SUDLAR FAOLIYaTIDA KARANTIN QOIDALARIGA QATʼIY AMAL QILINAYaPTI

Amudaryo tumani Iqtisodiy sudi pandemiya sharoitida oʻz ish faoliyatini  belgilangan talablar asosida olib borayapti.

Aytish kerakki, Oʻzbekiston Respublikasi Oliy sudi Rayosatining 2020-yil 20-martdagi “Oʻzbekiston Respublikasi sudlarida COVID-19 koronavirus infektsiyasi tarqalishining oldini olish toʻgʻrisida”gi Qaroriga asosan, sudlarda fuqarolarning shaxsiy qabuli, sud jarayonlari va sayyor sud majlislari vaqtincha toʻxtatilgan edi.

Maxsus komissiya qaroriga muvofiq 8-maydan boshlab, mamlakatimiz hududi “qizil”, “sariq” va “yashil” toifaga ajratilishi munosabati bilan 12-may kuni Oliy sud Rayosati yuqoridagi Qaroriga oʻzgartirish va qoʻshimchalar kiritdi. Bunga koʻra, “qizil” va “sariq” toifaga kiruvchi hududlardagi sudlarda fuqarolarning shaxsiy qabuli toʻxtatib turildi va murojaatlarni faqat elektron tarzda yoki pochta orqali yuborish tavsiya qilindi.

Bizning tumanimiz “yashil” toifaga kirganligi bois, sudlarning fuqarolarni qabul qilishi va barcha ishlarning belgilangan tartibda koʻrilishiga ruxsat berildi. Bunda faqat karantin qoidalariga qatʼiy amal qilish, yaʼni oraliq masofani saqlagan holda tibbiy niqob va antiseptik vositalardan foydalanib ish yuritilmoqda. Shuningdek, sud binolariga kirish-chiqish joylarida qatʼiy nazorat oʻrnatilib, tibbiy niqobsiz tashrif buyurgan, tana harorati 37 darajadan yuqori boʻlganlar binoga kirishi taqiqlanmoqda.

Tuman Iqtisodiy sudida shu yil 16-martdan 20-maygacha qoldiq daʼvo arizalar 11 ta, pandemiya davrida kelib tushgan arizalar 197 ta, jami 208 ta  daʼvo arizalar roʻyxatga olindi. Shuning 5 tasi yetarli asoslar taqdim etilmaganligi uchun koʻrib chiqish rad etildi va murojaatchiga oʻz muddatida bu haqda xabar qilindi, 29 tasi qabul qilinmasdan rad etildi. 111 ta daʼvo arizalar Iqtisodiy sud ish yurituviga qabul  qilinib, tegishli tartibda koʻrib chiqildi, 63 ta daʼvo ariza koʻrib chiqish uchun ish rejasiga kiritilgan.

Buningdek faoliyatni olib borishda xodimlarning karantin qoidalariga qatʼiy amal qilishi taʼminlanmoqda. Murojaatchilar, fuqarolardan ham bu tartibga amal qilish soʻralmoqda.

Fuqarolik ishlari boʻyicha Amudaryo tuman sudi ham pandemiya sharoitida belgilangan tartib-qoidalar asosida faoliyat yuritmoqda.

Shuni taʼkidlash kerakki, 2019-yilda tuman Iqtisodiy va Fuqarolik sudlari zamonaviy uslubda qurilgan, barcha sharoitlarga ega yangi binoga koʻchib oʻtganligi tufayli mazkur sudlar ish faoliyati uchun qulay sharoit yaratildi. Shuningdek, murojaat qiluvchilar uchun ham kutish joylari mavjud.

Karantin davrida, yaʼni shu yil 16-martdan 20-maygacha Fuqarolik ishlari boʻyicha Amudaryo tumani sudiga jami 177 ta daʼvo arizalar kelib tushgan, 184 ta qoldiq daʼvo arizalar bilan hisoblaganda ulardan 1 tasi tegishliligi boʻyicha boshqa sudga yuorildi, 9 tasi qabul qilinmasdan qaytarildi, 143 ta daʼvo arizalar sud ish yurituviga qabul qilinib, tegishli tartibda koʻrib chiqildi. 206 ta daʼvo arizalar esa koʻrib chiqilishi sud ish rejasiga kiritildi.

Mazkur sud binosida ham karantin qoidalariga qatʼiy amal qilinmoqda, qabulga kelgan fuqarolarning ham tibbiy niqobda, oraliq masofa saqlagan holda binoga kirib kelishi, kutib oʻtirishi taʼminlanmoqda. Qisqa qilib aytganda, tuman Iqtisodiy, Fuqarolik ishlari boʻyicha sudlari faoliyati sharoit taqozosiga koʻra tashkil etilib, tumanimizda sanitariya epidemiologik-osoyishtalik barqaror boʻlishi uchun harakat qilinmoqda.

O.RAJABOVA.