U JAMOAMIZNING FAXRI

Dunyoda shunday kasblar borki, rohatidan mehnati, muvaffaqiyatidan zahmati koʻp. Ustozu murabbiylarning fidoyi mehnatini ham shunga qiyoslash mumkin. Chindan ham bilim olib, kamolot choʻqqisiga yetishishimizda ushbu kasb sohiblarining mashaqqatli mehnatlari beqiyos. Ustoz-murabbiylarning qalb qoʻri ila bergan saboqlari tufayli unib-oʻsamiz, jamiyatda oʻz oʻrnimizni egallaymiz.

Yurtimizda oʻqituvchilarning mashaqqatli mehnatlari munosib qadr topmoqdi. Har yili Oʻqituvchilar va murabbiylar kunini umumxalq bayrami sifatida keng nishonlaymiz. Buni qarangki, yer yuzining kamdan-kam davlatlarida yurtimizdagi kabi ustozlar kasb bayrami dam olish kuni sifatida nishonlanar ekan. Bu ham ilmu maʼrifat fidoiylarining sharafli kasbiga boʻlgan yuksak eʼtibor va eʼtirof namunasidir.

Tumanimizdagi 2-son kasb-hunar maktabining tajribali oʻqituvchilaridan biri Galiya Yavqasheva ham oʻz kasbi tufayli ulugʻlikka erishgan ayol. U 32-yildan beri yosh avlodni Vatanga muhabbat, istiqlol gʻoyalariga sadoqat va milliy qadriyatlarimizga hurmat ruhida tarbiyalab kelmoqda.

Ish faoliyatini 1990-yilda 30-sonli umumtaʼlim maktabida boshlagan. Keyinchalik 1-sonli kechki maktab oʻqituvchisi, 8-sonli ixtisoslashtirilgan maktabi oʻqituvchisi, 3-son Akademik litsey oʻqituvchisi, “Grant Servis” tayyorlov oʻquv markazida rus tili oʻqituvchisi boʻlib ishlagan. 2020-yildan hozirgi kungacha Amudaryo tuman 2-sonli kasb-hunar maktabida rus tili fani oʻqituvchisi boʻlib ishlab,  oilada yaxshi uy bekasi, bolalariga mehribon ona, maktabda fidoiy oʻqituvchi sifatida tanilib kelmoqda.

Har yili koʻplab oʻquvchilari oliy oʻquv yurtlariga kirib, talaba boʻlib ustoziga rahmatlar olib kelmoqda.

Muhtaram Prezidentimiz farmoni bilan pedagog kadrlarni moddiy ragʻbatlantirish boʻyicha bir qator dasturlar ilgari surildi. Unga koʻra, endilikda chet tilidan milliy sertifikatga ega oʻqituvchilarning maoshiga 50 foiz qoʻshimcha ustama toʻlab beriladigan boʻldi. Unga koʻra, 2022-yil 1-sentyabrdan maktablarda umumtaʼlim fanlari boʻyicha tegishli darajadagi sertifikatga ega pedagog kadrlar oylik maoshiga qoʻshimcha ustama toʻlanmoqda.

Ustoz Galiya Yavkasheva joriy yilning 15-avgust kuni Toshkent shahridagi Rossiya davlatinig Rudn universiteti filialida test topshirib, xalqaro tan olingan sertifikatga ega boʻldi.

Oʻz ustida ishlab, mahoratini oshirayotgan va bilimlarini oʻquvchilarga chuqur oʻrgatishga intilayotgan Galiya Yavqasheva maktabimiz oʻqituvchilarining ham faxridir.

Jasur Otajonov, shu maktab direktori oʻrinbosari.