HAShAR UYuShQOQLIK BILAN OʻTKAZILDI

Navroʻz umumxalq bayramini munosib nishonlashga tayyorgarlik koʻrish, xalqimiz orasida milliy qadriyatlarmizga xos boʻlgan oʻzaro mehr-oqibat va hamjihatlikni yanada kuchaytirish, begʻaraz yordam, mehr-muruvvat kabi ezgu fazilatlarni yuksaltirish, mahallalar va aholi turar joylarini obodonlashtirish va koʻkalamzorlashtirish, tumanimizning barcha hududlarida sanitariya holatini yaxshilash hamda "Sogʻlom ona va bola yili” Davlat dasturida koʻzda tutilgan vazifalar ijrosini  taʼminlash maqsadida 12-13-mart kunlari mamlakatimiz boʻylab umumxalq xayriya hashari oʻtkazildi.

Hashar munosabati bilan mahallalar, aholi punktlari, koʻp qavatli binolar va hovlilar atrofi, xiyobonlar, ziyoratgohlar va qabristonlar, ariqlar, koʻcha va yoʻlaklar hamda bolalar maydonchalari tartibga keltirildi. Barcha turar joylarda daraxtlarni oqlash va butash ishlari amalga oshirildi.

Umumxalq hasharida tumanimiz boʻyicha 172082 nafar aholi, shundan 107184 nafar yoshlar ishtirok etdilar. Hashar kunlari 192 gayer obodonlashtirildi, 332 tonnadan ortiq maishiy va qurilish chiqindilari chiqarib tashlandi, 140 kilometrdan ortiq ariq va lotoklar tozalandi, 45 ta qabristonlar va 1 ta ziyoratgoh obodonlashtirildi, 49276 tupdan ortiq manzarali, 30 ming tupdan ortiq mevali, 31 ming donadan ortiq gul koʻchatlari ekildi. 105 mingdan ortiq daraxtlarga shakl berilib, oqlandi.

"Mahalla” xayriya jamoat fondi tuman boʻlinmasi boshqaruvining qarori bilan "Mustaqilligimizning 25 yilligiga 25 tup koʻchat va qalamchalar – mening tuhfam” shiori ostida aktsiya oʻtkazilib, unda tumanimizning 47 ta ovul va mahallalarida yashovchi yurtdoshlarimiz faol qatnashmoqda.

Oldindin ishlab chiqilgan reja asosida har bir fuqarolar yigʻinlaridagi taʼlim muassasalarida taʼlim-tarbiya olayotgan 8000 nafardan ortiq kasb-hunar kollejlari va 14000 nafardan ortiq maktablarning 5-9-sinflari oʻquvchi-yoshlarining har biri 25 tupdan tol, terak, jiyda kabi daraxt qalamchalarini tayyorlab, belgilangan hududlarga ushbu qalamchalarni ekish orqali mustaqilligimizning 25 yillik bayramini munosib kutib olishga oʻz ulushlarini qoʻshmoqda.

Shuningdek, fuqarolar yigʻinlari hamda kasb-hunar kollejlari va umumtaʼlim maktablari bilan hamkorlikda sinf, guruh rahbarlari boshchiligida "Yordamchi guruhlar” tuzilib, hashar kunlari tumanimiz yoshlari 500 nafardan ortiq yakka-yolgʻiz, kam taʼminlangan oilalar hovli-joylarini obodonlashtirish ishlariga yaqindan yordam berdilar.

Bundan tashqari, umumxalq xayriya hashari munosabati bilan fuqarolar yigʻinlari hududidagi jami 90 ta kam taʼminlangan, ijtimoiy himoyaga muhtoj oilalarga, yakka yolgʻizlarga, yetim, nogiron va boquvchisini yoʻqotgan, koʻp bolali oila farzandlariga homiylar hamda fuqarolar yigʻinlari tomonidan muruvvat  va sahovat yordamlari koʻrsatildi.

Rustam ROʻZMETOV,

"Mahalla” xayriya jamoat fondi tuman boʻlinmasi raisi, xalq deputatlari tuman Kengashi deputati.