Amudaryoda Qoraqalpogʻistonda birinchilardan boʻlib chigit ekish ishlari boshlab yuborildi

Mavzuga oid fotogalereya

Har yili bahor yaqinlashishi bilan shu yilgi hosil uchun chigit ekish ishlariga puxta hozirlik koʻriladi. Amudaryo tumanida ham Prezidentimizning 2018-yil 28-fevraldagi “2018-yilda qishloq xoʻjaligi ekinlarini oqilona joylashtirish chora-tadbirlari va paxta yetishtirishning prognoz hajmlari toʻgʻrisida”gi qarori asosida  tuman hokimining tegishli qarori qabul qilinib, shu asosda ekishga tayyorgarlik koʻrildi.

Tumanda 2018-yil hosil uchun 511 fermer xoʻjaliklari tomonidan jami 15 550 gektar maydon chigit ekishga  ajratildi. Bu yil 3075 gektar maydonga “S-47-27”  10 800 gektarga “Sulton”, 1675 gektarga esa yangi “Buxoro-102” va “Buxoro - 8” navlarini ekish rejalashtirildi. Mazkur yilda paxtaga ajratilgan yer maydonlarining 4970 gektariga qoʻshqator usulida, 10580 gektarida esa qator orasi 60 sm sxemalarida chigit ekiladi.

Ayni paytda ekishga zarur boʻlgan 1450 tonna urugʻlik chigit dorilanib, mavsumga tayyor holatga keltirildi. Yangi navlar urugʻligi uchun 118 tonna chigit boshqa viloyatdan olib kelib tayyorlandi. Urugʻlik chigitlarni fermer xoʻjaliklariga yetkazib berilishini taʼminlash uchun 16 ta chigit tarqatish shoxobchalari tashkil etildi. Chigit ivitish uchun 250 ta oʻra mavsumga tayyor qilib qoʻyildi.

Chigit ekish mavsumini uyushqoqolik bilan oʻz vaqtida, sifatli olib borish maqsadida tajribali mutaxassisilar, xoʻjalik faollari boshchiligida chigit ekish otryadlari tuzildi. Ekish otryadlariga zarur texnika va mexanizmlar biriktirildi. Shuningdek, har bir otryadga koʻchma taʼmirlash ustaxanalari ham biriktirildi va 220 mln. soʻmlik ehtiyot qismlari zahirasi yaratildi.

Chigit ekish uchun sarflanadigan urugʻlik, yoqilgʻi, mineral oʻgʻitlar, mexanizatsiya xizmatlari, ish haqlari va boshqa xarajatlar uchun 15 mlrd. 225,8 mln. soʻm sarflanishi hisob-kitob qilingan.

Chigit ekish texnikalari uchun zarur boʻladigan 1458 tonna yoqilgʻi moylash materiallari deyarli tayyor qilib qoʻyildi. Mavsumda ishtirok etadigan 211 dona chigit ekish seyalkalarining har biriga oʻrtacha bir kunda 7-7,5 gektardan yer maydoni toʻgʻri keladi. Shuningdek, mavjud 195 dona haydov traktorlarining har biriga kuniga oʻrtacha 10-11 gektar maydon toʻgʻri kelib, jami ajratilgan yer maydonlaridagi haydash va ekish ishlarini qisqa fursat ichida tugatish moʻljallanmoqda.

23-mart kuni tumanning Qilichboy ovulidagi “Pajabov Omonboy” fermer xoʻjaligida  oʻtkazilgan koʻrgazmali  seminar bilan chigit ekish ishlari boshlab berildi. Koʻrgazmali seminarda tuman hokimi S.Yoʻldashev, sektorlar rahbarlari, qishloq xoʻjaligi korxonalari mutasaddi rahbarlari ishtirok etdilar.

Bugun yerga qadalgan chigitlardan parvarish yaxshi boʻlsa, albatta, ertaga moʻl hosil yigʻib olamiz. Moʻl hosildan bunyod boʻlgan xirmonlar davlatimiz  iqtisodiyoti yuksalishida salmoqli oʻrin tutadi. Iqtisodi rivojlangan yurt ahli esa farovon turmush kechiradi.

O.Xudoyberganova.