Jayxun ilhomlari

Bayrogʻim

Vatanim osmonida,

Tinchlikka qasida.

Hilpiraydi bayrogʻim,

Tun-u kunlar osuda.

 

Bayrogʻimiz ramzida

Tariximiz bitilgan.

Oq, yashil, havo rangga,

Obodlik nuri singgan.

 

Toʻrt fasl – oʻn ikki oy –

Yulduzlarda mujassam.

Vatanga berib chiroy,

Qudratimiz anglatgan.

 

Samolarda hilpirab,

Turar yurtim bayrogʻi.

Kundan-kunga gurkirab,

Yashnar Vatan tuprogʻi.

 

Dunyolarni oralab,

Yuksalaver bayrogʻim.

Seni yurakka qadab.

Magʻrur turar urpogʻing!

Nigora YoʻldOsheva,

44-MTT tarbiyachisi.

 

Bolalikni qoʻmsab

Sirlashardik baʼzida,

Intilardik oʻqishga.

Biz harakat qilardik,

Faqat olgʻa borishga.

 

Doʻstlik nima – bildik biz,

Oqibatli boʻldik biz.

Izlanish va oʻqishni

Oliy maqsad qildik biz.

 

Shoʻxlik vaqti oʻtyapti,

Katta boʻlib boryapmiz.

Quvlashmachoq oʻynashga,

Biz kattalik qilyapmiz.

 

Oʻn toʻrtga toʻldik mana,

Koʻzlarga yosh olyapmiz.

Shoʻx-shodon bolalikni,

Biz endi qoʻmsayapmiz.

Rayhon Tojiboyeva,

50-maktab oʻquvchisi.

 

Otga minsa...

Baʼzilar otga minsa, unutar oʻzni,

Oʻylamay soʻzlaydi, aytmoqchi soʻzni.

Koʻrdim talaylarning yurganin

Yaqinin tanimay, yogʻ bosib koʻzni.

 

Ular oʻylamaydi, ertagi kunin,

Yuradi keltirib odamlar gʻashin.

Faqatgina oʻylar oʻzining nafsin,

Afsuslar chekar u vaqt kelib bir kun.

 

Kimdir oʻsgan sayin, mehrli boʻlar,

Biling, eng iymonli, vijdonli ular.

Dono va kamtar boʻlgani uchun,

El-xalqning undan koʻngli toʻlar.

 

Taqdiringda ne bor, sen bilmaysan,

Koʻngli toza boʻlsang, aslo kuymaysan.

Amal tegib, ulov minganing bilan,

Unutma sen – hamma bilan birdaysan.

 

Bir kun mingan oting qolganda oqsab,

Qolasan yakkalanib, moxovga oʻxshab.

Bir kuni oʻzingning boshingga tushar,

Yolvorib koʻmak soʻrash, asabing qaqshab.

 

Hamma ham odam-da, xuddi sen kabi,

Barchamiz unutma, Odam otaning nasli,

Nafsing tiyolmasang, teshilar tubi,

Kechagi sen uchun moy pishgan kuvi.

 

Mudom minmoq qiyin, amal otini,

Otdan birdan tushar, unutgan zotini.

Yoʻldan adashganning hech biri,

Hech qachon yorugʻ boʻlmagan yuzi.

Angsatbay Qarajanov, huquqshunos.

Qoraqalpoq tilidan Oygul Rajabova tarjimasi.

 

Farishta ayol

Nechun begʻuborsan ayt menga, ayol,

Qalbingning tubidan bergin bir sado.

Goho uzoq oʻylanib, suraman xayol,

Senga tushunolmay boʻlarman ado.

 

Shunchalar ham poksan, farishta ayol,

Yuragimni ezar faqat shu savol.

Aytgan har soʻzing ham chalgʻitar xayol,

Ming yillar, asrlar topmagin zavol.

 

Oʻylanaman goho, lek tushunolmam,

Qaydan bu jasorat, sabr-u matonat.

Sening sabring oldida taslimman, jimman,

Senga tushunolmay, yoʻqdir halovat.

 

Mehringni cheki yoʻq, xuddi bir dunyo,

Daryomas, dengizmas, har nedan ortiq.

Sening qalbing oldida qilarman hayo,

Sabring uchun qilaman jonimni tortiq.

 

Jannat gulidirsan, gulsan, chechaksan,

Iffating, odobing qilmasman qiyos.

