YuRT ISTIQBOLIGA DAXLDORLIK – ChINAKAM VATANPARVARLIKDIR

Bugun mamlakatimiz iqtisodiyoti mustahkam va barqaror rivojlanish bosqichiga koʻtarilib, aholining turmush farovonligi, hayot darajasi kun sayin yaxshilanmoqda. Xalqimizning dunyoqarashi va siyosiy-huquqiy faolligi ham shunga munosib ravishda yuksalib, odamlarimiz yurt taqdiriga daxldorlik, mamlakat taraqqiyoti va jamiyat ravnaqiga hissa qoʻshishdek masʼuliyat hissi bilan yashamoqda. Yurtdoshlarimiz mamlakatimiz hayotidagi muhim siyosiy jarayon – Oʻzbekiston Respublikasi Oliy Majlisi Qonunchilik palatasiga, Qoraqalpogʻiston Respublikasi Joʻqorgʻi Kengesi, xalq deputatlari viloyat, tuman va shahar Kengashlariga saylovlarda ishtirok etib, oʻz konstitutsiyaviy huquqi va fuqarolik burchlarini ado etib, munosib nomzodlarga ovoz berishga taraddud koʻrmoqdalar.

Saylovlar – kuchli fuqarolik jamiyatiga ega boʻlgan huquqiy-demokratik davlatning ajralmas belgisi, xalq irodasini namoyon qilishning asosiy shakli, fuqarolarning davlat va jamiyat ishlarini boshqarishdagi ishtirokidir.

Saylovlarni yuqori demokratik, adolatli printsiplarga mos ravishda oʻtkazish avvalo mamlakatda zarur qonunchilik bazasining mavjud boʻlishi, qolaversa, saylovchilar tomonidan ushbu qonunlarni yaxshi bilgan holda va ularning talablariga toʻla rioya etgan holda ushbu siyosiy jarayonda ishtirok etishlariga bogʻliq.

Avvalo shuni aytish kerakki, joriy yilgi saylovlar avvalgi saylovlardan tubdan farq qiladi. Chunki Prezidentimiz tomonidan taqdim etilgan mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish Kontseptsiyasi doirasida saylovga oid bir qator qonun hujjatlariga muhim oʻzgartishlar kiritildi.

Jumladan, "Saylov erkinligiyanada taʼminlanishiva saylov qonunchiligiyanada rivojlantirilishimunosabati bilan "Oʻzbekiston Respublikasi Oliy Majlisiga saylov toʻgʻrisida”gi hamda "Xalq deputatlari viloyat, tuman va shahar Kengashlariga saylov toʻgʻrisida”gi Oʻzbekiston Respublikasi qonunlariga oʻzgartirish va qoʻshimchalar kiritish haqida”gi Oʻzbekiston Respublikasining Qonuniga binoan saylov qonunchiligiga saylovoldi tashviqoti tushunchasi kiritildi hamda saylovoldi tashviqotini olib borish turlari, shakllari va usullari belgilandi. Bu – deputatlikka nomzodlar, siyosiy partiyalarga saylovoldi tashviqotini oʻtkazish borasida teng shart-sharoitlar yaratish samaradorligini yanada oshirishga xizmat qiladi.

Ushbu Qonun bilan kuzatuvchilarga Oʻzbekiston Ekologik harakatining Oʻzbekiston Respublikasi Oliy Majlisining Qonunchilik palatasi deputatlari saylovi boʻyicha Konferentsiyasida ishtirok etish huquqi berilgani esa Oʻzbekiston Ekologik harakatidan Oliy Majlis Qonunchilik palatasi deputatligiga saylovning ochiqligi hamda shaffofligi printsiplarini mustahkamlashning huquqiy mexanizmlarini takomillashtirishga qaratilgani bilan ahamiyatlidir.

Shuningdek, yuqoridagi Qonun bilan vaqtinchalik qamoqda saqlanayotgan fuqarolar uchun ham ovoz berish imkoniyati yaratildi hamda turli sabablarga koʻra saylov kuni oʻz yashash joyida boʻlish imkoniyatiga ega boʻlmagan saylovchining muddatidan oldin ovoz berish huquqi taʼminlandi.

