Ijtimoiy buyurtma ijrosi amalda

"EKOSAN” xalqaro jamoat fondi oʻz Maqsadli dasturlarini samarali ijro etishda, keyingi yillardi oʻz Ustavi talablari doirasida, Oʻzbekiston Respublikasi Oliy Majlisi huzuridagi NNT va fuqarolik jamiyatining boshqa institutlarini qoʻllab–quvvatlash Jamoat fondi ajratgan loyihalarda faol ishtirok etib kelmoqda.

Oʻzbekiston Respublikasi Oliy Majlisi huzuridagi Jamoat fondi "EKOSAN” fondiga «Keksalarni eʼzozlash yili»Davlat dasturini amalga oshirish maqsadida, yurtimizda keksalarga gʻamxoʻrlik koʻrsatish va eʼtiborni kuchaytirish orqali ularning hayot darajasi va sifatini oshirishga, jamiyatimizda tinchlik, totuvlik va barqarorlik muhitini mustahkamlashga munosib hissa qoʻshgan, sogʻlom va barkamol unib-oʻsayotgan avlodni tarbiyalashda faol ishtirok etayotgan keksa avlod vakillarini har tomonlama qoʻllab-quvvatlash boʻyicha keng koʻlamli chora-tadbirlarni tizimli asosda amalga oshirish boʻyicha Davlat dasturining 21-, 33-bandlarini amalga oshirishga koʻmaklashishga qaratilgan "Muruvvat uylarida yashovchi qariyalarga koʻrsatiladigan xizmatlar sifati va darajasini yuksaltirish” Davlat ijtimoiy buyurtmasi loyihasini ishonib topshirdi. Bu vazifa, Oʻzbekiston Respublikasi Mehnat va aholini ijtimoiy muhofaza qilish vazirligi, Oʻzbekiston Respublikasi Tabiatni muhofaza qilish davlat qoʻmitasi koʻmagida amalga oshirilmoqda.

Mazkur loyihaning maqsadlari, vazifasi, ayniqsa, ijrosi boʻyicha amalga oshirilayotgan ishlar haqida mazkur loyiha rahbari, "EKOSAN” Xalqaro jamoat fondi Boshqaruvi raisi oʻrinbosari Komiljon Joʻrayev bilan suhbat qildik.

2015 yil 29-iyul kuni ”Yoshlar ijod saroyi”da, Oʻzbekiston Respublikasi Oliy Majlisi huzuridagi NNT va fuqarolik jamiyatining boshqa institutlarini qoʻllab-quvvatlash Jamoat fondi, Oʻzbekiston NNT Milliy Assotsiatsiyasi, Yoshlar tashabbuslari Markazi va "EKOSAN” Xalqaro jamoat fondi tomonidan "Nodavlat notijorat tashkilotlari faoliyati ochiqligi va shaffofligini taʼminlash – kuchli fuqarolik jamiyati shakllanishining muhim omilidir” mavzusida tashkillashtirilgan davra suhbati doirasida Mazkur ijtimoiy buyurtma taqdimoti oʻtkazildi.

Tadbirda, shuningdek, ekologiya yoʻnalishida faoliyat yurituvchi NNTlar va davlat tashkilotlari hamda OAV vakillari ishtirok etdilar.

- Ijtimoiy buyurtmaning amalga oshirish muddati 12 oy (2015-2016-yillarga) belgilangan mazkur Loyiha uchun byudjetdan 140,0 mln. soʻm ajratilgan, loyiha amaliyotiga jalb qilingan mablagʻlar tarkibini "EKOSAN” fondining qoʻshimcha 25.0 mln. soʻm hamda hamkorlarning nomoddiy mablagʻlari ham tashkil qiladi

Mazkur Ijtimoiy buyurtma asosida quyidagi asosiy ijtimoiy muammo qoʻyilgan:

- Davlatimiz eʼtibori natijasida, yillar mobaynida, mamlakatimiz hududlarida, samarali faoliyat yuritib kelayotgan keksalar va nogironlar yashayotgan "Sahovat” va "Muruvvat” uylari faoliyatini qoʻllab-quvvatlashga, bugun, eʼtiborni oshirish talab etiladi. Maʼlumki, respublikamizning ekologik nomaqbul, choʻl va togʻ zona hududlarida joylashgan "Muruvvat” va "Sahovat” uylarida kuz, qish oylarida, hanuz, elektr energiyasi uzilishlari yuz bermoqda. Ushbu maskanlarda keksa nogironlar istiqomat qilishini inobatga olinsa, bu holat koʻpgina salbiy oqibatlarga olib kelishi mumkin. Ushbu maskanlarda yashovchi qariyalarni ish joylari - (mehnat terapiyasi) bilan taʼminlash ham dolzarb masala boʻlib qolmoqda.

