Tuman hokimi sessiyada hisobot berdi

24-mart kuni tuman hokimligida xalq deputatlari Amudaryo tumani Kengashining 44-sessiyasi boʻlib oʻtdi.

Maʼlumki, Oʻzbekiston Respublikasi Konstitutsiyasi va “Mahalliy davlat hokimiyati toʻgʻrisida”gi Qonunning tegishli moddalariga asosan viloyat, tuman, shahar hokimining hisoboti tegishli xalq deputatlari Kengashining viloyat, tuman, shaharning oʻtgan yildagi ijtimoiy-iqtisodiy rivojlanishi yakunlari va joriy yilga moʻljallangan ijtimoiy-iqtisodiy dasturning eng muhim ustuvor yoʻnalishlariga bagʻishlangan majlisida, yaʼni sessiyasida eshitilishi belgilangan.

Xalq deputatlari Amudaryo tuman Kengashi Reglamentining 46-moddasiga asosan, hokimning hisobotini eshitishda xalq deputatlari tuman Kengashining raqobatlashayotgan partiya guruhlari rahbarlaridan biri sessiyaga raislik qiladi, deb belgilangan.

Tuman Kengashidagi raqobatdosh siyosiy partiyalar deputatlik guruhlari rahbarlarining yigʻilishining qaroriga asosan, xalq deputatlari tuman Kengashining navbatdagi – 44-sessiyasiga raislik qilish Oʻzbekiston Xalq demokratik partiyasining deputatlik guruhi rahbari Maqsud Saʼdullayevga topshirildi.

Sessiya kun tartibiga 9 ta dolzarb masalalar kiritildi.

Kun tartibidagi birinchi masala, yaʼni Amudaryo tumanining 2017-yildagi ijtimoiy-iqtisodiy rivojlanishi yakunlari va 2018-yilga moʻljallangan ijtimoiy-iqtisodiy dasturning eng muhim ustuvor yoʻnalishlari boʻyicha tuman hokimi Sultonboy Yoʻldashev hisobot berdi.

Hisobotda taʼkidlanganidek, 2017-yilda tumanda sanoat mahsulotlarini ishlab chiqarish hajmi 220,6 mlrd soʻmga yetib, oʻtgan yilga nisbatan oʻsish surʼati 121,2 foizni tashkil qilgan. Shuningdek, xalq isteʼmol mollarini ishlab chiqarish hajmi 88,5 mlrd soʻmni, qishloq xoʻjaligi mahsulotlarini ishlab chiqarish hajmi 339,3 mlrd soʻmni tashkil qilgan.

2017-yil tuman Maqsadli dasturlari ijrosi boʻyicha jami 38 mlrd 923 mln soʻmlik 250 ta loyihalar amalga oshirilib, 885 ta yangi ish oʻrinlari yaratildi, ularga esa 23 mlrd 386 mln soʻm tijorat banklari kreditlari ajratildi. Tumanning tashqi savdo aylanmasi 2017-yilda 6 mln 607 ming AQSh dollarani tashkil qildi.

Hisobotda iqtisodiy va ijtimoiy dasturlarni amalga oshirish, yangi ishi oʻrinlarini yaratish, tadbirkorlikni rivojlantirish boʻyicha amalga oshirilgan ishlar va kelgusidagi rejalar haqida batafsil maʼlumotlar berildi.

Kun tartibidagi masala boʻyicha siyosiy partiyalar vakillari, doimiy komissiyalar aʼzolari, deputatlar hamda muassasa, korxona va tashkilotlar rahbarlari soʻzga chiqib, fikr-mulohazalarini bildirdi. Tuman hokimining hisobotini muhokama qilish yakunlari boʻyicha, shuningdek doimiy komissiya xulosasi va partiya guruhlari fikr-mulohazalarini inobatga olgan holda xalq deputatlari tuman Kengashining qarori qabul qilinib, hokim va mahalliy ijroiya hokimiyati organlari ishining samaradorligiga qoniqarli deb baho berildi.

