Jayxun ilhomlari

TILLO HANGOMASI

Bitta dehqon boboning

Uchta oʻgʻli bor ekan.

Kun boʻyi ishlamayin,

Kechda ovqat, non yerkan.

Shu zaylda oy emas,

Hatto yillar oʻtibdi.

Insofga kelishlarin

Dehqon rosa kutibdi.

Bora-bora keksayib,

Kasal boʻlib qolibdi.

Ishlashga mador yetmay,

Yotib orom olibdi.

Dardi esa kuchayib

Boravergan tobora.

Man-man degan tabib ham

Topolmabdi hech chora.

Ketmogʻini bilib chol

Oʻgʻillarin chorlabdi:

"Mendan rizo boʻling”, – deb

Rosa oʻksib, yigʻlabdi:

- Sizlarga bildirmasdan

Tillo koʻmganman yerga.

Men olamdan oʻtgan soʻng

Izlab topinglar birga...

Shu gapni aytib dehqon,

Abad yumibdi koʻzin.

Uni dafn etishib,

Esga olibdi soʻzin.

Yerni  bir bor agʻdarib,

Topishmagach tilloni.

Bahorda bugʻdoy ekib,

Koʻtarishgan xirmonni.

Kuzda yerni ikki bor

Chuqur agʻdarishibdi.

Xazinani topolmay,

Yana aldanishibdi.

Ikkinchi yigʻilgan don

Togʻdek xirmon boʻlibdi.

Aka-ukalar koʻngli

Quvonchlarga toʻlibdi.

Tillo topmoq umidi

Hali-veri soʻnmabdi.

 

Akaning aytganiga

Ukalari koʻnmabdi.

Uchinchi yil kuz chogʻi

Kirishibdilar ishga.

Charchashib yetibdilar

Orom beruvchi qishga.

Uchinchi yil hosili

Tagʻin ham moʻl boʻlibdi.

Yer, mehnat ehsonidan

Kemtik dillar toʻlibdi.

- Otamiz koʻmgan tillo

Sirli hikmat gap ekan.

Boylik hamda rohatni

Mehnat-u yerda, degan.

Uch yil oʻtib angladik

Ota soʻzi sehrini.

Tillo bahonasida

Yuqtiribdi mehrini.

Mehnatini qilganga

Xazinakan yerimiz.

Erinmaylik toʻkmoqqa

Peshonadan terimiz.

"Mehnatning tagi rohat”,

Deganicha bor ekan.

Dangasa boʻlmaganga

Baxt-u omad yor ekan.

Joyi jannatda boʻlsin

Otamizning har onda.

Nasihati tufayli

Toʻyib yuribmiz nonga, -

Deb kenjatoy uqqanin

Akalarga aytibdi.

Dehqon aytgan sirli gap

Tillo boʻlib qaytibdi.

***

Eshitgan ertagimni

Sheʼr-la hikoya etdim.

Rivoyat maʼnosiga

Men ham kechikib yetdim.

Bolalar buni oʻqib,

Yer qadrini bilishsin.

Albatta qulogʻiga

Sirgʻa misol ilishsin.

Saʼdulla XOʻJANIYoZOV.

 

ONAJON

Mehringiz qoʻmsayman hozir ham,

Yoʻqligingiz qiladi alam.

Hamma bor-u, bir oʻzingiz kam,

Men sizni sogʻindim, Onajon!

 

Toʻydan kelganda yarim tun,

Ostonada kutib butun.

Figʻonimdan chiqsa tutun,

Keldingmi, derdingiz, Onajon.

 

Uxlang, meni kutmang, desam,

Mening-chun gʻam yutmang, desam.

Aslo bunday qilmang desam,

"Bolam-a”, – derdingiz, Onajon!

 

Tegirmon keldi aylanib,

Qoldim boboga aylanib.

Ostonada men boylanib,

Oʻzim qoldim-ku, Onajon!

 

Farzandlarim "Bolam”, - deydi,

Oʻz bolasin gʻamin yeydi.

Bolalari menday "daydi”,

Ular ham kutar, Onajon!

 

Zamon shunday zamon ekan,

Kimlargadir armon ekan.

Kutish Haqdan farmon ekan,

Sizni tushundim, Onajon!

Farhod Avezov, "Jayxun

ilhomlari” NNT aʼzosi.

 

QOGʻOZ QORALAB

Men nima yozyapman, bilmay boraman,

Shunchaki yurgandek kogʻoz qoralab.

Nimadan ne maʼni koʻzlaydi koʻzim,

Daftarga nimani soʻzlaydi soʻzim?

 

Tartibga tayanmas topgan qalamim,

Boladan farqi yoʻq borim, hali ham.

Bogʻlardan zavq tuyib olaman hordiq,

Shoxlarni oʻynayman bagʻrimga tortib.

 

Misralar toʻkilib daftarga tushar,

Xayolim qoʻl yetmas qofiyalar quchar.

Tengdoshlar kularlar sheʼrimdan rosa,

Soʻng qoʻshib qoʻyarlar: "Qoyilmiz, yasha!"

 

Menga shul kerakdir, boshqa gap emas,

Oʻzga soʻz bekordir, aslo naf emas.

Qaddim dol boʻlgani aslo choʻt emas,

Qalbim togʻ, ibrati yoshlarga - havas...

Jumaboy HIDOYaTOV, "Jayxun ilhomlari” NNT aʼzosi.

 

Adabiyot...

Adabiyot, maddoh qul emas,

Sadoqatli voris boʻlaman.

Sahrolaring kezgancha bir kun,

Yuragingda mangu qolaman.

 

Hayot imkon abadiyatning,

Bu ochunning afsunlari koʻp.

