Jayxun ilhomlari

Beshta muhim tashabbus

Beshta muhim tashabbus,

Hammamizni uygʻotdi.

Mudrayotgan yoshlarni,

Hushyorlikka oʻrgatdi.

 

Ayollar faolligin,

Qizlarimiz ishonchin.

Umidlarin uygʻotdi,

Rejalarin oʻzgartdi.

 

Sportdagi yutuqlar,

Qoʻsha-qoʻsha sovrinlar.

Yutuqlarimiz – baxtimiz,

Yoshlar kelajagimiz.

 

Davlat siyosatida,

Ayollar muammosi.

Ishsizlikka chek qoʻyar,

Besh tashabbus gʻoyasi.

 

Gʻaflat bosma yoshlarni,

Yurakdan ishlash kerak.

Maʼnaviyat olamin,

Oʻqib boyitish kerak.

Zuhra AHMEDOVA.

 

Injiq yaproqcha

Oʻzbekiston atalmish,

Yurt bor ekan dunyoda.

Uning bogʻ-u rogʻlari,

Goʻzallikda ziyoda.

 

Qarang, kuz bogʻlarida,

Yaproqchalar toʻkilar.

Injiq shamollarida,

Bir-biri-la soʻzlashar.

 

Daraxtlardan yaproqlar,

Chirt-chirt uzilib tushdi.

Lekin bir injiq yaproq

Shoxlarni mahkam tutdi.

 

Doʻstlari unga aytar:

“Yur, biz bilan ket sen ham,

Hozir qolsang bu yerda,

Muzlab qolasan juda.

 

Erta bahor faslida,

Biz zoʻr oʻgʻit boʻlamiz.

Daraxtga jon bagʻishlab,

Kurtak boʻlib unamiz”.

 

Bahor fasli kelganda,

Yana sogʻlom oʻsdi bogʻ.

Oziqlanib xazondan,

Chamanzorga doʻndi bogʻ.

 

Yaproqcha esa karaxt,

Qishni daraxtda kutdi.

Qattiq shamol boʻldi-yu,

Uni uchirib ketdi.

 

Ana koʻrdingizlarmi,

Injiqning ahvolini.

Koʻrsam injiq bolani,

Oʻylayman barg holini.

Yorqinoy KENJABOYeVA, 11-maktab oʻquvchisi.

 

Sinfdoshlar

Sinfimiz juda ahil,

Barchaning bilimi har xil.

Bilimdon-u bilarvoy,

Sinfimiz doʻstlikka boy.

 

Iloji boʻlsa biz ham,

Urushib hech yurmaymiz.

Bir-birimiz yomonlab,

Nomlarini sotmaymiz.

 

Yigitlar-u qizlarjon,

Bir-biri bilan inoq.

Har kuni, har darsda,

Bari aqlli, quvnoq.

 

Sinfdoshlar juda shoʻx,

Biri doktor boʻlmoqchi.

Qizlarni qilsak soʻroq,

Dizaynerlikka xumor.

Aynura TURSUNBOYeVA,

55-sonli maktab oʻquvchisi.

 

Tuygʻular

Qish kelganda qishga oshiqmiz,

Qor yogʻsa-ku telba boʻlamiz.

Bahor kelsa bahorni sevib,

Gul iforin qoʻmsab qolamiz.

 

Zum oʻtmasdan xiyonat aylab

Yozni quchoq ochib kutamiz.

Goʻzal deymiz sayohat, taʼtil,

Dengizlardan baliq tutamiz...

 

Bir fasl bor, kuz uning nomi,

Xazon bosar izlarimizni.

Quvontirib keladi ammo

Yoshlab ketar koʻzlarimizni...

 

Qish keladi kiprik qoqquncha,

Hamma narsa oʻtkinchi goʻyo.

Fasllarning bari bevafo –

Odamlarning sevgisi roʻyo.

Komronbek Kamol.

 

VATAN UChUN

Vatanimning ishqida men,

Bedor boʻldim, bedor boʻldim.

Zarracha foydam tegmasa,

Bemor boʻldim, bemor boʻldim.

 

Gar Vatanni unutsam,

Beor boʻldim, beor boʻldim.

Insofi yoʻq insonlardan,

Bezor boʻldim, bezor boʻldim.

 

Kerak boʻlsa Vatan uchun,

Sarson boʻldim, sarson boʻldim.

Yurtim uchun kerakli bir –

Inson boʻldim, inson boʻldim.

Barno SAMANDAROVA,

35-sonli maktab oʻquvchisi.

 

Ustozlar va tillar

Oʻrganaman erinmay,

Oʻzbek tili oʻz tilim.

Guljahon ustoz nurday,

Yoritar goʻyo yoʻlim.

 

Koʻngil qoʻysam bariga –

Qoraqalpoq tiliga,

Qamajay ustoz goʻzal –

Soʻzlar qozoq tilida.

 

Qozoq, oʻzbek, rus tili,

Qoraqalpoq belgili.

Mehrimizni uygʻotar,

Ingliz va nemis  tili.

 

Tillarni oʻrganamiz,

Va dunyoni taniymiz.

Asem Maratova,

24-sonli maktab oʻquvchisi.

 

Osmon goʻzal

Osmon koʻm-koʻk. Bulutlar uchar,

Uchib, sayrab yuradi qushlar.

Quyosh esa dunyoni yoritar,

Nurlar bilan osmon goʻzal.

 

Oltin baliq

Oltin kabi yaraqlab,

Baliqcha suvda suzar,

Qanday tilaging boʻlsa,

Darrov bajo keltirar.

Elyor RAHIMOV,

30-sonli maktab oʻquvchisi.

 

Mening onam

Mening onam mehribon,

Dunyo ichra yagona.

Baxtimizga umringiz,

Boʻlsin doim ziyoda.

 

Ona aziz, moʻʼtabar,

Farzandlarim deb yashar.

Soʻnmas mehrin har qachon

Qilar bizga armugʻon.

Sevinch Otaniyozova,

30-sonli maktab oʻquvchisi.