ULUGʻVOR TUYGʻULARGA SODIQLIK

Xalqimizda: "Erni er qiladigan ham, qora yer qiladigan ham ayol”, degan gʻoyat ibratli hikmat bor. Aynan shu hikmatga mos ravishda "Er bilan xotin – oilaning qosh-u koʻzi” degan iborani ham koʻp ishlatamiz. Aslini olganda, ayoli oqila yigitning hamisha obroʻsi, izzat-nafsi baland, oilasida esa xotirjamlik, fayz-u baraka hokim.

- Oilada koʻp narsa ayolga bogʻliq, - deydi "Choykoʻl” qishlogʻining "Uch ogʻoch” mahallasida yashovchi hoji ona Oʻroloy momo Ahmedova. – ayol aql bilan ish yuritgan joyda aslo muammo boʻlmaydi. Qaysi oilada muammolar qalashib yotsa, demak, bu xonadon bekasida intizom va masʼuliyat yoʻq. Oila bekasi masʼuliyatni unutdimi, bilingki, oʻsha xonadondan fayz-baraka ham koʻtariladi.

 Oʻroloy momo bunday pand-u nasihatlarni takrorlashdan koʻra umri davomida aynan shunday sifatlarni oʻz oilasida mujassam etishga intilib yashagan ayollardan. Shundanmi, u el ichra izzat, obroʻ topdi. Oʻgʻil-qizdan, kelin-u nevara va kuyovlardan, quda-andalardan hurmat va eʼtibor koʻrdi. Eng muhimi, kalbi yaxshilikka limmo-lim bu onaxon Allohning ulugʻ mukofotiga sazovor boʻldi – hojilik martabasiga erishdi. Ayol zoti uchun bundan ulugʻ siylov bomikan?! Agar bor boʻlsa...

Ha, agar bundan-da ulugʻ siylov bor boʻlsa, "Choykoʻl” qishlogʻilik hoji ona Oʻroloy momoga yana bir bor nasib etarmidi!

Oʻroloy momo rahmatlik umr yoʻldoshi Yoʻldoshboy ota bilan turmush qurganlarida qishloqda hayot ancha ogʻir, ikkinchi jahon urushidan keyingi tiklanish yillari edi. Yosh kelinchak chillasidayoq kolxoz dalasiga ishga chiqdi. Eng ogʻir ishlar qoʻlda bajarilardi: qish boʻyi aravada kolxoz dalasiga goʻng, nombor tashib, toʻkishardi,  ariq-zovurlarning toʻngini koʻchirib, qazib-tozalashardi. Erta bahordan kech kuzgacha yosh kelinchakning qoʻlidan bel, ketmon, oʻroq tushgan emas oʻsha ogʻir yillari. Yil – oʻn ikki oy kolxoz ishidan boʻshamasdi dehqon degani. Kunduzlari paxta terib charchagan Oʻroloy uyiga kelib qozon-tovogʻiga, mol-holiga qarardi, qoʻl tegirmonida un tortib, tongda tandirga oʻt qalardi. Bu ishlarning orasida kir-chirini yuvib, bir xalta koʻsakni qaynona-qaynotasi koʻmagida chuvir, ertalab paxtani brigada xirmoniga olib borib toʻkardi.

- Ana shunday ogʻir mehnatlar ichida oʻgʻil-qizlarim dunyoga keldi, - mamnuniyat bilan soʻzlaydi hoji ona. – Yusufboy oʻgʻlimiz tugʻilganida dunyoga qaytadan kelganday, yasharib ketganday his etdim oʻzimni.

Har safar farzandlari tugʻilganida Yoʻldoshboy ota bilan Oʻroloy momoning qalblari quvonchga, xonadonlari nurga toʻlib boraverdi. Koʻz ochib-yumguncha bu oila gujumday tomir otdi. "Choykoʻl” qishlogʻining "Uch ogʻoch” mahallasini toʻldirib turgan, oilalarning deyarli yarmi Yoʻldosh ota bilan Oʻroloy momoning oʻgʻil-qizlari, nevaralarining oilalari.

Mehnat insonni nainki ulugʻlaydi, balki boy-badavlat, aqlli, mehr-oqibatli, saranjom-sarishta qilarkan-da, deymiz har gal "Uch ogʻoch” mahallasiga yoʻlimiz tushganida. Boisi, umr boʻyi mehnat qilib charchamagan Oʻroloy momoning xonadonida mehnatga munosabat tamoman boshqacha.

