“ASKAR ONASI BOʻLISh – BAXT”, – deydi toʻlqinlik Bibisora Qoʻchqorova

Farzandlarining odobli, mehrli, yurt koriga kamarbasta boʻlib ulgʻayishini istamaydigan ota-ona bormi? Ularning yaratgandan soʻraydigan eng oliy tilagi ham farzandlariga uzoq umr, baxt-iqboldir. Farzand kamoli, baxti, ota-onaning eng ulugʻ martabasi-saodatidir.

"Toʻlqin” ovulida istiqomat qiluvchi Bibisora opa Qoʻchqorova ana shunday qutlugʻ kunlarga yetishgan tabarruk onaxonlarning biri.

U 1950-yilda shu ovulda tugʻildi. Oʻrta maktabni  tugatib, Toshkentdagi qishloq xoʻjaligi institutini pillachilik agronomi mutaxassisligi boʻyicha tugatdi va 45-yildan beri shu sohada samarali mehnat qilib kelmoqda.

Bibisora opa ovuldoshi Bozorboy Erdoshev bilan turmush qurib, bir qiz, besh oʻgʻilni munosib farzandlar qilib voyaga yetkazishdi. Qizi Manzura onasi  izdoshi, Ilhom Erdoshev maktabni tugatib, Samarqanddagi oliy harbiy avtomobil qoʻmondonlik-muhandislik bilim yurtini tugatib, dastlab shu yerda ishlab qoldi, keyinchalik Nukusda faoliyatini davom ettirdi. Hozirgi kunda Jizzaxda, podpolkovnik darajasiga yetdi. Keyingi oʻgʻil ham muddatli  harbiy xizmatini oʻtaganidan soʻng, shartnoma asosida shu sohada ishlab qoldi, serjant. Oʻtgan  yili harbiy xizmat vazifasini ado etishdagi fidoyiligi, matonati uchun "Sodiq xizmatlari uchun” medali bilan taqdirlandi. Ikromjon fermer xoʻjaligi ishchisi, Qurbonboy ham Ilhom akasi oʻqigan oliy harbiy bilim yurtini muvaffaqiyatli tugatib, shu sohada xizmat qilayapti, podpolkovnik. Kenjatoy oʻgʻil Bahodir ona kasbini tanladi, pillachilik agronomi.

Afsuski bunday kunlarni koʻrish oila sardori Bozorboy akaga nasib etmadi. Otasi vafot etganida Ilhom oliy harbiy bilim yurtini tugatib, oʻz sevgan sohasida endigina xizmatini boshlagan kunlar edi.

Ilhom xizmat vazifasini aʼlo darajada oʻtash bilan bir qatorda onasiga suyanchiq boʻldi, ukalarining ham hayotda oʻz oʻrinlarini topishiga yoʻl-yoʻriq koʻrsatdi.

Bibisora Qoʻchqorova hozir besh kelinning qaynonasi. Halol va fidoyi mehnatlari evaziga 1999-yilda "Shuhrat” medali bilan taqdirlandi.

- Otasi bilan farzandlarimizning yurtimizga halol  va sodiq xizmat qilib, bugungiday kunlarga yetishishini orzu qilganmiz. Xudoga shukr, niyatlarimiz ushaldi, farzandlarimning kamolidan kuch-quvvat olib, 66 yoshimda hamon men ham safdaman, oʻz sohamda  ishlayapman, - deydi Bibisora opa shukronalik bilan.

– Askar onasi, bir-yoʻla uch askarning onasi boʻlish – ulkan baxt. Bu baxtni u har bir soniyada – osuda otgan tonglarda, yurtimizning betashvish, emin-erkin kunlarida his qilib yashaydi. Farzandlarining onam, deb evrilib turishlari, ardoqlashlari, el-yurtimizning uch askarlar onasi, deya sharaflashlaridan kuch-quvvat oladi.

Onaxon erishgan bu martaba har bir inson havas qilgulik.

Yurtimizda 14-yanvar – Vatan himoyachilari kuni keng nishonlanayotgan ushbu farahli kunda Bibisora opani bayram bilan qizgʻin qutlab, doimo sogʻ-salomat boʻling, deymiz.

Oygul RAJABOVA.

Suratda: Bibisora Qoʻchqorova.