Yoʻlda huquqbuzarlikka guvoh boʻldingizmi? Videoregistrator orqali qayd qilib, IIVga yuboring va mukofot puli oling!

Koʻchalarda transport vositalarining koʻpligi, baʼzan yoʻlovchilarning, baʼzan transport vositalari boshqaruvchilarning salgina beparvoligi, baʼzan esa texnik nosoz transport vositalari bilan harakatlanish yoʻl transport hodisalari sodir boʻlishi kabi koʻngilsiz holatlarga olib keladi.

Ha, yoʻllarda jamiki transport vositalari boshqaruvchilarining, yoʻlovchilarning harakati bir-biriga bogʻliqki, bu jarayondagi xatoliklar, yaʼni, yoʻllarda harakatlanish qoidalariga amal qilmaslik oqibatida necha-necha begunoh odamlar hayotdan bevaqt koʻz yumayapti, olgan jarohatlari tufayli nogiron boʻlib qolayapti.

Jahon Sogʻliqni saqlash tashkiloti maʼlumotlariga koʻra, dunyoda har yili millionlab kishi yoʻl-transport hodisasi tufayli vafot etarkan, 20 milliondan ziyod kishi jarohat oladi. Bular asosan aholining faol qismi, yaʼni 20-35 yoshlar atrofidagilardir.

Shuningdek, bizning yurtimizda ham bu borada ahvol maqtangulik emas. Toʻgʻri, yoʻl transport hodisalari 2016-yilga nisbatan 2017-yilda ancha kamaygan. Joriy yilda esa yoʻllarda harakatlanish qoidalarini buzganlarga keskin choralar koʻrilayotgani, jazo choralari kuchaytirilgani va yoʻllar maxsus avtomatlashtirilgan foto va video qayd etish texnika vositalari orqali nazorat etilib, huquqbuzarlarga chora koʻrilayotgani oʻzining samaralarini berayapti. Biroq bu bilan yoʻllarda harakatlanish qoidalariga hamma ham amal qilayapti, deya olmaymiz. Afsuski, koʻngillarni larzaga soladigan, begunoh kishilarning umriga zomin boʻlayotgan avtohalokatlar hamon sodir boʻlib turibdi.

Oʻzbekiston Respublikasi Vazirlar Mahkamasining 2018-yil 20-sentyabrda qabul qilgan “Yoʻl harakati sohasidagi huquqbuzarliklarga qarshi kurashish samaradorligini oshirishga doir qoʻshimcha chora-tadbirlar toʻgʻrisida”gi qarorining turmushimizga tatbiq etilishi bu boradagi huquqbuzarliklarga qarshi keskin kurashish imkonini beradi.

Qarorga muvofiq 2019-yil 1-iyuldan boshlab, har bir jamoat transporti va yoʻlovchi tashish faoliyati bilan shugʻullanuvchi yuridik shaxslar uchun avtotransport vositalariga videoregistratorlar oʻrnatish boʻyicha majburiy tartib joriy etiladi. Jismoniy va yuridik shaxslarning avtotransport vositalariga oʻrnatilgan videoregistratorlar orqali qayd etilgan huquqbuzarlik holatlar aks etgan videoyozuvlar esa maxsus avtomatlashtirilgan foto va video qayd etish texnika vositalari orqali qayd etilgan videoyozuvlarga tenglashtiriladi va IIVga taqdim etilsa, Oʻzbekiston Respublikasining Maʼmuriy javobgarlik toʻgʻrisidagi kodeksida belgilangan tartibda koʻrib chiqiladi.

Shunisi eʼtiborliki, mazkur qarorga muvofiq qabul qilingan “Jismoniy va yuridik shaxslarning avtotransportiga oʻrnatilgan videoregistratorlar orqali qayd etilgan videoyozuvlarni qabul qilish, koʻrib chiqish hamda ularni taqdim etgan shaxslarni ragʻbatlantirish tartibi toʻgʻrisida”gi Nizomga asosan, yoʻl harakati qoidalari buzilishi aks etgan videoyozuvlarni taqdim etgan shaxslar huquqbuzarlardan undirilgan jarima hisobidan eng kam oylik ish haqining besh foizi miqdorida pul mukofoti bilan ragʻbatlantiriladi va videoyozuvlarni taqdim etgan shaxslar toʻgʻrisidagi maʼlumotlar oshkor etilmaydi.

Oʻzbekiston Respublikasi Vazirlar Mahkamasining mazkur qarori yoʻllarda yoʻl harakati qoidalari buzilishi va uning oqibatida sodir boʻlayotgan koʻngilsiz hodisalarning kamayishiga xizmat qiladi, albatta.

Dilshod AMINOV, tuman IIB yoʻl harakati

xavfsizligi boʻlimi boshligʻi, leytenant.