YIL YaKUNLARI VA YaNGI REJALAR

Shu yilning  15-yanvar kuni tuman hokimligining katta majlislar zalida tumanda onalik va bolalikni muhofaza qilish, xotin-qizlar va voyaga yetmaganlar bilan ishlashish boʻyicha 2015-yil davomida olib borilgan ishlar va 2016-yil – "Sogʻlom ona va bola” yilidagi vazifalarga bagʻishlangan kengaytirilgan yigʻilish boʻlib oʻtdi.

Yigʻilishda tuman hokimligi mutaxassislari, tibbiyot birlashmasi xodimlari, umumtaʼlim maktablari direktorlari, akademik litsey hamda kasb-hunar kollejlarining maʼnaviyat va maʼrifat ishlari boʻyicha direktor oʻrinbosarlari, tumandagi OFY va MFYlarning diniy maʼrifat va maʼnaviy-axloqiy tarbiya masalalari boʻyicha maslahatchilari, huquqni muhofaza qilish organlari xodimlari, jamoat tashkilotlari rahbarlari, diniy idora vakillari va ommaviy axborot vositalari xodimlari ishtirok etdilar.

Yigʻilishni tuman hokimining birinchi oʻrinbosari B.Ernazarov ochdi va olib bordi.

Yigʻilish kun tartibiga beshta muhim masala havola etildi.

Kun tartibidagi "Oʻzbekiston Respublikasi Prezidentining 2014-yil 1-avgustdagi "2014-2018-yillarda Oʻzbekistonda aholining reproduktiv salomatligini yanada mustahkamlash, onalar, bolalar va oʻsmirlar sogʻligini muhofaza qilish borasidagi Davlat dasturi toʻgʻrisida”gi PQ-2221-sonli qarori ijrosini taʼminlash boʻyicha 2015 yilda tumanda olib borilgan ishlar hamda 1 yoshgacha boʻlgan goʻdaklar va 14 yoshgacha boʻlgan bolalar oʻlimi holati tahlili, 2016-yildagi vazifalar toʻgʻrisida”gi masala boʻyicha tuman tibbiyot birlashmasi boshligʻi O.Halimov, maktabgacha va maktab yoshidagi bolalarni chuqurlashtirilgan tibbiy koʻrikka toʻliq jalb etish, bolalarni, ayniqsa, qiz bolalarni jismoniy tarbiya va sportga jalb etishning  bugungi holati va bu borada taʼlim muassasalari xodimlari oldida turgan vazifalar, maktab oʻquvchi-yoshlari davomati, ular oʻrtasida huquqbuzarlik va jinoyatchilikning oldini olish borasida olib borilayotgan ishlar hamda IIB xizmat xonasi va militsiya tayanch punktlari tomonidan olib kelingan bolalar bilan amalga oshirilgan ishlar haqida tuman XTMFMTTEB mudiri A.Qoʻshayev, kasb-hunar kollejlari oʻquvchi-yoshlarining davomatini yaxshilash, ular oʻrtasida huquqbuzarlik va jinoyatchilikning, turli yot oqimlar va axborot xurujlariga berilib ketishning oldini olish borasida mutasaddi tashkilotlar va mahalla faollarining hamkorlikdagi  vazifalari toʻgʻrisida "Mahalla” xayriya jamoat fondi tuman boʻlinmasi raisi R.Roʻzmetov, tumanda 2015 yil davomida onalik va bolalikni muhofaza qilish, xotin-qizlar va voyaga yetmaganlar bilan ishlashish borasida olib borilgan ishlar tahlili, 2016-yildagi vazifalar, aholining tibbiy madaniyatini oshirish, ayniqsa, homilador ayollarning sogʻligini, oilada ularga boʻlgan munosabat masalasiga alohida eʼtibor qaratgan holda nazoratga olish, bu borada tibbiyot xodimlari bilan birgalikda taʼlim muassasalari, jamoat tashkilotlari, ayniqsa, ovul va mahalla faollari hamkorligini yanada yaxshilash borasidagi dolzarb vazifalar toʻgʻrisida tuman hokimi oʻrinbosari, xotin-qizlar qoʻmitasi raisi M.Ahmedovalar maʼruza qildi hamda yigʻilish kun tartibidagi masalalar boʻyicha atroflicha toʻxtalib, yil davomida erishilgan yutuqlar bilan birga yoʻl qoʻyilgan xato va kamchiliklar, yechimini kutayotgan muammolar yuzasidan qimmatli fikrlar bildirishib, yoʻl-yoʻriqlar koʻrsatdilar.

Shuningdek yigʻilishda yana bir muhim masala – Oʻzbekiston Respublikasi Vazirlar Mahkamasining sogʻlikni saqlash, ekologiya va atrof-muhitni muhofaza qilish masalalari boʻyicha komissiyasining 2015-yil 25-dekabrdagi 14-15-8-sonli xati ilovasi bilan yuborilgan  "Oʻz joniga qasd qilish sabablari va uning oldini olishga qaratilgan idoralararo komplekslar chora-tadbirlar rejasi” ijrosini taʼminlash boʻyicha  tibbiyot, taʼlim, jamoat tashkilotlari, mahalla faollari va diniy tashkilotlar oldida turgan vazifalar toʻgʻrisida tuman hokimi oʻrinbosari, xotin-qizlar qoʻmitasi raisi M.Ahmedovaning maʼruzasi ham tinglandi.

Kun tartibidagi masalalar yuzasidan muzokaralarda tuman IIB voyaga yetmaganlar oʻrtasida huquqbuzarlik va jinoyatchilik, nazoratsizlik profilaktikasi inspektori, mayor J.Xolmurodov, "Yusuf Eshon bobo” jomeʼ masjidi imom-xatibi A.Matsafoyevlar ishtirok qildilar hamda koʻrilgan masalalar boʻyicha oʻz fikr-mulohazalarini bildirdilar.

Yigʻilish yakunida koʻrilgan barcha masalalar boʻyicha tegishli qarorlar qabul qilindi.

Tuman hokimligining axborot xizmati.