FUQAROLIK IShLARI BOʻYIChA AMUDARYo TUMAN SUDI SUDYaSI 6-SONLI MAKTABDA DARS MAShGʻULOTI OʻTKAZDI
Yangi tahrirdagi Oʻzbekiston Respublikasi Konstitutsiyasi xalqimizning Yangi Oʻzbekistonni bunyod etish yoʻlidagi orzu-intilishlari oʻz aksini topgan muhim hujjatdir. Shu sababli “Yangi tahrirdagi Oʻzbekiston Respublikasi Konstitutsiyasini amalga oshirish boʻyicha birinchi navbatdagi chora-tadbirlar toʻgʻrisida”gi Oʻzbekiston Respublikasi Prezidentining 2023-yil 8-maydagi Farmonida taʼlimni rivojlantirish ilmiy-metodik Markazi, Maktabgacha va maktab taʼlimi Vazirligi, Fan va innovatsiyalar Vazirligi, Adliya Vazirligi va boshqa manfaatdor idoralar bilan birgalikda 2023-2024 oʻquv yilidan boshlab barcha taʼlim turlari va bosqichlaridagi oʻquv rejalari va dasturlari qayta koʻrib chiqilishi, konstitutsiyaviy norma va qoidalarga moslashtirilishi belgilangan edi.
Shunga koʻra, umumtaʼlim maktablari oʻquvchilariga yosh xususiyatlarini hisobga olgan holda, Yangi tahrirdagi Konstitutsiyani oʻrgatish boʻyicha ham metodik asosda yangilangan darsliklar, oʻquv qoʻllanmalari, maxsus adabiyotlar yaratilib, taʼlim tizimiga keng joriy etildi.
Oʻsib kelayotgan yosh avlodning konstitutsiyaviy bilimini oshirishga qaratilgan bu kabi chora-tadbirlarni amalga oshirishda huquqni muhofaza qilish organlari xodimlarining ham ishtiroki taʼminlanayotgani esa oʻzining ijobiy natijasini bermoqda.
“Sudyalar tomonidan umumiy oʻrta taʼlim muassasalarida amaliy dars-mashgʻulotlarini oʻtkazish boʻyicha reja” asosida Fuqarolik ishlari boʻyicha Amudaryo tuman sudi tomonidan amalga oshirilayotgan maʼnaviy-maʼrifiy oʻquv mashgʻulotlari oʻquvchi-yoshlarning konstitutsiyaviy bilimlarini mustahkamlashda muhim ahamiyat kasb etmoqda. Ana shunday dars mashgʻulotlaridan biri tuman Maktabgacha va maktab taʼlimi boʻlimi tasarrufidagi 6-sonli maktabda ham oʻtkazildi.
Fuqarolik ishlari boʻyicha Amudaryo tuman sudi sudyasi Zebo Bazarbayeva tomonidan “Huquqbuzarlik va javobgarlik” mavzusida tashkillashtirilgan mazkur dars mashgʻulotida maktab oʻqituvchilari va yuqori sinflar oʻquvchilari ishtirok etdilar.
Dars mashgʻuloti jarayonida Zebo Bazarbayeva oʻquvchilarga “Yangi tahrirdagi Oʻzbekiston Respublikasi Konstitutsiyasini amalga oshirish boʻyicha birinchi navbatdagi chora-tadbirlar toʻgʻrisida”gi Prezident Farmonida belgilangan vazifalarning mazmun-mohiyati yuzasidan keng tushunchalar berib, har bir insonning, xususan, oʻquvchilarning konstitutsiyaviy burch va majburiyatlari boʻyicha hayotiy misollar orqali maʼlumotlar taqdim etdi.
Dars jarayonida Konstitutsiyada belgilangan yangi normalar, sudlarning erkinligi, jinoiy javobgarlikni belgilash, qamoqqa olish va fuqarolarning advokatlik xizmatlaridan foydalanish boʻyicha haq-huquqlari haqidagi moddalar boʻyicha batafsil tushuntirish bilan birga oʻquvchi-yoshlar zimmasidagi burch va majburiyatlariga ham alohida toʻxtalib oʻtildi.
Ayniqsa, huquqbuzarlik holatlari va ularni shaffof malakalash, javobgarlik belgilash, javobgar shaxsga nisbatan sodir etilgan huquqbuzarlik boʻyicha tegishli jazo choralarini qoʻllashda adolat tamoyillariga rioya etish, odil sudlovni amalga oshirish boʻyicha oʻquvchilar ishtirokida shartli sud jarayonlari oʻtkazilgani oʻquvchilarning konstitutsiyaviy va huquqiy bilimlarini oshirishda muhim ahamiyat kasb etdi.
Sudya tomonidan oʻtkazilgan dars mashgʻuloti oʻquvchilar uchun biri-biridan qiziqarli savol-javoblarga boy boʻldi va Amudaryo tuman fuqarolik ishlari boʻyicha sudi sudyasi Zebo Bazarbayevaga amalga oshirilgan qiziqarli dars mashgʻuloti uchun maktab maʼmuriyati tomonidan minnatdorchilik bildirildi.
Robiya Yoʻldosheva
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
