Tomorqasidan samarali foydalanayotgan bobodehqon hamyurtlarimiz hayotidan

Mamalakatimizda qishloq xoʻjaligining barcha tarmoqlari singari gul yetishtirish, koʻchatchilikni rivojlantirishga ham alohida eʼtibor qaratilmoqda. Amudaryo tumanida uzoq yillardan buyon gulchilik bilan shugʻullanib, roʻzgʻorini tebratib kelayotgan hamyurtlarimiz talaygina.

Uyshin mahallasida yashovchi hamyurtimiz Omonboy Jalolov 15-yildan buyon gulchilik bilan shugʻullanib keladi. Biz bilan suhbat chogʻida Omonboy aka gul yetishtirish juda nozik, katta sabr va mehr talab qiladigan faoliyat turlaridan biri ekanligini, gul koʻchatlarini yetishtirish bilan shugʻullangan insonlarning goʻzallik yaratishga boʻlgan qiziqishlari, tabiatga, hayotga muhabbati yanada oshishini alohida taʼkidladi.

Omonboy Jalolov turmush oʻrtogʻi, farzandlari bilan birga 1 sotix yer maydonida tashkil etgan issiqxonada har yili 25 ming dona gul koʻchatlarini yetishtirishadi va yaxshi daromad olishadi. Turmush oʻrtogʻi, ikki nafar oʻgʻli va qizi oʻqish va ishlaridan boʻsh vaqtlarida issiqxonada gul koʻchatlarini parvarishlashadi.

Issiqxonada Qoraqalpogʻiston Respublikasi tabiatiga, iqlim sharoitiga mos boʻlgan har xil turdagi gul koʻchatlari yetishtiriladi. Shafran, petunya, katrandus, salviya kabi noyob gullar koʻchatlari shular jumlasidandir. Yetishtirilgan gullar koʻchatlari Nukus shahri va respublikadagi barcha tumanlarga buyurtma asosida yetkazib beriladi.

Shu oʻrinda maʼlumot tariqasida keltirish joizki, 2023-yilning 24-oktyabr sanasida Oʻzbekiston Respublikasi Prezidentining “Gulchilik va koʻchatchilik sohalarini davlat tomonidan qoʻllab-quvvatlashga doir qoʻshimcha chora-tadbirlar toʻgʻrisida”gi qarori imzolangan edi. Mazkur qaror bilan 2023-yil 1-noyabrdan 2026-yil 1-yanvarga qadar tuganaklar, piyozboshlar, tuganaksimon ildizlar, tuganak piyozlar, ildizpoya, jumladan vegetativ tinim holatidagi, vegetatsiya yoki gullash davridagi sertarmoqlari, boshqa tirik oʻsimliklar (jumladan, ildizlari), qalamchalar importida bojxona bojining nol stavkasi qoʻllanilishi belgilangan boʻlib, ushbu hujjat gul yetishtirishni yana rivojlanirish borasida muhim dasturulamal boʻlmoqda.

Toʻlqin ovulida yashovchi Azimjon Muxtarov ota-bobolaridan oʻrgangan dehqonchilik sirlarini bugun farzandlariga oʻrgatib kelayotgan tajribali dehqonlardan biridir. Azimjon aka 25 sotix tomorqa yer maydonida turli xil sabzavotlar, qishloq xoʻjalik mahsulotlari yetishtirib, oilasiga yaxshi daromad olib kelmoqda.

Tomorqaning 5 sotix yer maydoniga qurilgan issiqxonada 4-yildan buyon pomidor, bodring, baqlajon, karam kabi mahsulotlardan yiliga 2-martadan hosil olinadi. Hosilni Mangʻit dehqon bozoriga olib borib sotishadi va oilaga yaxshigina qoʻshimcha daromad keladi.

Oliy maʼlumotli, 33-sonli umumtaʼlim maktabining jismoniy tarbiya fani oʻqituvchisi boʻlgan Azimjon akaning dehqonchilikka, yerga boʻlgan mehri boʻlakcha. Tomorqasidagi bir qarich yerni ham boʻsh qoʻymasdan har xil dehqonchilik mahsulotlarini ekib, yiliga ikki marta hosil olishni yoʻlga qoʻygan.

Turmush oʻrtogʻi Barno Shomurodova ham ushbu maktabning ona-tili va adabiyot fani oʻqituvchisi, u ham ishdan boʻsh vaqtlarida tomorqasidagi yetishtirilayotgan sabzavotlarni parvarishlashga koʻmaklashadi.

Azimjon akaning ikki nafar oʻgʻli ayni paytda oliy oʻquv yurtlari talabalari. Ularning ham dehqonchilikka qiziqishlari kuchli boʻlib, oʻqishdan boʻsh vaqtlarda issiqxonada va tomorqada ota-onalari bilan mehnat qilib kelishmoqda.

Charos Arslonova, tuman hokimligining Axborot xizmati rahbari.