Jamiyatning ilgʻor ayollari: sanʼatga oshno uyshinlik yoshlar ustozi

Soʻnggi yillarda mamlakatimizda aholi, ayniqsa, olis hududlarda istiqomat qiluvchi yurtdoshlarimizning madaniy dam olish sharoitlarini yaxshilash, namunali madaniy xizmat koʻrsatish darajasini oshirishga alohida eʼtibor qaratilmoqda. Ayniqsa, joylarda faoliyat olib boruvchi madaniyat markazlari xodimlari tomonidan turli bayram sanalari munosabati bilan xalqqa manzur koʻngilochar tadbirlar tashkil etilib, sanʼatga ixlosmand, alohida qobiliyatli yoshlarning oʻz iqtidorlarini namoyon qilishlari uchun zarur sharoitlar yaratib berilayotgani eʼtiborga molik.

Amudaryo tumanining Uyshin mahallasidagi Madaniyat markazi tomonidan ham yosh sanʼatsevarlar bilan ishlashish boʻyicha oʻziga xos tizim yaratilgan. Madaniyat markazida 2014-yilda raqs toʻgaragi rahbari sifatida oʻz faoliyatini boshlagan Palzada Ubbiniyozova atrofiga raqs sanʼatiga qiziquvchi yoshlarni toʻplab, ularni qobiliyatiga yarasha milliy-anʼanaviy va zamonaviy raqs guruhlariga boʻlib, astoydil shugʻullandi. Juda qisqa vaqt ichida uyshinlik raqqosa qizlar jamoasini shakllantirgan Palzada Ubbiniyozova oʻz raqs jamoasi bilan tuman miqyosidagi xalq tadbirlarining doimiy ishtirokchisiga aylandi.

Tashabbuskor va tinib-tinchimas Palzada Ubbiniyozovaga tuman madaniyat boʻlimi rahbariyati katta ishonch bildirib 2016-yilda Uyshin madaniyat markazi rahbarligiga tayinlashdi. Zimmasidagi chuqur masʼuliyatni his etgan Palzada Ubbiniyozova madaniyat markazi faoliyatini yanada jonlantirish maqsadida toʻgaraklar boʻyicha mashgʻulotlar uzviyligini taʼminlashga, toʻgaraklar aʼzolarining ota-onalari, mahalla ahli oʻrtasidagi hamkorlikni mustahkamlashga harakat qildi. Ayni paytda markazda milliy va anʼanaviy, zamonaviy raqs toʻgaraklari, milliy-anʼanaviy qoʻshiqchilik va estarada xonandaligi, shaxmat-shashka, sozandalik, rassomlik yoʻnalishlari boʻyicha toʻgaraklar faoliyat olib bormoqda.

Madaniyat markazi huzuridagi kutubxona esa hamisha kitobxonlar bilan gavjum boʻladi. Kutubxona aʼzolari orasida hududdagi 75-sonli va 18-sonli maktablarning oʻquvchi-yoshlaridan tashqari, ularning ota-onalari ham bor. Kutubxonada tez-tez oʻtkazilib, turiladigan “Uch avlod uchrashuvi”, “Mahallam – oltin ostonam”, “Shu aziz Vatan – barchamizniki!” kabi vatanparvarlik mavzusidagi tadbirlardan tashqari, “Eng bilimdon kitobxon”, “Eng yosh kitobxon”, “Eng namunali kitobxon oila”, “Milliy allalar” kabi koʻrik-tanlovlar, “Zakovat” bellashuvlari mahallada milliy-maʼnaviy qadriyatlarni yanada mustahkamlash, millatlararo totuvlik va bagʻrikenglik tamoyillarini hayotga keng tatbiq etish, bilimdon va salohiyatli yoshlar safini oshirishda muhim ahamiyat kasb etmoqda.

Qaysiki jamoada rahbar talabchan, tashabbuskor, fidoyi, eng muhimi, xalqparvar boʻlsa, oʻzi rahbarlik qilayotgan jamoa faoliyatining haqiqiy lakomotiviga aylanadi va jamoa oldiga qoʻygan marralarni albatta zabt etadi.

Tinib-tinchimas, serqirra faoliyat sohibasi Palzada Ubbiniyozovaning oʻzi toʻgarak aʼzolari boʻlgan uyshinlik yoshlarga ham ustoz, ham ibrat. U 2021-yilda oʻtkazilgan “Milliy alla” koʻrik-tanlovida tumanda birinchi oʻrinni egalladi va Qoraqalpogʻiston Respublikasi bosqichida sovrindor boʻldi. Shuningdek, tuman xotin-qizlari oʻrtasida 2021-yilda oʻtkazilgan shaxmat sporti musobaqalarida tumanda 1-oʻrin sohibasi, musobaqaning Qoraqalpogʻiston Respublikasi bosqichida “Gʻalabaga boʻlgan qatʼiy intilish” nominatsiyasiga ega boʻldi.

Ayni paytda Palzada Ubbiniyozovadan sanʼat sirlarini oʻrganayotgan uyshinlik yoshlar talaygina. Dilshodbek Toʻraboyev, Shodiyor Bekberganov, Behruz Achilov, Gulruh Abdullayeva, Sevinch Bozorboyeva, Gulshirin Gulmirzayeva, Sevinchoy Nurullayevalarning intilishlariga koʻrsatilayotgan ragʻbat va eʼtibordan ularning ota-onalari ham xursand.

Nafaqat Uyshin madaniyat markazi xodimlari, balki uyshinlik yoshlar ham Prezidentimizning 2022-yil 2-fevraldagi “Madaniyat va sanʼat sohasini yanada rivojlantirishga doir qoʻshimcha chora-tadbirlar toʻgʻrisida”gi Qarorini koʻtarinki kayfiyatda kutib oldilar. Qarorda taʼkidlanganidek, endilikda umumiy oʻrta taʼlim muassasalarida milliy musiqa cholgʻularidan kamida bittasida kuy ijro etish mahorati oʻrgatilishi kun tartibiga qoʻyilgani yoshlarning qalbiga quvonch bagʻishladi. Markaz rahbari Palzada Ubbiniyozova mazkur Qarorning mazmun-mohiyatini mahalla hududidagi umumtaʼlim maktablarining oʻquvchilariga tushuntirgach, markaz huzuridagi rubob cholgʻusi toʻgaragiga aʼzo boʻlishni xohlovchilar safi keskin oshdi. Yoshlarning talab va istaklaridan kelib chiqib, milliy cholgʻular boʻyicha toʻgaraklar sonini koʻpaytirish, xususan, dutor, nay, doira yoʻnalishlari boʻyicha toʻgaraklar faoliyatini yoʻlga qoʻyish rejalashtirilgan. Zero, Prezidentimiz aytganlariday: “musiqa va sanʼatga oshno boʻlib ulgʻaygan yoshlar qalbida vatanparvarlik, ezgulik tuygʻulari hamisha ustun boʻladi”.

Robiya YOʻLDOShEVA.