Tuman aholisiga MUROJAAT

Agrosanoat majmuasi xodimlari kasaba uyushmasi, "Mahalla” xayriya jamoat fondi, Oʻzbekiston Yoshlar ittifoqi tuman Kengashlari, tuman Xotin-qizlar qoʻmitasi va Fermerlar Kengashining tumanimiz aholisiga 

                                MUROJAATI

Hurmatli yurtdoshlar!

Mana, 26-yildirki mustaqil taraqqiyot yoʻlidan dadil odimlayotgan Oʻzbekistonimiz bugun tom maʼnoda oʻzgarish va yangilanishlar maydoniga aylandi. Muhtaram Prezidentimiz Birlashgan millatlar tashkilotining yaqinda boʻlib oʻtgan 72-sessiyasidagi nutqida taʼkidlaganidek, "... Bugungi kunda Oʻzbekiston jadal rivojlanmoqda. Biz ajdodlarimizning donishmandlik anʼanalariga amal qilib, teran anglagan holda, qatʼiy islohotlarni amalga oshirmoqdamiz, mamlakatimizning yangi qiyofasini shakllantirish yoʻlidan bormoqdamiz. Jamiyatimizda siyosiy faollik ortib bormoqda, barcha sohalarda chuqur islohotlar amalga oshirilmoqda”.

Davlatimiz rahbari va Hukumatimizning xalq manfaatini oʻylab, odamlarning dardu tashvishilarini, muammolarini hal qilish yoʻlidagi xayrli ishlari har bir yurtdoshimizning ertangi kunga ishonchini oshirmoqda. Bundan ruhlangan hamyurtlarimiz ahillik va hamjihatlikda ish olib borib, oʻz mehnati, bilim va tafakkuri bilan Vatanimiz taraqqiyotiga yanada katta hissa qoʻshishga chogʻlanmoqda.

Bugun – dehqonlarimiz yil boʻyi qilgan mashaqqatli mehnatining mahsuli xirmonga toʻplanadigan qizgʻin pallada bu hamjihatlik har qachongidan ham muhim ahamiyatga ega.

Sababi paxtakorlarimizning 5-6 oylik mashaqqatli mehnati evaziga yetishtirilgan hosil, agar qisqa fursat ichida yigʻishtirib olinmasa, kuzning yogʻin-sochinli kunlarida nobud boʻlishi mumkin.

Qadrli ovul va mahalla ahli!

Bir-birovga yordam berish, qoʻllab-quvvatlash, qiyin-qistovli kunlarda mahalladoshlarimizning, qishloqdoshlarimizning yonida turib, ularga kamarbasta boʻlish xalqimizga azaldan bobomeros qadriyatdir. Bugun bobodehqonlarimiz peshona teri evaziga yetishtirilgan "oq oltin” bepoyon dalalarda, Siz azizlarning gʻayrat va shijoatingizni kutib yotibdi. Iqtisodiyotimizning asosi boʻlgan "oq oltin”ni yogʻin-sochinli kunlarga qoldirmay, yigʻib-terib olishda paxtakor-dehqonlarga yaqin koʻmakdosh boʻling!

Unutmangki, Sizning bugungi xolisona yordamingiz ertangi kunimiz farovonligi, dasturxonlar toʻkinligi, farzandlar salomatligi va barkamol insonlar boʻlib voyaga yetishishida benihoya katta ahamiyat kasb etadi.

Bugun kechagidan, ertaga bugungidan ham samaraliroq mehnat qilishga, hashar damlarining har bir lahzasidan moddiy va maʼnaviy manfaatdor boʻlishga intiling! Sizning bu intilishingiz tumanimizning yuksak "oq oltin” xirmonini bunyod etish yoʻlidagi eng sharafli harakat ekanligini aslo unutmang! 

Aziz va muhtarama onaxonlar, qadrli opa-singillar!

Milliy urf-odat va udumlar, qoʻni-qoʻshnichilik qadriyatlari Siz, azizlarning har bir xatti-harakatingizda, oʻzbekona tutumlaringizda aks etib turishini barchamiz yaxshi bilamiz. Ayniqsa, Sizlarning feʼlingizga xos bu goʻzal fazilatlar, har yilgi paxta yigʻim-terimi davrida, oʻzaro hamjihatlik va mehr-oqibat timsoli boʻlgan hashar nomi bilan yanada ulugʻlik kasb etadi.

Oilalarimiz ustuni, charogʻboni boʻlgan koʻpni koʻrgan onajonlar!

Sizlarning farzandlar tarbiyasidagi mehnatsevarlik, oʻzaro hamjihatlik va mehr-oqibatga yoʻgʻrilgan katta hayot tajribangiz bugun beliga etak bogʻlab, paxtakorlarga yordamga chiqayotgan har bir oʻgʻil-qizga, yurtdoshlarimizga kuch va madad ekanligini unutmang!

Oʻz vaqtida, sifatli terib olingan har bir kilogramm paxta nuroniylarimizning pensiya va nafaqalarini, byudjet tashkilotlari ishchilarining oylik ish haqlarini oʻz vaqtida olishlari, ijtimoiy sohaning ravnaq topishi, el-yurt obodligi uchun katta  hissa boʻlishini farzandlarimizga ham tushuntirib, ularni ham yigʻim-terim ishlarida qatnashishga chaqiring!

Ertangi kun bunyodkorlari boʻlgan aziz yoshlar!

Siz – buyuk kelajagimiz egalarisiz! Sizni har tomonlama qoʻllab-quvvatlash davlatimiz siyosatining asosini tashkil qiladi. Shu maqsadda Prezidentimiz tashabbusi bilan Oʻzbekiston Yoshlar ittifoqi tashkil qilindi. Agar Siz vaqtincha ishsiz yurgan boʻlsangiz, Yoshlar ittifoqining faol yoshlari safiga qoʻshiling! Tashkilot tomonidan tuzilgan "Fidoyi yoshlar otryadlari”ga aʼzo boʻlib, tengqurlaringiz bilan doʻstlashish, suhbatlashish va fikr almashish imkoniyatini qoʻldan boy bermang! Yigʻim-terim ishlarida qatnashib, faol mehnatingiz bilan Yoshlar ittifoqi va homiy tashkilotlarning qimmatbaho sovgʻalariga ega boʻling! Daromad topib, oilangiz farovonligiga va yurtimiz taraqqiyotiga hissa qoʻshing!

Eng muhimi, Sizning kamolga yetib, komil insonlar boʻlishingiz uchun yetarli sharoit yaratayotgan, imkoniyat eshiklarini ochayotgan davlatimizning chaqirigʻiga mehnatingiz bilan munosib javob qaytaring!

Qadrli yurtdoshlar!

Ota-bobolarimiz shu muqaddas zaminda asrlar boʻyi bir-biriga doʻst-birodar boʻlib, quvonch-u tashvishini birga baham koʻrib yashab kelishgan. Ajdodlarmiz anʼanalariga sodiq qolgan holda siz ham bugun oʻz oʻrningizni paxta dalasida deb bilib, dehqonlarimizga shu qiyin-qistovli kunlarda yelkadosh boʻlasizlar, yetishtirilgan hosilni yigʻishtirib olishga hissangizni qoʻshasizlar, deb ishonamiz. Oʻzini shu yurtning farzandi, deb bilgan har bir kishining oʻrni bugun dalada! Yurt koriga yarash, elga kamarbasta boʻlish esa haqiqiy vatanparvarlikdir!