Kanal va ariqlarni betonlashga bagʻishlangan seminar oʻtkazildi

Mamlakatimizda qishloq xoʻjaligini rivojlantirishda mavjud suv zaxiralaridan samarali foydalanishga katta eʼtibor qaratilmoqda. Suvning har qatrasini tejab, undan oqilona foydalanishni bugun hayotning oʻzi taqozo etmoqda. Qishloq xoʻjaligi ekinlaridan moʻl hosil olishda, ekin yerlarining meliorativ holatini yaxshilashda, ularning unumdorligini oshirishda suvning ahamiyati katta, albatta.

Qishloq xoʻjaligining boshqa sohalari qatori suv tizimi xodimlari uchun ham yilning toʻrt fasli birdek ish mavsumi hisoblanadi. Ayni kunda suv xoʻjaligi ishchi va mutaxassislari kuzgi-qishki tadbirlar doirasida ariq va kanallarni tozalash, ularni betonlashtirish ishlariga eʼtibor qaratib, shoʻr yuvish va kelgusi yilgi vegetatsiya mavsumi oldidan ekin maydonlarini suv bilan uzluksiz taʼminlashga zamin yaratmoqdalar. Sababi, dalalarning suvga boʻlgan talabi keskin kamaygan bugungi davr suv xoʻjaligi xodimlari uchun dolzarb ish mavsumi sanaladi. Aynan shu davrda ariq va kanallar hamda boshqa suv inshootlari tartibga keltiriladi, ularda taʼmirlash ishlari amalga oshiriladi.

Amudaryo tumanida ham suvni tejash, kanal va ariqlarda suv yoʻqotilishining oldini olish uchun xavzalarini betonlash ishlariga katta eʼtibor qaratilmoqda. Bu boradagi ishlarni yanada jonlantirish, suv isrofini kamaytirish uchun betonlashning ahamiyatiga urgʻu qaratish maqsadida tumanning Choykoʻl ovuli hududidagi “Xadaybergan Jabborovich” masʼuliyati cheklangan jamiyatiga qarashli hududda seminar oʻtkazildi.

Seminarda Qoraqalpogʻiston Respublikasi Joʻqorgʻi Kengesi Raisining suv xoʻjaligi masalalari boʻyicha maslahatchisi Murodboy Abdirov, Suv xoʻjaligi vaziri Baxtiyor Juzboyev, tuman hokimi Sobir Xoʻjametov, sektorlar rahbarlari, hokim oʻrinbosarlari, qishloq va suv xoʻjaligi sohalari masʼullari hamda fermerlar ishtirok etdilar.

Seminarda soʻzga chiqqanlar qishloq xoʻjaligi sohasi rivojida suv muhim ahamiyatga ega ekanligini, uni isrof qilmasdan, tejab ishlatish hamda mavjud suv zaxiralaridan samarali foydalanish bugungi kunning eng ustuvor vazifalaridan ekanligini taʼkidladilar. Qishloq xoʻjaligida suvdan samarali foydalanishda ariq va kanallarni betonlashtirish juda katta ahamiyatga ega ekanligi qayd etildi.

Aytish joizki, davlatimiz rahbari joriy yilning 7-oktyabr kuni suv va energiya resurslaridan oqilona foydalanish, shuningdek, qishloq xoʻjaligida yoʻqotishlarni kamaytirish chora-tadbirlariga bagʻishlangan yigʻilishda suv tanqisligi muammosining yagona toʻgʻri yechimi suvni tejovchi texnologiyalarni joriy etish va ariqlarni betonlash ekanligini qayd etib, bu boradagi ishlarni yanada jadallashtirish lozimligini taʼkidlagan edi. Yigʻilishda 2025-yilda bu maqsadga 800 mlrd soʻm yoʻnaltirilishi, betonlangan kanallarda suv oqimini tezlashtirish hisobiga kichik GESlar qurilishi qayd qilindi. Prezidentimiz oʻtgan davr mobaynida mamlakatimizda 550 kilometr kanal va ariqlar betonlangani evaziga 200 ming gektar maydonda suv taʼminoti yaxshilanganini, yiliga 450 million kub metr suv tejalayotganini taʼkidlab, fermer va klasterlar tomonidan ham 13 ming km ichki suv yoʻllari betonlanganini, bu ishlar kelgusida ham davom ettirilishini qayd etdilar.

Maʼlumot oʻrnida aytish joizki, Amudaryo tumanida 296,6 km uzunlikdagi xoʻjaliklararo kanallar, 1 ming 342 km ichki xoʻjalik kanallari mavjud. Suv resurslaridan oqilona foydalanish, kanallarda suv yoʻqotishlarni kamaytirish maqsadida tumanda 2024-2025-yillar kuz-qish mavsumida 40 km uzunlikda xoʻjaliklararo kanallarni, 300 km uzunlikda ichki xoʻjalik kanallarni betonlash rejalashtirilgan. Shu kungacha 0,25 km uzunlikda ichki xoʻjalik kanallari betonlangan boʻlib, bu boradagi ishlar uzluksiz davom ettirilmoqda. Seminarda ushbu yoʻnalishdagi ishlarni yanada jadallashtirish yuzasidan tegishli masʼullarga zarur koʻrsatma hamda tavsiyalar berildi.

Charos Arslonova, tuman hokimligining Axborot xizmati rahbari.