Bogʻimda ochilgan gul-u rayhonsan,

Olamda tanhodir qalbing beqiyos.

 

Qalbimdagi soʻzlarim ifoda etib,

Soʻzim oxirida qilarman bayon.

Koʻzlaringga qarab, asta termulib,

Senga taʼzimdaman, ey nafis ayol.

Iroda Ollamberganova,

4-maktab oʻquvchisi.

 

OʻZBEKISTONIM

Latofat bogʻida bitgan chechaklar,

Ona yurt ishqidan olar naqshini.

Tovusning patidek momiq tilaklar,

Shu moʻʼjaz yurtimga chorlar baxshini.

 

Muborak yoshingni qutlamoq uchun,

Shaʼningga sheʼr yozmoq mening istagim.

Qalbimda chiqsa gar, yalt etib uchqun,

Ona Vatanimga tuhfa aylagum.

 

Shoirlik ilohiy tuygʻu sanalsa,

Vatan toʻlgʻogʻidan shoir tugʻilgan.

Shoirning oʻz dardi urgʻu sanalsa,

Tugʻilgan yerida shoir atalgan.

 

Dard bosgan yuraklar oʻtdi qanchalar,

Dardin yashirolmay qogʻozga bitib.

Hayhot, zamon dedi, xalqim dedilar,

Aytmaganlar ketdi ichiga yutib.

 

Ularning nolasi elning erkidir,

Hayot sarhadlari dostonga sigʻmas.

Yurtim, siymolaring koʻksing naqshidir,

Bugun quvonchlaring dillarga sigʻmas.

 

Ey ona maskanim, hokisor oʻlkam,

Dildagi bulbulim, tilda dostonim.

Ohular yayrasin bagʻringda shoʻxchan,

Ona beshikkinam – Oʻzbekistonim.

Odil ShOMURODOV.

 

Tinchlik madhi

O, Vatan osmoni, bunchalar yorugʻ,

Bunchalar musaffo, goʻzalsan, tiniq.

Shuning-chun orzuim manzili yorugʻ,

Kelajak atalgan yoʻllarim aniq.

Porlab tursin mangu tinchlik mayogʻi,

Olgʻa qadam tashlab olamiz ilm.

Eng buyuk qudratdir Vatan bayrogʻi,

Shul qudrat qoshida qilamiz taʼzim.

Besh muhim tashabbus dasturilamal,

Yuzaga chiqarar barcha imkonni.

Ahillik – qadriyat abadul-azal,

Birlashib quramiz, Oʻzbekistonni!

Sevinchoy Umrboyeva,

85-sonli maktab oʻquvchisi.

 

Buni hayot deydilar

(Oʻgʻlim Jasurbekning xotirasiga).

Buni hayot deydilar, gʻamlari koʻp, siri koʻp.

Kutilmagan tasodif, kulfatlarning turi koʻp.

Goho orzu ushalsa, ushalmagan yeri koʻp.

Azizlar, teng demanglar, qishning sovuq qori koʻp.

 

Yigʻlamagin ey koʻngil, buni hayot deydilar,

Shukur qilsang boriga, qanoatga sirdoshsan.

Sabr tagi sof oltin, farogʻatga yoʻldoshsan,

Tinglasangiz bulbulning navosida zori koʻp.

 

Unda, bardosh ber koʻngil, hayotning sinovi koʻp,

Taqdirning yozigʻi koʻp, ham berib, olari koʻp.

Sinovlarda toʻkilmay oʻtganni, Alloh siylar,

Men ham chidab yuribman, buni hayot deydilar.

Yangiboy Iskandarov, Oʻzbekiston qishlogʻi.

 

Qizimga

Allohimdan soʻradim, seni dilbandim,

Jajji qoʻlchalaringdan, aylanay oʻzim.

Tun-u kunlar asalim, umring tiladim,

Soʻylasang buncha shirin, soʻzlaring, qizim.

 

Erka qizim, oy qizim, dunyoyim mening,

Nuridiydam, dilbandim, koʻzim quvonchi.

Tushlarimda koʻrmagan quyoshim mening,

Tunlarimni yoritgan koʻnglim ovunchi.

 

Ovozingni eshitsam, yayrab ketaman,

"Bidir-bidir" soʻzlasang, qilaman huzur.

Kulgularingga umrim hadya etaman,

Ulgʻayib bir qiz boʻl, oqila, jasur.

Feruza Yoʻldosheva, Mangʻit shahri.