“BARKAMOL AVLOD” MARKAZINING IQTIDORLI BOLALARI
Maktabdan tashqari taʼlim tizimini yanada takomillashtirish va bolalarning boʻsh vaqtini mazmunli oʻtkazishini taʼminlash maqsadida tashkil etilgan “Barkamol avlod” bolalar markazlari bugungi kunda ularning hunar oʻrganishi hamda intellektual salohiyati ortishiga xizmat qilmoqda.
Tumanimizdagi “Barkamol avlod” bolalar markazida tashkil etilgan 47 toʻgarakka 1010 nafar oʻquvchi jalb etilgan. Markazda “Texnik ijodiyot”, “Badiiy ijodiyot”, “Oʻlkashunoslik va ekologiya” hamda “Chet tili” toʻgaraklariga qatnashayotgan bolalar turli mavzularda oʻtkazilayotgan koʻrik-tanlovlarda yetakchi oʻrinlarni qoʻlga kiritib kelmoqdalar.
Markazda doimiy ravishda turli koʻrgazmalar tashkil etilib, ularda oʻquvchilar tayyorlagan ijodiy ishlardan namunalar namoyish qilinmoqda. Undan tashqari, muhim sanalarga bagʻishlangan bayram tadbirlarida markaz toʻgarak aʼzolari tomonidan tayyorlangan musiqiy dasturlar tomoshabinlar eʼtiboriga havola etib kelinmoqda. Toʻgarak aʼzolaridan tashkil topgan guruhlar nufuzli tanlovlarda ishtirok etib, gʻoliblikka erishmoqdalar.
Markaz toʻgarak aʼzolarining “Tasanno” guruhi “Zarb - 2018” yosh doirachilar koʻrik-tanlovining Toshkent shahrida oʻtkazilgan Oʻzbekiston Respublikasi bosqichida ishtirok etdilar va faxrli 3-oʻrin gʻolibligiga erishdilar.
Markazning “Boshlangʻich texnik modellashtirish” toʻgaragi aʼzolari yaqinda yana bir nufuzli koʻrik-tanlovda muvaffaqiyatli ishtirok etdilar. Iqtidorli yoshlarni aniqlash hamda ularda innovatsion gʻoyalar, ijodkorlik qobiliyatlarini shakllantirish maqsadida tashkil etilgan “Yilning eng yosh ixtirochisi” koʻrik-tanlovida toʻgarak aʼzolari Shohruh Sultonov, Jahongir Hayitboyev va Bekposhsha Abdullayevalar oʻz ijod namunalari bilan qatnashdilar.
Nukus shahridagi Qoraqalpogʻiston Respublikasi “Barkamol avlod” markazida oʻtkazilgan “Yilning eng yosh ixtirochisi” koʻrik-tanlovida oʻzi yaratgan avtomashina modelini taqdim etgan Jahongir Hayitboyev Respublikada 1-oʻrin, toʻtiqush modelida elektron oʻyinchoq yasagan Bekposhsha Abdullayeva esa 2-oʻrin gʻoliblari boʻldilar.
“Barkamol avlod” bolalar markazida bolalar hunar oʻrganibgina qolmasdan, oʻz iqtidorlarini namoyish etib, yurtga tanilmoqdalar.
Ozoda
XUDOYBERGANOVA.
Suratda: yosh ixtirochilar B.Abdullayeva va J.Hayitboyev.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