Shuningdek, sessiyada 2017-yil davomida jinoyatchilik va qonuniylikning ahvoli hamda bu borada tuman prokuraturasi tomonidan amalga oshirilgan ishlar yuzasidan tuman prokurori Fahriddin Sabirovning, Voyaga yetmaganlar va yoshlar oʻrtasida huquqbuzarlik va jinoyatchilikning oldini olish, profilaktika inspektorlari ishlarini samarali tashkil etish va muvofiqlashtirish boʻyicha olib borilayotgan ishlar yuzasidan tuman ichki ishlar boʻlimi boshligʻining yoshlar masalalari boʻyicha oʻrinbosari Aziz Qurboniyazovning hisoboti tinglandi. Hisobotlarda oʻtgan davr mobaynida tumanda jinoyatchilik va huquqbuzarliklarning oldini olish boʻyicha amalga oshirilgan ishla, bu borada yoʻl qoʻyilgan kamchiliklar va ularni bartaraf qilish boʻyicha chora-tadbirlar xususida soʻz yuritildi.

Sessiyada tuman mahalliy byudjetining 2017-yildagi ijrosi ham koʻrib chiqildi. Bu masala yuzasidan tuman moliya boʻlimi mudiri Baxtiyor Kamolov hisobot berdi. Deputatlarga mahalliy byudjetning daromadlar rejasining bajarilishi, byudjet xarajatlarining sarflanishi boʻyicha batafsil maʼlumot berildi.

Kun tartibidagi beshinchi, yaʼni Xalq deputatlari tuman Kengashi, Kengash doimiy komissiyalari va Kengash deputatlarining 2017-yildagi faoliyati natijalari toʻgʻrisidagi masala yuzasidan tuman Kengashining Reglament va deputatlik odobi masalalari boʻyicha doimiy komissiyasi raisi Xonimjon Rajabova hisobot berdi. Hisobotda oʻtgan yili tuman Kengashi, Kengash doimiy komissiyalari va deputatlar tomonidan amalga oshirilgan ishlar haqida maʼlumot berilib, Kengash va doimiy komissiyalar faoliyatini yanada jonlantirish, deputatlarning faolligini yanada oshirish boʻyicha tavsiyalar berildi.

Sessiyada Oʻzbekiston Respublikasi Oliy Majlisi Senatining va Qoraqalpogʻiston Respublikasi Joʻqorgʻi Kengesining qarorlari bilan deputatlarni moddiy va maʼnaviy ragʻbatlantirish boʻyicha nizomlar tasdiqlangan hamda tuman Kengashlariga Kengash deputatlarini ragʻbatlantirish boʻyicha “Adolatli deputat”, “Xalqparvar deputat”, “Mehnatkash deputat” va “Fahriy deputat” nomlarini berish tartibi yuzasidan tuman Kengashining nizomi va komissiya tarkibi hamda shu masala boʻyicha Kengash qarori loyihasi muhokama qilindi.

Shuningdek, Oʻzbekiston Respublikasi qonun hujjatlari va xalqaro mehnat standartlariga muvofiq fuqarolarning kafolatlangan mehnat huquqlarini taʼminlash boʻyicha tumanda amalga oshirilayotgan ishlar yuzasidan tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Alisher Yuldashevning axboroti tinglandi.

Kun tartibidagi navbatdagi masala, yaʼni Amudaryo tumanida maktabgacha taʼlim sohasida amalga oshirilayotgan ishlar yuzasidan ham tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Alisher Yuldashev hisobot berdi. Hisobotda maktabgacha taʼlim muassasalari faoliyatini jonlantirish, bolalarni maktabgacha taʼlim muassasalariga qamrab olish koʻrsatkichlarini yaxshilash, bogʻchalar binolarini qurish va taʼmirlash boʻyicha rejalashtirilayotgan ishlar xususida ham maʼlumotlar berildi.

Sessiyada Qoraqalpogʻiston Respublikasi Joʻqorgʻi Kengesi Raisining ikkita farmoyishi - “Anvar Yuldashevni Amudaryo tumani hokimining oʻrinbosari – qishloq va suv xoʻjaligi boʻlimi boshligʻi lavozimiga tayinlash toʻgʻrisida”gi va “Rashid Salayevni Amudaryo tumani hokimining investitsiyalar, innovatsiyalar, xususiylashtirilgan korxonalarga koʻmaklashish va kichik sanoat zonalari hamda turizmni rivojlantirish masalalari boʻyicha oʻrinbosari lavozimiga tayinlash toʻgʻrisida”gi farmoyishi deputatlar tomonidan tasdiqlandi.

Kun tartibidagi barcha masalalar boʻyicha fikr va mulohazalar inobatga olinib, tuman kengashining tegishli qarorlari qabul qilindi. Shuning bilan sessiya oʻz ishini yakunladi.

Gʻ.Yeshniyozov