PILLA XIRMONI YuKSALDI

demak, daromad ham moʻl boʻladi

Peshqadamlik va mehnatsevarlik biz pillakorlarga xos xususiyat boʻlib, bir oylik ipak qurti boqish mavsumida bu xususiyatlar toʻla namoyon boʻladi hamda oʻzining samarali natijalarini moʻl pilla xirmonlarida koʻrsatadi. Har yili barvaqt ipak qurtlarini parvarishlashga kirishib, moʻl hosil olishga odatlangan 215 ta fermer xoʻjaliklaridagi 3564 nafar pillakorlarimiz bu yilgi mavsumda 4167 quti mahalliylashgan ipak qurtlarini ilgʻor tajribalar asosida parvarishlab, moʻl pilla hosili yetishtirishga muvaffaq boʻldilar va 243,5 tonnadan ziyod aʼlo navli pilla hosilini yetkazib berdilar. Bu bilan usta pillakorlarimiz mamlakatimiz boyligiga boylik qoʻshib, ichki  bozorimizni qimmatbaho sanoat xom ashyosi bilan taʼminlashga munosib hissa qoʻshdilar.

Moʻl pilla hosilini ipak qurtlarining mustahkam ozuqa bazasisiz tasavvur qilish qiyin, albatta. Tumanimiz boʻyicha 1039 gektar tutzorlar va qatorlab ekilgan 772 ming tup tut daraxtlari har yili yaxshigina barg hosili berib kelmoqda. Ozuqa bazamizni yanada mustahkamlash maqsadida bu yil erta bahorda 71 mingdan ziyod tut koʻchatlarini ekdik. Shu bilan birga Xitoydan moʻl barg hosili beradigan 186 ming tup tut koʻchatlarini keltirib, "Amudaryo-Panasham” fermer xoʻjaligida 9 gektarga, "Toʻlqin” va "Oq oltin” ovullarining har birida uch gektardan tut plantatsiya qilib ekildi. Bular albatta, yana bir necha yildan keyin oʻzining samarali natijalarini beradi.

May oyi pillakorlarimiz uchun eng qizgʻin ish fasli boʻldi. Pillakorlarimiz kunni tunga ulab, ipak qurti boqish bilan mashgʻul boʻldilar. Shunday qizgʻin ish kunlarida "Mangʻit pilla” MChJning bosh pillaxonasini va Xitoy qishlogʻidagi pilla hosilini qabul qilish va saqlash shoxobchasini taʼmirlash ishlari sifatli nihoyasiga yetkazildi. Bu yil pilla hosilini qabul qilish va saqlash ishlari ikki joyda – Mangʻit shahridagi bosh pillaxonada va Xitoy pillaxonasida tashkil etildi. Pillakorlarimizning roppa-rosa bir oylik fidokorona mehnatlaridan keyin, yaʼni 23-24-may kunlaridan boshlab dastlabki pilla hosilini qabul qilishga kirishildi. Birinchilardan boʻlib "Toʻlqin” ovulidagi ilgʻor pillakor Gulzira Abdullayeva bir quti ipak qurtidan 65 kilogramm oʻrniga 90 kilogrammdan ortiq, "Oʻrta qalʼa” ovulidagi Zaripboy Yusupov va Xosiyat Pirnazarovalarning har biri bir quti ipak qurtidan 80 kilogarmmdan, "Xolimbeg” ovulidan Salomat Boltaboyeva bir qutidan 91 kilogramm, "Qilichboy” ovulidan Rohatoy Qurbonboyeva bir qutidan 75 kilogramm yuqori navli pilla hosilini topshirib, yillik shartnomaviy rejalarini 120-140 foizga ado etdilar va mavsum xirmonini boshlab berdilar. Moʻl pilla xirmonlarini bunyod etishda "Toʻlqin”, "Choykoʻl”, Bobur nomli "Oq oltin” va "Xolimbeg” ovullari pillakorlari peshqadamlik qildilar. "Qilichboy”, "Oʻrta qalʼa”, "Qipchoq”, "Kuyuk koʻpir” va "Doʻrman” ovullari pillakorlari ham tumanimizning bugungi sarbaland pilla xirmonlariga oʻzlarining salmoqli hissalarini qoʻshdilar.

Bosh pillaxonamizda pilla hosilini qabul qilish bilan barobar pilla hosilini dastlabki texnologik ishlov berishdan oʻtkazish ishlari ham peshma-pesh amalga oshirilmoqda. Ishlov berilgan pilla xom ashyosi oʻzining konditsion meʼyoriga kelgach, yaʼni, standart darajasida quritilgach, oʻzimizdagi "Asia Silk” Vetnam shoʻʼba korxonasiga joʻnatiladi va u yerda texnologik ishlov berilib, xom ipak mahsuloti ishlab chiqariladi. Bu mahsulotlar esa buyurtmachi sanoat korxonalariga joʻnatiladi.

Davlatboy XOʻJAQOV,

"Mangʻit pilla” MChJ raisi.