Yakka tartibda uy-joy qurish uchun yer uchastkalari endilikda “E-IJRO AUKSION” yagona savdo maydonchasida elektron auktsion orqali olinadi

Oʻzbekiston Respublikasi Vazirlar Mahkamasining shu yilgi 63-son “Yer uchastkalari berish va yakka tartibdagi uy-joy qurish uchun yer uchastkalariga meros qilib qoldiriladigan umrbod egalik qilish huquqini realizatsiya qilishning zamonaviy va shaffof mexanizmlarini joriy etish boʻyicha qoʻshimcha chora-tadbirlar toʻgʻrisida”gi qarori qabul qilindi. Unga muvofiq, yakka tartibda uy-joy qurish uchun yer uchastkalari meros qilib qoldiriladigan umrbod egalik qilish huquqini realizatsiya qilish “E-IJRO AUKSION” yagona savdo maydonchasida elektron auktsionlar oʻtkazish yoʻli bilan amalga oshiriladi.

Yakka tartibda uy-joy qurish uchun 0,04 gektargacha va ushbu hajm doirasidagi yer uchastkalari faqat halok boʻlgan harbiy xizmatchilar oilalariga, davlat va xususiy uy-joy fondidagi oʻzlari egallab turgan uy-joyni tuman hokimliklariga oʻtkazayotgan fuqarolar va mulkdorlarga auktsionsiz beriladi. Yer uchastkasini berish boʻyicha imtiyozlar bir oilaga bir marta beriladi va oilaning boshqa aʼzolariga tatbiq etilmaydi.

Yakka tartibda uy-joy qurish uchun yer uchastkasini olish uchun tuman hokimligiga ariza beriladi. Shuningdek, auktsion ishtirokchisi bitta yer uchastkasini bir yilda bir marta sotib olish huquqiga ega boʻladi. Auktsionda ishtirok etish uchun zakalat yer uchastkasi minimal qiymatining 50 foizi miqdorida belgilanadi. Agar buyurtmachining shaxsiy hisob raqamidagi mavjud pul mablagʻlari yetarli boʻlmasa, auktsionda ishtirok etish uchun buyurtma qabul qilinmaydi.
Umumiy shartlariga koʻra auktsionlar oʻtkazilishi haqidagi xabarnomalar va lot haqidagi axborot kamida 30 kalendar kun oldin operatorning veb-portalida joylashtiriladi. Boʻsh yer uchastkasiga meros qilib qoldiriladigan umrbod egalik qilish huquqi auktsionga tuman hokimining qarorida koʻrsatilgan yer uchastkasining eng past narxi boʻyicha qoʻyiladi. Elektron auktsion boʻlib oʻtmagan deb tan olinganda, yer uchastkasining eng past narxi boʻyicha takroriy auktsionga qoʻyiladi.

Operator auktsionni tashkil etish xizmatlari uchun tegishli miqdorida haq oladi. Shuningdek, auktsion ikki va undan ortiq ishtirokchi mavjud boʻlganda oʻtkaziladi. Tartibga koʻra, auktsion bir ish kuni mobaynida soat 9:00 dan soat 18:00 gacha boʻlib oʻtadi. Boshlangʻich narx sifatida auktsion obʼektining minimal qiymatiga teng narx belgilanadi.

Auktsionning qadami auktsion obʼekti minimal qiymatining besh foizini tashkil etadi. Shuningdek, ishtirokchilardan lotni boshlangʻich narxdan bitta qadamga oshirilgan narxda sotib olish boʻyicha taklifni tasdiqlashni soʻrashdan boshlanadi. Agar taklif berilgandan keyin oʻn daqiqa davomida auktsion ishtirokchilaridan biri belgilangan qadamga oshirilgan lot narxini tasdiqlasa, keyingi taklifni tasdiqlash uchun vaqt yana oʻn daqiqaga uzaytiriladi. Lekin tasdiqlangan oxirgi taklifdan soʻng, oʻn daqiqa davomida keyingi oshirilgan lot narxi boʻyicha taklif auktsion ishtirokchilarining birontasi tomonidan tasdiqlanmasa, auktsion natijalari haqidagi bayonnomani avtomatik tarzda shakllantirgan holda yakunlanadi. Lot narxi boʻyicha taklifni oxirgi tasdiqlagan ishtirokchi auktsion gʻolibi, deb hisoblanadi.

Auktsion ishtirokchilariga navbatdagi stavkani dastlabki belgilangan qadamning 5, 10 yoki 20 baravari miqdorida mustaqil belgilash imkoniyati beriladi. Agar lot narxini oshirish boʻyicha taklifni oxirgi tasdiqlagan auktsion ishtirokchisi buni elektron onlayn-auktsionni oʻtkazish vaqti yakunlangunga oʻn daqiqadan kam qolganda amalga oshirgan boʻlsa, auktsionni oʻtkazish vaqti oxirgi taklif tasdiqlangan paytdan boshlab, keyingi oʻn daqiqaga uzaytirilishiga imkon beriladi. Bunda elektron onlayn auktsionni oʻtkazish vaqti 3 soatdan ortiq boʻlmagan muddatga uzaytirilishi mumkin va auktsion soat 21:00ga qadar yakunlanishi lozim. Lot narxi boʻyicha oxirgi taklifni soat 21:00 ga qadar bildirgan ishtirokchi auktsion gʻolibi hisoblanadi.

Tuman hokimi «E-IJRO AUKSION» orqali bayonnomani olgandan keyin besh ish kuni mobaynida auktsion gʻolibiga yer uchastkasini ajratish haqida qaror qabul qiladi.

A.Kutjanov, tuman Adliya boʻlimi
yetakchi  maslahatchisi.