TIRIKLIKNING QADRIGA YeTING!

Giyohvandlik butun dunyo xalqlarini tashvishga solayotgan dolzarb muammolardan biridir. Chunki giyohvandlik vositalari va psixotrop moddalar qabul qilishning zararli oqibatlari bugungi kunda yosh-u qariga birdek ayon. Eng dahshatlisi, ushbu moddalarni qabul qilgan odam bu yoʻldan qaytmogʻi qiyin. Narkotik va psixotron moddalar isteʼmol qilish jinoyatlar sodir etilishining koʻpayishiga olib keladi. Chunki giyohvand boʻlib qolgan inson ushbu moddani muntazam qabul qilishi uchun koʻp mablagʻ topishi lozim boʻladi.

Giyohvand moddalarni isteʼmol qilish kishi meʼdasi, jigari faoliyatini ishdan chiqaradi, koʻrish, eshitish, taʼm bilish, fikrlashdan mahrum boʻladi. Tafakkur qila olmaydi, oʻzini boshqara olmaydi va jamiyat uchun ham, oilasi uchun ham foydali ish qila olmaydigan shaxsga aylanadi.

Inson hayotini tanazzul sari yetaklaydigan zararli odatlardan biri spirtli ichimlik ichishdir.

Olimlarning aniqlashlaricha, saratonni keltirib chiqaruvchi omillarning koʻpchiligi spirtli ichimlikda mavjud ekan. Mast boʻlguncha ichish ham, muntazam, yaʼni har kuni oz-ozdan ichish ham inson organizmiga halokatli taʼsir qilar ekan.

Spirtli ichimliklarning  salbiy oqibatlari haqida ommaviy axborot vositalarida, ijtimoiy tarmoqlarda koʻp yozilgan va yozilmoqda. Ichkilik ichish natijasida turli  koʻngilsizlar sodir boʻlayotganiga hayotda hammamiz guvoh boʻlib yuribmiz. Biroq bundan tegishli xulosa chiqarilmayapti, menimcha.

Oʻzbekistonda surunkali alkogolizm kasalligiga chalingan bemorlar bemorlar soni tobora ortib borayotgani fikrimiz dalilidir.

Jahon sogʻliqni saqlash tashkiloti maʼlumotlariga qaraganda, inson salomatligiga salbiy taʼsir qiluvchi asosiy 20ta xatarli omillar ichida spirtli ichimlik isteʼmoli asosiy oʻrinni tutar ekan. Spirtli ichimlik isteʼmol qilgan odamning tanasida uning zaharli moddalari 3 kungacha saqlanib turar ekan, oshqozon yalligʻlanishi, yurak xastaliklari, xafaqon kasalligi aynan ichimlik ichish oqibatida yuzaga  keladi. Eng achinarlisi, spirtli ichimlik ichgan odam oʻzini oʻzi boshqara olmaydi, toʻgʻri fikrlay olmaydi, oilasida va jamoat joylarida oʻzini munosib tuta olmaydi. Natijada turli nizo, urush-janjallar kelib chiqishiga sababchi boʻladi.

Keyingi yillarda ayollar orasida ham spirtli ichimlik ichish hollari koʻpayib bormoqda. Bu barchani xushyor tortishga, sogʻlom turmush qoidalarini kengroq targʻib etishga chorlaydi. Chunki ayol-nasllar tarbiyachisidir.

Xulosa qilib aytganda, spirtli ichimlik ichish tufayli hosil boʻladigan kayf – shirin hayotdan aziz emas.

Baxtli, sogʻlom va farovon yashashni istagan istagan inson zoti borki, spirtli ichimlik ichish, chekish, giyohvand moddalar isteʼmol qilish kabi zararli odatlardan tiyilmogʻi va oʻz hayotini oʻzi goʻzal, fayzli va mazmunli oʻtkazishga intilmogʻi lozim.

Oygul RAJABOVA.