Yana bir oʻzgartishga koʻra, joriy yilgi saylovlardan boshlab ovoz berish kuniga qadar uch kun ichida, shuningdek ovoz berish kuni jamoatchilik fikri soʻrovlari natijalarini, saylovnatijalari taxminlarini, oʻtkazilayotgan saylov bilan bogʻliq boshqa tadqiqotlarni chop etishga (eʼlon qilishga), shu jumladan ularni umumiy foydalanishdagi axborot-telekommunikatsiya tarmoqlariga (shu jumladan Internet jahon axborot tarmogʻiga) joylashtirishga yoʻl qoʻyilmasligi belgilab qoʻyildi. Ushbu normaning qonunchilikka kiritilishi saylovchilar huquqlarining yanada taʼsirchan himoya qilinishi, muayyan nomzodga gʻarazli munosabatda boʻlish, bu borada saylov qonunchiligi buzilishining oldini olish imkonini beradi.

Qolaversa, 2014-yil 17-apreldan kuchga kirgan "Oʻzbekiston Respublikasi Konstitutsiyasining ayrim moddalariga oʻzgartish va qoʻshimchalar kiritish toʻgʻrisida”gi Oʻzbekiston Respublikasining Qonuniga muvofiq Konstitutsiyamizning 117-moddasi Oʻzbekiston Respublikasi Markaziy saylov komissiyasi toʻgʻrisidagi bandlar bilan toʻldirildi. Unga koʻra, Oʻzbekiston Respublikasi Prezidenti saylovini, Oʻzbekiston Respublikasi Oliy Majlisiga saylovni, shuningdek Oʻzbekiston Respublikasi referendumini tashkil etish va oʻtkazish uchun Oʻzbekiston Respublikasi Oliy Majlisi tomonidan faoliyatining asosiy printsiplari mustaqillik, qonuniylik, kollegiallik, oshkoralik va adolatlilikdan iborat boʻlgan Oʻzbekiston Respublikasi Markaziy saylov komissiyasituziladi. Oʻzbekiston Respublikasi Markaziysaylov komissiyasioʻz faoliyatini doimiy asosda amalga oshiradi va oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasining saylov toʻgʻrisidagi hamda referendum toʻgʻrisidagi qonunlariga va boshqa qonunlarga amal qiladi.

Oʻzbekiston Respublikasi Markaziy saylov komissiyasiga konstitutsiyaviy organ maqomi berilishi saylovlarning yanada demokratlashuvini, ochiqligi va oshkoraligini har tomonlama taʼminlashning muhim kafolatlaridan biridir.

Bir soʻz bilan aytganda, mamlakatimiz Kons­titutsiyasiga va saylov toʻgʻrisidagi qonunlarga kiritilgan oʻzgartish va qoʻshimchalar milliy saylov tizimining demokratik huquqiy davlat va kuchli fuqarolik jamiyati barpo etish yoʻlida amalga oshirilayotgan tizimli islohotlar bilan oʻzaro uygʻun va hamohang ravishda yanada mustahkamlanishiga xizmat qiladi. Aynan shu jihatdan boʻlajak parlament va mahalliy Kengashlarga saylovlar avvalgilardan tubdan farq qiladi. Demak, joriy yilgi saylovlar jamiyatni yanada erkinlashtirish va demokratlashtirish jarayonidagi batamom yangi sharoitlarda oʻtkazilishi uchun barcha asoslar yetarli.

Fursatdan foydalanib, hurmatli yurtdoshlarimizga murojaat qilamizki, boʻlajak saylovlar – bu shunchaki siyosiy jarayon emas, yurtimizda muhtaram Yurtboshimiz boshchiligida amalga oshirilayotgan keng koʻlamli islohotlarni yanada jadallashtirish vositasi, kuchli davlatdan — kuchli fuqarolik jamiyati sari navbatdagi muhim qadamdir.

Vatanparvarlik tuygʻusi shaxsning yurt istiqboliga qay darajada daxldorligi bilan oʻlchanadi. Shunday ekan, keling, aziz yurtdoshlar, 21-dekabr kuni oʻtkaziladigan saylovlarda faol ishtirok etib, oʻz konstitutsion huquqimizni roʻyobga chiqarish orqali navbatdagi besh yillikda jamiyat taraqqiyoti surʼatini yanada jadallashtirib, yurt tinchligi va xalq farovonligi yoʻlida xizmat qiladigan, yurtdoshlarimizning ezgu orzu-intilishlarini oʻzida mujassam etadigan yangi-yangi gʻoyalarni hayotga tatbiq eta oladigan, amaliy ishlari bilan xalqimizning ishonchini qozona oladigan munosib nomzodlarga ovoz beraylik!

Rajabboy YOʻLDOShEV,

tuman hokimi.