Amudaryoda gʻalla oʻrim-yigʻimiga qanday tayyorgarlik koʻrilmoqda?

Joriy yil hosili uchun Amudaryo tumani boʻyicha 398 ta fermer xoʻjaliklarining jami 3000 gektar yeriga gʻalla ekilgan edi. Shuning 26 ta fermer xoʻjaligining 233 gektar yeriga urugʻlik uchun, 2767 gektar maydonga tovar don ekildi.

Yaqinlashib kelayotgan gʻalla oʻrim-yigʻimini qisqa muddatlarda va nobudgarchiliklarga yoʻl qoʻymasdan yigʻib-terib olish, davlat xirmoniga topshirish uchun puxta hozirlik koʻrilmoqda.

Buning uchun 6 ta oʻrim-yigʻim otryadlari tuzildi. Bu otryadlarga 14 ta kombaynlar biriktirilib, sozlab qoʻyildi.

Joriy yil gʻalla oʻrim-yigʻim mavsumida gʻallani oʻrish, tashish, somonidan tozalash va gʻalladan boʻshagan maydonlarni peshma-pesh shudgorlash uchun jami 699,1 mln. soʻm mablagʻ, shu jumladan, 12.6 mln. soʻm texnikalar servis xizmatlari uchun, 28.7 mln. soʻm ehtiyot qismlar uchun, 529.9 mln. soʻm yonilgʻi moylash materiallari uchun ajratilgan. Shuningdek, ish haqi uchun 128 mln. soʻm sarflanadi.

Bundan tashqari, gʻallani oʻrib-yigʻish uchun 309.5 mln. soʻm, don tashish ishlari uchun 122.6 mln. soʻm, gʻalla oʻrilgan maydonlarning somonini tashish ishlari uchun 267 mln. soʻm mablagʻ sarflanishi kutilmoqda.

Gʻalla – xalqimiz rizqi. Dehqonlarimizning fidoyi mehnatlari evaziga bunyodga kelgan hosilni nest-nobud qilmay sifatli yigʻishtirib olib, davlat omboriga topshirilishi uchun zarur barcha chora-tadbirlar amalga  oshiriladi.

O.Rajabova