Doʻrmanliklar markazlashgan holda pilla yetishtirmoqda

Bugungi kunda yurtimizda ipakchilik tarmogʻini rivojlantirishga katta eʼtibor qaratilmoqda. Ipak qurti parvarishi va pilla yetishtirish – qadimdan xalqimiz hayotida muhim oʻrin tutgan, ekologik toza va iqtisodiy foydali boʻlgan sohalardan biridir. Mazkur yoʻnalishning rivojlanishi nafaqat qishloq xoʻjaligi samaradorligini oshirish, balki aholini barqaror daromad manbai bilan taʼminlashda ham muhim ahamiyat kasb etadi.

Soʻnggi yillarda ipakchilik tarmogʻini modernizatsiya qilish, eksport salohiyatini oshirish va xalqaro bozorga chiqish imkoniyatlarini kengaytirish maqsadida bir qator islohotlar amalga oshirilmoqda. Fermer xoʻjaliklari, dehqonlar va tadbirkorlar ipak qurti urugʻi, tut daraxti koʻchatlari va parvarishlash vositalari bilan taʼminlanmoqda. Shuningdek, klaster tizimi orqali pilla yetishtiruvchi xoʻjaliklar va qayta ishlovchi korxonalar oʻrtasida barqaror hamkorlik yoʻlga qoʻyilmoqda.

Amudaryoliklar ipak qurti parvarishi va pilla yetishtirishda respublikada eng ilgʻorlardan hisoblanadi. Tumanda joriy yilda pilla yetishtirish rejasi 296 tonna boʻlib, 2 ming 658 ta xonadonda 4 ming 936 quti ipak qurti parvarishlanmoqda.

Doʻrman ovuli aholisi pillachilikning moʻmay daromad manbai ekanligini chuqur anglab yetgan. Uning mehnatidan qochmay, ipak qurti parvarishini markazlashgan holda tashkil etishi, oʻzaro hamjihatliklari bilan boshqalarga namuna boʻlmoqda. Har yili ovuldagi band boʻlmagan xotin-qizlar ovuldagi boʻsh turgan binolarda ipak qurti parvarishiga jalb qilinib, ularning oilasiga daromad olib kelishiga koʻmaklashilmoqda.

Bu yilgi mavsumda ham doʻrmanliklar tumanda eng ilgʻorlar qatorida markazlashgan holda pilla yetishtirmoqda. 15 nafardan ortiq ayol-qizlar 20 quti ipak qurtini parvarish qilib, pilla xirmoniga munosib hissa qoʻshmoqda. Ularning mashaqqatli mehnati va oʻzaro hamjihatliklarini ragʻbatlantirish maqsadida tuman hokimining birinchi oʻrinbosari Faxriddin Yusupov ish jarayoniga tashrif buyurdi.

Faxriddin Yusupov pillakorlarga ipakchilik bu nafaqat iqtisodiy foyda, balki oilaviy baraka, xotin-qizlar va yoshlar uchun ish oʻrni, ekanligini taʼkidlab, bu yoʻnalishdagi har bir mehnatkashning hissasi tahsinga loyiq ekanini qayd etdi.

Tadbir davomida pillakorlar faol ishtiroki, sifatli va moʻl hosil yetishtirayotgani uchun esdalik sovgʻalari bilan ragʻbatlantirildi. Ularning orasida uzoq yillardan buyon ipak qurti parvarishi bilan shugʻullanib kelayotgan tajribali pillakorlar, nuroniy onaxonlar bunday eʼtibor va eʼtirof ularni yanada koʻproq mehnat qilishga undayotganini aytib, minnatdorlik bildirishdi.

Taʼkidlash joizki, ipak qurti parvarishi, ayniqsa, bahor va yoz mavsumlarida minglab oilalar uchun mavsumiy daromad manbai hisoblanadi. Ayollar, yoshlar va keksalar ham bu jarayonda faol ishtirok etib, oʻz turmush darajasini yaxshilash imkoniga ega boʻlmoqda.

Charos Arslonova, tuman hokimligining Axborot xizmati rahbari.