Xorijiy tillarni bilish majburiyatmi yoki imkoniyat?
Bugungi kunda keng jamoatchilik tomonidan jahon tillarini, ayniqsa ingliz tilini, oʻrganish dunyo miqyosida rivojlanish imkoni sifatida eʼtirof etilmoqda. Biroq, xorijiy tilni faqat zarurat deb biladiganlar ham talaygina. Aslida-chi, qaysi nuqtai nazar haqiqatga yaqin?
Darhaqiqat, yurtimizda xorijiy tillarga boʻlgan talab va qiziqish tobora ortib bormoqda. Bu fikrning tasdigʻi sifatida bir qancha dalillarni keltirish mumkin. Xususan, xorijiy tilni bilish kasbiy rivojlanish va xalqaro maydonda erkin muloqot qilish uchun muhim omillardan biridir.
Zamonaviy dunyoda chet tilini bilgan inson ilmiy izlanishlar olib borish, xorijiy universitetlarga hujjat topshirish va xalqaro tashkilotlarda ishlash imkoniyatiga ega boʻladi. Shu sababli ham “Til bilgan – el biladi” degan naql bejiz aytilmagan.
Statistik maʼlumotlarda yurtimizdagi yoshlarning aksariyati xorijiy universitetlarga hujjat topshirayotgani qayd etilgan. Bu esa xalqaro taʼlim va kasbiy faoliyatda chet tillarining naqadar muhimligini yana bir bor isbotlaydi.
Masalaga boshqa tomondan yondashadigan boʻlsak, xorijiy tillarni oʻrganishga ehtiyoj asosan maʼlum sohalarga bogʻliq ekanini ham inkor etib boʻlmaydi. Masalan, IT va dasturlash sohalarida faoliyat yurituvchi mutaxassislardan odatda xorijiy til bilish talab qilinadi. Shuningdek, magistratura va doktorantura bosqichlariga qabul qilinish, yuqori lavozimlarga koʻtarilish uchun ham chet tillarini oʻrganish zaruratga aylanmoqda. Statistik maʼlumotlarga qaraganda, abituriyentlarning 60-65 foizi xorijiy til imtihoniga majburiy fan sifatida tayyorlanayotgan ekan.
Xulosa qilib aytganda, xorijiy til oʻrganish hozirgi kunning talabi va islohotlari taqozo etayotgan dolzarb masalalardan biridir. Ilmiy tadqiqot markazlarining maʼlumotlariga koʻra, til oʻrganayotganlarning 85,8 foizdan ortigʻi oʻz maqsadlariga erishish uchun buni zarurat deb biladi. Shunday ekan, qaysi sohada ishlashdan qatʼi nazar, xorijiy tillarni oʻrganish nafaqat shaxsiy rivojlanish, balki jamiyat taraqqiyotining ham muhim omili hisoblanadi.
Inobat Odilboyeva, 1-sonli maktabning ona tili va adabiyot fani oʻqituvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