Momo yashaydigan hovli bilan chorbogʻlari tutashib ketgan Yusufboy, Quvvatboy, Bozorboy, Hayitboy, Omonboy ismli oʻgʻillari hamisha ahil, bir tan-u bir jon. Onalari duosini olmay, hech bir ishga qoʻl urmaydigan 8 nafar oʻgʻil-qiz, kelin-u nevaralar barcha yumushlarni hamkorlikda bajarishga oʻrganib qolishgan. Kelinlari Hayitbika, Davlatbika, Aziza, Muyassarxon va Muhabbatlar esa onaxonning qizlariday sevimli. Biri issiq patir yopsa, yana biri ustiga tovuq goʻshti bosilgan palov damlashga odatlangan kelinlarning ahilligidan bu katta xonadon xamisha obod. Mehnat esa bayramday ular uchun. Shaxsiy mablagʻlarini oʻrtaga yigʻib, MTZ rusumli traktor sotib olishganlari esa nur ustiga aʼlo nur boʻldi.

- Farzandlarimning   tomorqasi gullab ketdi-ya, - deb suyunadi momo shukronalik bilan.

Tomorqaning gullagani Oʻroloy momo xonadonining iqtisodini koʻtardi. Don-dun, poliz-u sabzavotdan katta xirmon koʻtargan oʻgʻil-qizlarining oilalariga fayz, baraka yogʻildi. Qoʻralari mol-hol-u parrandaga toʻldi. Bu yogʻini soʻrasangiz, Oʻroloy momoning katta xonadonidan gujumday ildiz otib, shoholagan 8 nafar farzandning oilalarida bugun chiroyli turmush hokim. Oʻzaro ahil, inoq va mustahkam sakkizta oilaning shakllanishida, oʻgʻil-qizlarining el ichra hurmat va eʼtibor topishlarida, qizlar Tozagul, Raʼnoxon va Barnoxonlarning tinib-tinchib ketishlarida katta xonadonning pir-u badavlat sohibasi Oʻroloy momo Ahmedovaning xizmati beqiyos.

- Farzandlarim omon boʻlishsin, - har tong duo qiladi onaxon. – hech qachon, xatto qiynalgan paytlarimda ham nolimaganman. Oʻgʻil-qizlarimga ham har doim shuni oʻrgatib keldim. Nolish – noshukurlik, qolaversa, Allohning neʼmatlaridan norozilik – doʻzaxiylik boʻladi. Bahouddin Naqshbandiy hazratlari: "Dil ba yoru dast ba kor – yaʼni, diling Allohda, qoʻling mehnatda boʻlsin”, deya taʼlim berganlar. Topgan bir burda noning mehnating mevasimi, demak, sen Haqning nazaridasan, koʻngling Alloh bilan. Ulugʻ Egam halol mehnat qilgan har bir moʻmin-musulmonni mukofotlaydi. Mening umr boʻyi topganlarim – halol mehnatim evaziga kamolga keltirgan farzandlarim, ularning ahil, inoq oilalari. Shular tufayli men 2011-yilda Muqaddas haj ziyoratida boʻldim. Koʻnglimni toʻldiruvchi ham, hayotimni munavvar etuvchi ham shu farzandlarim, katta oilamning oʻzi Kaʼbatulloq kabi muqaddas, unga til tekkizish gunoh boʻladi.

Baxtiyor oila sohibasi – hoji ona Oʻroloy momo nazarimizda oila haqida eng muxtasar fikr aytdilar. "Oila – Kaʼbatulloh kabi muqaddas, unga til tekkizish gunoh”, - dedilar.

Ha, azizlar chunki bu maskanda Hazrati Inson dunyoga keladi! Buyuk orzu – umidlar tugʻiladi. Millat shakllanadi, kelajak uchun zamin yaraladi bu kichik maskanda. Va...Va ushbu kichik makonning ostonasini hatlab chiqib biz Vatanni kashf etamiz. Yuragimizda Vatan muhabbati bilan bogʻliq ulugʻvor tuygʻular shu ostonadan boshlanadi! Oilaga til tekkizish – Vatanga til tekkizishdir.

Oʻroloy momoni hojilik martabasiga yetishtirgan qudrat ham ana shu ulugʻvor tuygʻularga sodiqlik emasmi!

Zotan,

Oila – Ayolning Kaʼbatullohi,

Misli Tangridur va Paygʻambari.

Shul buyuk haqiqat sobitkan toki,

Ayol eng mukarram, eng sanobari.

Misli bir sarv qaddu sanobar boʻlib,

Kaʼbasin koʻzida asrasa Ayol.

Bu dunyo ketardi shodlikka toʻlib,

Hayotga aylanib har ezgu hayol.

Oila – Ayolning Kaʼbatullohi.

Robiya YOʻLDOShEVA,

Allambergan JUMANIYoZOV,

"Amu news” ning maxsus muxbirlari.

Suratlarda: 1. Oʻroloy momo Ahmedova farzandlari va nevaralari davrasida. 2. Oʻroloy momo nevaralariga oʻtmish haqida hikoyalar aytib berishdan, bugungi dorilomon zamonning qadriga yetish  kerakligi haqida nasihatlar qilishdan aslo charchamaydi.