Kuz-qish mavsumiga tayyorgarlik koʻrish yuzasidan amalga oshirilgan ishlar tahlil qilindi
Avval xabar berganimizdek, kuz-qish mavsumi oldidan ovul va mahallalarda, ijtimoiy soha obʼektlarida hamda bir qator korxona-tashkilotlarda mavsumga tayyorgarlik koʻrish yuzasidan chora-tadbirlar, targʻibot-tushuntirish ishlari, energotejamkor uskunalar taqdimoti tashkil etilyapti. Amudaryo tumani hokimligi binosi oldida oʻtkazilgan shu kabi yigʻilishda ham kuz-qish mavsumiga tayyorgarlikni yanada kuchaytirish, fuqarolarning energotejamkor uskunalardan foydalanishlarini yoʻlga qoʻyish, aholining mavsumni betalafot oʻtkazishi uchun zaruriy choralarni koʻrish yuzasidan olib borilayotgan ishlar muhokama qilindi.
Tadbirda tuman hokim Sobir Xoʻjametov, sektorlar rahbarlari, hokim oʻrinbosarlari, joylardagi “Mahalla yettiligi” aʼzolari, tegishli korxona-tashkilotlar masʼullari ishtirok etishdi.
Tuman hokimi – fuqaro muhofazasi boshligʻi Sobir Xoʻjametov oʻz nutqida kuz-qish mavsumiga tayyorgarlik koʻrish ishlarini rejali amalga oshirish, mavsumni betalafot oʻtkazish va energiya resurslarini iqtisod qilish, oʻrganishlar davomida aniqlangan kamchiliklarni joyida bartaraf etish zarurligi, bu jarayonlarda har bir soha xodimi oʻz ishini yanada masʼuliyat bilan bajarishi lozimligi toʻgʻrisida fikr-mulohazalar bildirilib, masʼullarga tegishli topshiriq va tavsiyalar berdi.
Taʼkidlanganidek, kuz-qish mavsumi oldidan har bir korxona va tashkilot, ijtimoiy soha obʼektlari va xonadonlarning kommunal tarmoqlari koʻzdan kechirilib, tayyorgarlik ishlari qizgʻin pallaga kirgan. Xususan, aholi xonadonlari hamda sanoat korxonalarini sifatli va barqaror elektr energiyasi bilan taʼminlash, mavsumni betalafot oʻtkazish, yuzaga kelishi mumkin boʻlgan favqulodda holatlarning oldini olish yuzasidan tizimli ishlar olib borilmoqda.
Keltirilgan maʼlumotlarga koʻra, mavsum oldidan 4814ta aholi yashash hovli-uylari oʻrganib chiqilgan. Shundan 1901ta xonadonning isitish qozoni uy ichkarisida joylashganligi, 2458ta xonadonda esa isitish qozoni uy tashqarisida ekanligi maʼlum boʻlgan. Bundan tashqari, koʻp qavatli uylardagi 40ta xonadonda isitish qozonlari uy ichkarisida oʻrnatilgani aniqlangan. Oʻtkazilgan tadbirlar davomida xonadonlardagi 108ta isitish qozonlarining dudburonlari tozalangan. Xususan, 29-avgust kuni Yangiobod mahallasi hududidagi 34ta xonadonning isitish qozonlari va dudburonlari tozalanib, mavjud kamchiliklar bartaraf etilgan.
Maʼlumki, isitish qozonlari va dudburonlarni oʻz vaqtida tozalash orqali tabiiy va is gazidan zaharlanish hamda yongʻin kelib chiqishi kabi noxush holatlarining oldi olinadi. Tabiiy va is gazining ajralishi nostandart va nosoz gaz uskunalaridan foydalanish, talabga javob bermaydigan dudburonlarni oʻrnatish yoki ularni notoʻgʻri oʻrnatish, isitish qozonlari va dudburonlarni oʻz vaqtida tozalamaslik oqibatida sodir boʻladi.
Shuni ham alohida qayd etish joizki, tabiiy va is gazidan zaharlanish hamda yongʻin bilan bogʻliq koʻngilsiz hodisalarning asosiy qismi isitish qozonlari va dudburonlariga, shuningdek, gaz uskunalariga nisbatan eʼtiborsizlik ortidan kelib chiqmoqda.
Tadbir yakunida ijtimoiy soha obʼektlari, ayniqsa, maktab, maktabgacha taʼlim tashkilotlari va tibbiyot muassasalari hamda aholi xonadonlarining kuz-qish mavsumiga tayyorligini yarada kuchaytirish, aniqlangan kamchiliklarni joyida bartaraf etish boʻyicha muhim vazifalar belgilandi.
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