 Demak, mazkur loyiha ijrosidan maqsad: viloyatlardagi tanlangan "Muruvvat” va "Sahovat” uylariga quyosh texnologiyalari asosida fotoelektr stantsiyalar va quyosh suv isitish kollektorlarini oʻrnatish, "Muruvvat” uylarida sogʻlom turmush tarziga oid madaniy maʼrifiy tadbirlar va seminarlar oʻtkazish, maqsadli plakat va broshyuralar nashr qilish, mehnat terapiyasi uchun xizmat qiluvchi ish joylarini tashkil qilish, xayriya yordamlari koʻrsatilishi orqali muammolarning yechilishiga erishishdan iborat.

Alohida qayd etishjoizki, 2015-yilning sentyabridan 2016-yilning oktyabr oylariga belgilangan mazkur Loyihaning, «Keksalarni eʼzozlash yili» Davlat dasturi vazifalarini amalga oshirish, keksalar, avvalambor, 1941-1945-yillardagi urush va mehnat fronti faxriylarini manzilli ijtimoiy himoya qilish va qoʻllab-quvvatlashni kuchaytirish, yoshi ulugʻ insonlar, ayniqsa, yolgʻiz qariyalar va nogironlarga koʻrsatiladigan ijtimoiy va maishiy xizmatlar roʻyxatini kengaytirgan holda, ularni farovon va munosib turmush sharoitlari bilan taʼminlashga hissa qoʻshish doirasidagi vazifalar boʻyicha, bugungi kungacha quyidagi ishlar amalga oshirildi:

- Jizzax viloyati Zomin "Muruvvat” nogironlar uchun ayollar internat uyi, Fargʻona viloyati Qoʻqon "Muruvvat” nogironlar uchun erkaklar internat uyi, Qashqadaryo viloyati Yakkabogʻ "Sahovat” nogironlar uchun internat uylariga jami 79,3 mln. soʻmlik Quyosh texnologiyalari asosida, 3 ta fotoelektrik stantsiyalar va 3 ta suv isitish kollektorlari "Muruvvat” uylarini muntazam elektr energiya hamda issiq suv bilan taʼminlash maqsadida oʻrnatildi. "Eko-energiya” markazi tomonidan Quyosh fotoelektrik stantsiya va suv isitish kollektorlaridan foydalanish va unumli ishlatish maqsadida, "Muruvvat” uylari tomonidan belgilangan nazorat qiluvchi shaxslar maxsus oʻqitilgach, foydalanishga topshirildi.

Mazkur loyiha doirasida "EKOSAN” fondi tomonidan "Muruvvat” uylarida yashovchi ayollar uchun foydali ish joylari tashkillashtirish, mehnat terapiyasi orqali ularni mehnatga jalb qilish maqsadida, jami 19,2 mln. soʻmlik 14 ta sanoat va maishiy tikuv mashinalari xarid qilinib, xayriya sifatida topshirildi.

Loyiha doirasida Qoraqalpogʻiston Respublikasi Xoʻjayli "Muruvvat” nogironlar uchun ayollar internat uyi va Chimboy "Muruvvat” nogironlar uchun erkaklar internat uylarida Quyosh texnologiyalari asosida fotoelektrik stantsiyalar va Quyosh suv isitish kollektori oʻrnatilish ishlari olib borilmoqda.

Tibbiy xizmat koʻrsatish darajasi va sifatini oshirish, yuqumli kasalliklarning oldini olish boʻyicha Qoʻllanma va plakatlar hamda qayta tiklanuvchi muqobil energiya manbalaridan foydalanish boʻyicha Qoʻllanma tayyorlanmoqda.

Shuningdek, nodavlat notijorat tashkilotlari va bir qator davlat organlari, mahalliy hokimiyatlar bilan ijtimoiy sheriklik asosida, "Muruvvat" uyilarida madaniy-maʼrifiy va xayriya tadbirlarini tashkil qilish boʻyicha muzokaralar olib borilmoqda.

Mazkur ijtimoiy buyurtma talablari doirasida rejalashtirilgan ishlar tartibli olib borilmoqda va bu haqda mahalliy ommaviy axborot vositalari orqali muntazam yoritishga erishilmoqda.

Suhbatni Mirkarim Mirsovurov olib bordi.