Ochiq darslar oʻqituvchi salohiyatini belgilaydi

Mamlakatimizda oʻrta maxsus, kasb-hunar taʼlimi tizimida yaratilgan shart-sharoitlar, har yili sohaga yoʻnaltirilayotgan yangi innovatsion loyihalar bugungi davr akademik litsey va kasb-hunar kolleji oʻqituvchilarini doimiy ravishda oʻz ustida ishlashga, oʻqib-izlanishga undashi tabiiy. Chunki, oʻz mutaxassisligi boʻyicha chuqur bilim va salohiyatga ega boʻlmagan, darslarida zamonaviy pedtexnologiyalardan unumli foydalanishning uddasidan chiqolmaydigan fan oʻqituvchisi Oʻzbekiston kelajagi boʻlgan barkamol avlodni tarbiyalashdek sharafli ishga aslo munosib emas. Shu bois, ayni kunlarda tumanimizdagi akademik litsey vakasb-hunar kollejlarida "Akademik litsey va kasb-hunar kollejlarida yangi innovatsion pedagogik texnologiyalardan foydalanish - hozirgi zamon bosh mezoni” mavzusida oʻquv-amaliy seminarlar oʻtkazilmoqda.

Oʻqituvchilarning kasbiy mahoratini oshirish, shuningdek, fan oʻqituvchilarining oʻquvchilar bilan ishlashishdagi oʻziga xos uslub va tajribalarini keng ommalashtirish hamda oʻqituvchi mehnatini maʼnaviy ragʻbatlantirish maqsadida oʻtkazilayotgan ana shunday oʻquvamaliy seminari Amudaryo xizmat koʻrsatish va servis kasb-hunar kollejida ham boʻlib oʻtdi. 9 ta fan yoʻnalishi boʻyicha ochiq dars shaklida oʻtkazilgan oʻquv-amaliy seminarida fizika, astronomiya, kimyo, tarix, informatika va axborot texnologiyalari, ingliz tili, tikuvchilik oʻquv amaliyoti, toʻquvchilik oʻquv amaliyoti, chilangarlik ishlari oʻquv amaliyoti, toʻquvchilik maxsus texnologiyasi fanlari boʻyicha tumanimizdagi akademik litsey va kasb-hunar kollejlaridan tashrif buyurgan oʻqituvchilar, ishlab chiqarish taʼlimi ustalari hamda oʻquv ishlari boʻyicha direktor oʻrinbosarlari ishtirok etishdi.

Shuni alohida qayd etish kerakki, 80 daqiqalik dars jarayonida fan oʻqituvchilari hamkasblarining oʻz mutaxassisliklari boʻyicha qay darajada bilim va salohiyatga ega ekanliklarini amalda koʻribgina qolmay, ilgʻor tajriba va dars oʻtish uslublari bilan yaqindan tanishdilar. Ochiq darslar yakunidan soʻng, Amudaryo qishloq xoʻjalik kasb-hunar kollejining oʻquv ishlari boʻyicha direktor oʻrinbosari, tajribali pedagog Bekbergan Yusupov rahbarligida tumanimizdagi akademik litsey va kasb-hunar kollejlarining direktor oʻrinbosarlari va fan oʻqituvchilari tomonidan darslar tahlil qilinib, natijasi qizgʻin muhokama etildi va gʻoliblar aniqlandi. Unga koʻra, toʻquvchilik oʻquv amaliyoti boʻyicha ishlab chiqarish taʼlimi ustasi Gulmira Xudoynazarova oʻtkazgan oʻquv-amaliy darsi 1-oʻringa munosib koʻrildi. Toʻquvchilik maxsus texnologiyasi fan oʻqituvchisi Qunduzoy Matyoqubova 2-oʻrin, kimyo fani oʻqituvchisi Dildora Avezova 3-oʻrin sohibalari boʻlishdi.

Gʻoliblar Oʻzbekiston Respublikasi Oliy va oʻrta maxsus taʼlim Vazirligi hamda Qoraqalpogʻiston Respublikasi Vazirlar Kengashining oʻrta maxsus, kasb-hunar taʼlimi boshqarmasi tomonidan 1-, 2-, 3-darajali diplomlar bilan taqdirlandilar.

Fan oʻqituvchilarining kasbiy malakalarini yanada oshirish, ilgʻor tajribalarni ommalashtirish, oʻz kasbiga fidoyi oʻqituvchilar mehnatini maʼnaviy ragʻbatlantirish maqsadida "Akademik litsey va kasb-hunar kollejlarida yangi innovatsion pedagogik texnologiyalardan foydalanish - hozirgi zamon bosh mezoni” mavzusida tashkil etilgan oʻquv-amaliy seminari tumanimizdagi akademik litsey va barcha kasb-hunar kollejlarida boʻlib oʻtmoqda.