydonining turli xurujlari, ulardan himoyalanish borasida ham soʻz yuritishdi.

Tadbir davomida XXI asr – globallashuv jarayonida yoshlarning radio-televideniye, matbuot, internet kabi vositalar orqali axborot va maʼlumotlar olayotgani, bu jarayonda baʼzi bir aqidaparast oqimlar yoshlarga mafkuraviy taʼsir oʻtkazishga urinayotgani hamda ularning oldini olish borasida nimalarga eʼtibor qaratish lozimligi aytib oʻtildi. Shuningdek, bugungi kunda jaholatga karshi maʼrifat bilan kurashish har qachongidan koʻra muhim ahamiyat kasb etayotgani, bunda yoshlarning milliy qadriyatlarga sodiq, oshkora va pinhona koʻrinishdagi gʻoyaviy tahdidlarga qarshi kurashadigan qilib tarbiyalash lozimligi eʼtirof etildi.

Ushbu tadbir taʼsirchanligini yanada oshirish maqsadida yoshlarga “Adashganlar” nomli videorolik ham namoyish etildi. Mazkur videorolikda yoshlar ongiga taʼsir oʻtkazishga harakat qilayotgan missionerlik oqimlaridan biri boʻlgan «Iyegovo shohidlari» tashkilotiga aʼzo boʻlganlar qanday ogʻir ishga qoʻl urganlarini, ikki dunyolarini oʻz hatti-harakatlari bilan barbod etganlarini, gʻoyaviy-mafkuraviy tahdid sifatida davom etayotgan missionerlik faoliyati va shu kabilardan doimo ogoh boʻlish kerakligini anglab, yot gʻoyalar xatar va xavf manbai ekanligi toʻgʻrisida aniq tasavvurga ega boʻldilar.

Videorolik namoyishidan soʻng, Islom dinini niqob qilgan buzgʻunchi oqim va harakatlarning gʻayriislomiy faoliyatlari mohiyati aniq faktlar asosida ochib berildi. Shuningdek, «Jaholat», «Maʼrifat» tushunchalari, tinchlik va barqarorlik, globallashuv jarayoni, «ommaviy madaniyat», maʼrifatparvar, tinchlikparvar jamiyatimizdagi mavjud qonunchilik xususida batafsil maʼlumotlar berilib, fikr almashildi.

Amudaryo televideniyesining “Yuksak maʼnaviyatli va axloqli yoshlar – kelajak poydevori” nomli grant loyihasi doirasida tashkil etilgan “Jaholatga qarshi maʼrifat bilan” mavzusidagi maʼnaviy-maʼrifiy tadbir barcha ishtirokchilarda katta taassurot qoldirdi.

O.Xudoyberganova