Aholini ichimlik suvi bilan taʼminlash borasidagi ishlar yanada jadallashmoqda

Amudaryo tumanida Oʻzbekiston Respublikasi Prezidentining “Osiyo taraqqiyot banki ishtirokida “Oʻzbekistonning gʻarbiy qismida ichimlik suvi taʼminoti tizimlarini rivojlantirish” loyihasini amalga oshirish chora-tadbirlari toʻgʻrisida”gi qarori ijrosini taʼminlash borasidagi qurilish-taʼmirlash ishlari jadal surʼatlarda olib borilmoqda. Qaror asosida bank kredit mablagʻlari hisobidan Qoraqalpogʻiston Respublikasining Amudaryo, Beruniy, Qoraoʻzak, Qoʻngʻirot, Nukus va Moʻynoq tumanlaridagi aholi va xoʻjalik yurituvchi subʼektlarning sifatli ichimlik suvi taʼminotini yanada yaxshilash choralari koʻrilmoqda.

Xususan, Amudaryo tumanida Ozarbayjonlik Respublikasidan kelgan pudratchi tashkilot “Archico Engineering company” tomonidan 68,5 km magistral va 289,2 km ichki suv tarmoqlarini tortish ishlari jadal surʼatlarda davom etmoqda. 29 mln. AQSh dollari miqdoridagi mablagʻ evaziga amalga oshirilayotgan qurilish ishlari natijasida tuman hududida yashovchi 79 minga yaqin aholi toza ichimlik suvi bilan taʼminlanishi koʻzda tutilayotgan boʻlib, tumanning Choykoʻl, Tosh yop, Oʻrta qalʼa, Kuyuk koʻpir, Bobur nomli, Xitoy, Boʻz yop va Qilichboy ovullari, Bosuv, Arna boʻyi, Jumur ovul, Qizilcholi, Bogʻ, Xizr eli, Ayoqchi mahallalari hamda Mangʻit shahridagi barcha mahallalar hududlaridagi isteʼmolchilarning toza ichimlik suvi taʼminoti yaxshilanadi. Bugungi kunda qizgʻin pallada davom etayotgan qurilish ishlari nihoyasiga yetgach, tuman aholisining toza ichimlik suvi bilan taʼminlanganlik darajasi 80 foizga yetishi koʻzda tutilgan.

Oʻzbekiston Respublikasi Prezidentining yuqoridagi qarori asosida amalga oshirilayotgan qurilish ishlariga jami 100 nafarga yaqin quruvchilar, shu jumladan mahalliy ishchilar hamda 20 dan ortiq texnika jalb qilingan. Ayni paytgacha hududlarda jami 5 km magistral suv tarmoqlarini tortish ishlari yakunlangan boʻlib, quruvchilar jadal surʼatlarda ishlamoqdalar.

Taʼkidlash kerakki, soʻnggi yillarda mamlakatimizda suvdan oqilona foydalanish, uning sifati va xavfsizligini taʼminlash, shuningdek, suv isteʼmolini hisobga olishning zamonaviy innovatsion tizimlarini joriy etish choralari koʻrilmoqda. Natijada suvdan foydalanish, shu jumladan, suv taʼminoti va oqova suv tizimida qator samarali islohotlar amalga oshirildi. Bu islohotlarning barchasi xalq farovonligiga, inson manfaatlariga xizmat qilayotgani bilan ahamiyatlidir. Markazlashgan ichimlik suvi bilan taʼminlangan hududlar aholisi koʻp yillik orzularining ushalayotganini aytib, davlatimiz va hukumatimizga minnatdorchilik bildirishmoqda.

Xalqimizda suv keltirgan – elda aziz, degan naql bor. Tiriklik manbai, poklik, musaffolik ramzi boʻlgan suvni asrab-avaylash, uning har tomchisidan unumli va tejamkor foydalanish barchamizning burchimizdir. Zero, sogʻligʻimiz ham, umrimizning uzoq boʻlishi ham, eng avvalo, ichimlik suvining sifatiga bogʻliq. Mamlakatimizda aholini markazlashtirilgan ichimlik suvi bilan taʼminlash, oqova suv xizmatlarini yaxshilash, ichimlik suvi taʼminoti va oqova suv xizmatlari qamrovini oshirish boʻyicha amalga oshirilayotgan salmoqli ishlar shu maqsadlarga xizmat qilishi bilan ahamiyatlidir.

Charos Arslonova, tuman hokimligining Axborot xizmati rahbari.