AMUDARYo TUMANIDAGI 80-SONLI MAKTABDA "VATAN TAYaNChI" OTRYaDI TUZILIB, OTRYaD AʼZOLARIGA KOʻKRAK NIShONLARI TOPShIRILDI

Mamlakatimizda yoshlarga oid davlat siyosatini izchil amalga oshirish, oʻsib kelayotgan yosh avlodni jismonan va maʼnan barkamol insonlar qilib voyaga yetkazish, ularni turli mafkuraviy xurujlar taʼsiriga tushib qolishlaridan asrab-avaylash borasidagi saʼy-harakatlar tufayli bugungi davr yoshlari oʻzlari tanlagan yoʻnalishlari boʻyicha samarali natijalarga erishmoqdalar. Chunki yoshlarga eʼtibor – millat kelajagiga eʼtibor, el-yurt osoyishtaligi va farovonligi yoʻlidagi mustahkam zamindir.

Oʻzbekiston Respublikasi Prezidentining 2022-yil 2-martdagi “Vatan tayanchi” bolalar va oʻsmirlar harbiy vatanparvarlik harakati faoliyatini tashkil etish toʻgʻrisida”gi Qarori mazmun-mohiyatida ham oʻsib kelayotgan yosh avlodni ona Vatan taqdiriga daxldorlik, maʼnaviy-axloqiy, milliy va umuminsoniy qadriyatlar hamda qonunlarimizga nisbatan yuksak hurmat ruhida tarbiyalash masalasi eng dolzarb va ustuvor vazifa sifatida belgilangan.

Prezidentimizning ushbu Qarorigi asosan Oʻzbekiston Respublikasi Mudofaa Vazirligi huzurida “Vatan tayanchi” bolalar va oʻsmirlar harbiy vatanparvarlik harakati faoliyatining yoʻlga qoʻyilgani natijasida umumtaʼlim maktablari oʻquvchi-yoshlari oʻrtasida ona Vatan himoyachisi boʻlishdek sharafli va masʼuliyatli kasbni tanlashga boʻlgan intilishlar yanada ortdi. Vatan taqdirini oʻz taqdiri deb bilish, el-yurt, mahallasi va oʻz oilasi obodligi va farovonligiga daxldorlik hissi bilan yashash tuygʻusi mazkur harakat aʼzolarining ezgu orzusiga aylandi.

Bu borada Yoshlar ishlari agentligining Amudaryo tuman boʻlimi, tuman Maktabgacha va maktab taʼlimi boʻlimi hamda Mudofaa ishlari boʻlimi bilan hamkorlikda amalga oshirilayotgan ishlar ham eʼtiborga molik. Ushbu tashkilotlarning hamkorlikdagi saʼy-harakatlari tufayli tumandagi umumtaʼlim maktablarining yuqori sinf koʻngilli oʻquvchilaridan iborat “Vatan tayanchi” otryadlari tashkil etilib, bu otryadlarning aʼzolariga “Vatan tayanchi” koʻkrak nishonlari tantanali ravishda topshirilmoqda.

Yaqinda tumandagi 80-sonli umumtaʼlim maktabida ham “Vatan tayanchi” otryadini tashkil etishga bagʻishlangan tadbir boʻlib oʻtdi. Tadbirda Amudaryo tumani Mudofaa ishlari boʻlimi boshligʻi, mayor Sh.Mamatov, Mudofaa ishlari boʻlimi boshligʻining tarbiyaviy va mafkuraviy ishlar boʻyicha oʻrinbosari Z. Saʼdullayev, 80-sonli umumtaʼlim maktabi direktori N.Siytboyev, mazkur maktabning chaqiriqqacha boshlangʻich taʼlim rahbari I.Yerdoshev hamda tumandagi umumtaʼlim maktablarining chaqiriqqacha boshlangʻich tayyorgarlik rahbarlari, 80-sonli maktabning yuqori sinf oʻquvchilari ishtirok etdilar.

Tadbir avvalida Amudaryo tuman Mudofaa ishlari boʻlimi boshligʻi, mayor Sh.Mamatov oʻquvchilarga “Vatan tayanchi” bolalar va oʻsmirlar harakatining vazifalari, ushbu harakat aʼzolariga beriladigan imtiyozlar xususida batafsil maʼlumotlar berdi.

Harakat aʼzolari vatanparvar, el-yurt taqdiriga daxldor, maʼnaviy-axloqiy jihatdan yetuk, jismonan va aqlan yuksak salohiyatli, mamlakatimiz qonunlarini chin dildan hurmat qiladigan, nafaqat oʻz oilasi, balki xalqining osoyishtaligi va farovonligi yoʻlida fidoyilik koʻrsatishga qodir insonlar boʻlishi zarurligi taʼkidlandi.

Shundan soʻng, “Vatan tayanchi” harakati aʼzolari boʻlish istagini bildirgan oʻquvchi-yoshlar bilan masʼullar oʻrtasida samimiy muloqot muhiti yaratilib, unda maktabning 10-sinf oʻquvchilari faol ishtirok etdilar va 10-sinfning koʻngilli oʻquvchilaridan iborat “Vatan tayanchi” otryadi tuzilib, otryad aʼzolariga maxsus koʻkrak nishonlari tantanali ravishda topshirildi.

Tadbir yakunida “Vatan tayanchi” otryadi aʼzolari boʻlgan yoshlar ustozlari va masʼullarga kelgusida ona Vatan taqdiriga daxldorlik hissi, milliy-maʼnaviy qadriyatlarimizga hamda mamlakatimiz qonunlariga qalblarida chuqur hurmat va ehtirom tuygʻulari bilan yashashga ahd qilganlarini izhor etdilar.

Robiya Yoʻldosheva.