NORMATIV-HUQUQIY HUJJATLAR VA ULARNING LOYIHALARINI KORRUPTsIYaGA QARShI EKSPERTIZADAN OʻTKAZISh BOʻYIChA OʻQUV-SEMINAR TAShKIL ETILDI

Oʻzbekiston Respublikasi Prezidentining 2018-yil 13-apreldagi PQ-3666-sonli Qarori bilan tasdiqlangan “Oʻzbekiston Respublikasi Adliya vazirligi toʻgʻrisida”gi Nizomga koʻra, Adliya vazirligining asosiy funktsiyalaridan biri normativ-huquqiy hujjatlar loyihalarini, shuningdek, texnik jihatdan tartibga solish sohasidagi normativ hujjatlarni qonunchilikka, xalqaro shartnomalar normalariga, mamlakatda amalga oshirilayotgan islohotlarning maqsad va vazifalariga, qonunchilik texnikasi qoidalariga muvofiqligini, ularni korruptsiyaga, boshqa huquqbuzarliklarni sodir etishga shart-sharoit yaratuvchi, shuningdek jismoniy va yuridik shaxslar uchun ortiqcha maʼmuriy va boshqa cheklovlarni joriy etuvchi qoidalar va normalarni aniqlash nuqtai nazaridan huquqiy ekspertizadan oʻtkazish hisoblanadi.

Shu nuqtai nazardan kelib chiqib, tuman Adliya boʻlimi tomonidan mahalliy davlat hokimiyati organlari va davlat organlarining hududiy tuzilmalari uchun normativ-huquqiy hujjatlar va ularning loyihalarini korruptsiyaga qarshi ekspertizadan oʻtkazishning yangi tartibini tushuntirish boʻyicha oʻquv-seminar tashkil qilindi.

Oʻquv-seminar ishida tumanimizdagi mahalliy davlat hokimiyati organlari va davlat organlarining hududiy tuzilmalari mutaxassis-xodimlari ishtirok etdilar.

Oʻquv-seminar ishtirokchilariga tuman Adliya boʻlimi mutaxassisi Jamshid Bekimbetov “Normativ-huquqiy hujjatlar va ular loyihalarining korruptsiyaga qarshi ekspertizasini oʻtkazish tartibi toʻgʻrisida”gi Nizom talablari boʻyicha batafsil tushunchalar berdi. Shu bilan birga, ishtirokchilarga korruptsiyaga qarshi ekspertiza korruptsiyaga oid huquqbuzarliklar sodir etish imkoniyatini yaratadigan, korruptsiyani yuzaga keltiradigan omillarni aniqlash, loyihani qabul qilishning korruptsion holatlar uchun imkoniyat yaratadigan oqibatlarini umumiy tarzda baholash, normativ-huquqiy hujjatlarni qoʻllash jarayonida korruptsiya xususiyatiga ega tavakkalchiliklarning yuzaga kelish ehtimolini prognoz qilish, aniqlangan korruptsiyani yuzaga keltiruvchi omillarni bartaraf etishga qaratilgan tavsiyalar ishlab chiqish va choralar koʻrish maqsadida amalga oshirilishi aniq misollar asosida tushuntirildi.

Seminar ishtirokchilari oʻzlarini qiziqtirgan savollar bilan murojaat qildilar. Xususan, bolani maktabgacha taʼlim tashkilotiga qabul qilish boʻyicha shakllantiriladigan roʻyxatning shaffofligini taʼminlash, yer uchastkalarini ajratish jarayonida normativ-huquqiy hujjatlarni qoʻllash, turar joylar va noturar joylarni davlat roʻyxatidan oʻtkazish, yer, mulkka egalik munosabatlarini belgilash, shuningdek, vorislik hamda meros huquqlari yuzasidan berilgan savollarga tuman Adliya boʻlimi mutaxassisi Jamshid Bekimbetov batafsil javob berdi. Shu bilan birga, aynan ana shunday holatlarda korruptsiyaga qarshi ekspertiza oʻtkazish nafaqat fuqarolar, balki davlatimiz uchun ham korruptsion holatlarning oldini olishda muhim ahamiyatga ega ekanligini taʼkidladi.

Robiya YOʻLDOShEVA.