ODAMLAR TINChLIGI UChUN XIZMAT QILISh ENG OLIY MAQSADIMIZDIR

Men Toʻlqin ovulida profilaktika inspektori vazifasida ish boshlagan vaqtimda, toʻgʻrisi, ancha hayajonlangan, uddalay olarmikanman, deya hadiksiragan edim. Boisi, avvalgi yilda hududda 8 ta jinoyat sodir etilgan, jinoyatga moyil shaxslar roʻyxatga olingan edi. Men tumanimizda birinchilardan boʻlib xizmat uy-joyi, avtomashina bilan taʼminlandim.

Bu menga ovul aholisi bilan birga yashab, yaxshi-yomon kunlarida hamnafas boʻlish imkonini berdi. Hududni har kuni aylanib, odamlarning turmush tarzini oʻrgandim, muammolarini tingladim, ijobiy hal qilinishi uchun qoʻlimdan kelganicha intilayapman. Katta yoshli, obroʻ-eʼtiborli kishilar bilan maktablarda, koʻchalarda huquqbuzarliklar, jinoyatlar sodir etilishining oldini olish uchun mamlakatimizda har qanday jinoyatga jazo muqarrarligini keng tushuntirdik. OFY masʼul xodimlari, faollar, koʻchaboshchilar bilan har payshanbada profilaktik tadbirlar oʻtkazib, jinoyat sodir etib, jazo muddatini oʻtab qaytgan, huquqbuzarliklar, jinoyat sodir etishga moyilligi bor, spirtli ichimliklarga ruju qoʻygan shaxslar bilan suhbatlar olib borib, sogʻlom turmush kechirishga daʼvat etdik.

Bu saʼy-harakatlarimiz zoye ketmadi. Ovulda men oʻz faoliyatimni boshlaganimga bir yildan ziyod vaqt oʻtgan boʻlsa, shu muddat oraligʻida hech qanday jinoyat sodir etilmadi.

Ovulning bundan keyin ham jinoyatchilikdan holi hudud boʻlishi uchun intilaman. Shu bir yildan ortiq vaqt ichida, Taxtakoʻpir tumanida tugʻilib oʻsgan boʻlsam ham, Toʻlqin ovuli oʻz uyimday aziz, odamlari tugʻishganlarimday koʻnglimga yaqin boʻlib qoldi.

Ezgu niyatlar, yuksak orzular bilan yashayotgan odamlar tinchligi, osoyishtaligi uchun xizmat qilish men uchun sharafli ish.

Berdiboy BEKBERGENOV,

Toʻlqin ovuli profilaktika inspektori.