Sinovlari, soʻrogʻi mushkul,

Yaxshi-yomon fusunlari koʻp.

 

Asrab oʻtgin umr dovonida,

Tuygʻularim nuri soʻnmasin.

Yuragimga berma halovat,

Begʻamlikka dunyo koʻnmasin.

 

Adabiyot, maddoh qul emas,

Sadoqatli voris boʻlaman...

 

Shahzod Anvar oʻgʻli,

Mangʻit iqtisodiyot kolleji oʻquvchisi.

 

Tinchlik

Bu koʻngil baxtdan sarmast,

Tinch va farovon hayot.

Qalblarda havas, hayrat -

Istiqlolim bergan baxt.

 

Quyosh zarrin nur sochar,

Yurtimning har yogʻiga.

Qishloqlar chiroy ochar,

Shukur, tinchlik chogʻiga.

 

Shukronalik yaxshidir,

Tinchlik noni totlidir.

Oʻgʻil-qizlar shod-quvnoq,

Xalqimiz mangu inoq.

Maftuna TOʻLIBOYeVA.

 

MANGʻITIM

Eng goʻzal gullardan bogʻ boʻlgan oʻlka,

Qushlari xas-choʻpdan in qurgan oʻlka.

Tengsiz taʼriflarga teng boʻlgan oʻlka,

Bu – mening oʻlkamdir, mening Mangʻitim.

 

Tarixi boy, cheksiz, ummon boʻlgan xalq,

Farzandlari dunyoga doston boʻlgan xalq.

Iffati-gʻururi osmon boʻlgan xalq,

Bu mening xalqimdir, mening Mangʻitim.

 

Tinchligi tillarda qoʻshiq boʻlgan yurt,

Baxtiga oʻzgalar oshiq boʻlgan yurt.

Urush, janjallarga toʻsiq boʻlgan yurt,

Bu mening yurtimdir, mening Mangʻitim.

Mohinur NORBOYeVA.

 

DOʻSTLARIMGA

Tilagim, orzuing amalga oshsin,

Armon dunyosidan mudom yiroq boʻl.

Shunday baxtli etsin seni xudoyim,

Doʻstim, ishonchlarim aro mangu qol.

 

Yillar oʻtib sochingga oq tushsa ham,

Oʻrtada sadoqat aslo soʻnmasin.

Vatanda ardoqli aziz inson boʻl,

Doʻstlaring sendan hech qoʻlin uzmasin.

 

Madina, Dildora, Guli – doʻstlarim,

Ilmda, hayotda boʻlingiz ilgʻor.

Qalb toʻrida asrab mehr gavharin,

Doʻstlikni asrangiz, asrangiz ming bor.

Gulruh EShIMMATOVA.

 

ONA TILIM

Ona tilim jonimdir,

Oʻzing tanda qonimdir.

Sheʼrimda shirin ohang,

Berar dillarga jarang.

 

Onam koʻp alla aytar,

Dadam suyib erkalar.

Bobom, buvim aytgan soʻz,

Hayotdagi hikmatlar.

 

Koʻngillarga xush yoqar,

Madhiyamda baxt balqar.

Oʻzbekona soʻzimga,

Dunyo havas-la boqar.

 

Yorqinoy KENJABOYeVA.

 

JONIM SENGA FIDO, OʻZBEKISTONIM

Goʻzallikda tengi yoʻq koshonam oʻzing,

Quvonch-u shodlikka boy toʻyxonam oʻzing.

Samolarni quchmish yorugʻ yulduzing,

Bu olamni quyoshdek yoritar yuzing.

Goʻzal va betakrorim, muqaddas Vatan,

Jonim senga fido, hur Oʻzbekiston!

 

Yuksaklarda yangramoqda Vatan madhi,

Oʻgʻlonlaring qasam bilan aytgan ahdi.

Har goʻshada bunyoddir Istiqlol taxti,

Bundan ortiq boʻlgaymi oʻzbekning baxti.

Goʻzal va betakrorim, muqaddas Vatan,

Jonim senga fido, hur Oʻzbekiston!

 

Bu muqaddas zamin ichra ozod elsan,

Dunyo uzra porlab turgan ajib dursan.

Taraqqiyot yoʻlida eng baland oʻzing,

Ey Vatanim, hech soʻnmasin ERK yulduzing.

Goʻzal va betakrorim, muqaddas Vatan,

Jonim senga fido, hur Oʻzbekiston!

 

Dildora RAJABOVA.

 

Onamga

Hayotingning mazmuni kim, desalar,

Yuragimga aziz zotni soʻrsalar,

Onam derman, avvalo, soʻz boshinda,

Qaygʻuim yoʻq, chunki onam qoshimda.

 

Ne savdolar boʻlmas hayot, ochunda,

Koʻrgiliklar solsa gʻanim boshimga,

Gʻanimlarim oyogʻimdan chalganda,

Qaygʻuim yoʻq, chunki onam qoshimda.

 

Koʻnglim ezib, parchalashsin, tilishsin,

Mayli, gʻiybat qilsin, mayli kulishsin,

Meni hech kim yengolmaydi, bilishsin,

Qaygʻuim yoʻq, chunki onam qoshimda.

 

Siz durlarning durdonasi, onajon,

Tenglasholmas aslo sizga bu jahon.

Kechiring, gar xato qilsam men nodon,

Baxtimizga doim boʻling sogʻ-omon.

 

Siz borsizki, sinmas hech bardoshim-da,

Qaygʻuim yoʻq, chunki siz bor qoshimda.

 

Kumush JUMANOVA, Amudaryo akademik litseyi oʻquvchisi.