NOQONUNIY TURAR JOYLARGA KADASTR HUJJATLARI TAQDIM ETISh BOʻYIChA AKTsIYa DAVOM ETMOQDA

Maʼlumki, shu yilning 21-iyun kuni Vazirlar Mahkamasining «Oʻzbekiston Respublikasi Prezidentining «Fuqarolarni ijtimoiy qoʻllab-quvvatlash boʻyicha qoʻshimcha chora-tadbirlar hamda oʻzboshimchalik bilan qurilgan turar joylarga nisbatan mulk huquqini eʼtirof etish boʻyicha bir martalik umumdavlat aktsiyasini oʻtkazish toʻgʻrisida» 2018-yil 20-apreldagi PF-5421-son Farmoni ijrosini taʼminlash chora-tadbirlari haqida»gi 461-son Qarori qabul qilingan edi. Mazkur Qarorga muvofiq kelasi yilning may oyiga qadar Oʻzbekistonda jismoniy shaxslarning oʻzboshimchalik bilan egallab olingan yer uchastkalari yoki imorat qurish uchun ruxsatnoma olmasdan qurilgan turar joylariga nisbatan mulk huquqini eʼtirof etish boʻyicha bir martalik aktsiya oʻtkazilmoqda.

Ayni paytda aktsiya belgilangan tartib-taomillarga koʻra oʻtkazilmoqda. Tumanimizda ham oʻzboshimchalik bilan qurilgan imoratlarga mulk huquqi eʼtirof etilishi boʻyicha 300 nafar fuqaro murojaat etgan boʻlib, shu kunga qadar 70 nafar fuqaroga mulkni eʼtirof etish boʻyicha qaror chiqarib berildi va murojaat qanoatlantirildi. 38 nafar fuqaroning arizasi esa 461-son qaror talablariga toʻgʻri kelmaganligi sababli rad etildi. Qolgan fuqarolarning arizalari koʻrib chiqilmoqda.

Belgilangan tartibga koʻra mulk huquqi eʼtirof etilishi uchun fuqaro davlat xizmatlari markazi orqali tuman hokimining nomiga ariza bilan murojaat qiladi. Arizaga murojaat etuvchining pasporti nusxasi, oila aʼzolari haqida, shuningdek, yer uchastkasiga egalik qilgan muddatlari va imorat qurilgan vaqt toʻgʻrisida fuqarolarning oʻzini oʻzi boshqarish organlarining maʼlumotnomalari ilova qilinadi.

Davlat xizmatlari markazi xodimi hujjatlarni qabul qilib olganidan keyin hujjatlar paketi axborot tizimi orqali Qoraqalpogʻiston Respublikasi yer tuzish va koʻchmas mulk kadastri davlat korxonasining tuman filialiga yuboriladi.

Filial vakili uch ish kuni mobaynida joyiga chiqqan holda oʻzboshimchalik bilan qurilgan imoratni oʻrganib, uning planini shakllantiradi, uni ariza va unga ilova qilingan hujjatlar bilan birga Koʻchmas mulkka nisbatan huquqni eʼtirof etish ishlarini tashkil etish boʻyicha tuman komissiyasining aʼzolariga yuboradi.

Komissiya aʼzolari 5 kalendar kun mobaynida imoratni joyiga borgan holda oʻrganadilar va filialga oʻz xulosalarini taqdim etadilar.

Dalolatnomada oʻzboshimchalik bilan qurilgan imoratni eʼtirof etish mumkinligi koʻrsatilgan boʻlsa, shu kuniyoq eng kam ish haqining 5 baravari miqdorida yigʻim toʻlash uchun hisobvaraq-faktura shakl-lantiriladi. Murojaat etuvchi 4 ish kuni mobaynida toʻlovni amalga oshiradi.

Komissiya dalolatnomada oʻzboshimchalik bilan qurilgan imoratlarga nisbatan mulk huquqini eʼtirof etish mumkin emasligi toʻgʻrisida xulosaga kelgan boʻlsa, shu kuniyoq rad etish asoslari koʻrsatilgan tegishli xatni davlat xizmatlari markazi orqali murojaat etuvchiga yuboradi.

Rad etish haqidagi xatda koʻrsatilgan kamchiliklarni bartaraf etgan fuqaro bir martalik aktsiya muddati tugagunga qadar oʻzboshimchalik bilan qurilgan imoratga nisbatan huquqni eʼtirof etishni soʻrab yana murojaat qilishga haqli.

Komissiya qaroridan norozi boʻlgan taqdirda qaror ustidan yuqori turuvchi viloyat yoki respublika darajasidagi komissiyaga yoxud sudga shikoyat qilish mumkin.

Bir martalik aktsiyaning amal qilish muddati tugagandan keyin oʻzboshimchalik bilan qurilgan imoratlarga nisbatan mulk huquqini eʼtirof etish mumkinligi toʻgʻrisidagi fuqarolik qonun hujjatlari normalari bekor qilinadi. Shunday ekan, aktsiyaning amal qilish muddati davomida – kelasi yilning may oyiga qadar tumanimiz fuqarolari oʻzboshimchalik bilan qurilgan imoratlariga nisbatan mulk huquqini eʼtirof etishni soʻrab, tuman Davlat xizmatlari markazi orqali murojaat qilishlari mumkin.

Jasur Norimov, Qoraqalpogʻiston Respublikasi yer tuzish va

koʻchmas mulk kadastri davlat korxonasining

tuman filiali boshligʻi vazifasini bajaruvchi.

Nafisa XUDOYBERGANOVA,

tuman Davlat xizmatlari markazi bosh mutaxassisi.