Amudaryo tumanidagi sektorlar rahbarlari “Oʻzbekiston Pespublikasi qishloq xoʻjaligi fidoyisi” koʻkrak nishoni bilan taqdirlandi
Qishloq xoʻjaligi mamlakatimizda yetakchi sohalardan biri hisoblanadi. Iqtisodiyotni yuksaltirishda asosiy oʻrin tutib kelayotgan mazkur tizimda samarali islohotlar, salmoqli ishlar amalga oshirilmoqda. Bu oʻz navbatida iqtisodiyotimiz rivoji va xalqimiz turmushining farovonligiga xizmat qilmoqda.
Tumanimizda ham bu borada yuksak natijalarga erishilib, paxta va gʻalla yetishtirish, pilla tayyorlash boʻyicha rejalar ortigʻi bilan bajarib kelinmoqda. Shuningdek, bogʻdorchilik, sabzavotchilik, chorvachilik, parrandachilik, baliqchilik va boshqa qator yoʻnalishlar ham yil sayin rivojlanmoqda.
Davlatimiz rahbarining hududlarni jadal ijtimoiy-iqtisodiy rivojlantirishga doir Qarorida dehqon xoʻjaliklari, tomorqa uchun ajratilgan yerlardan maqsadli foydalanish, meva-sabzavotchilik, chorvachilik, parrandachilik, baliqchilik, asalarichilik va boshqa faoliyat turlarini rivojlantirish, qishloq xoʻjaligi ishlab chiqarishini tashkil etishda fermer xoʻjaliklariga koʻmaklashish boʻyicha choralar koʻrish sektorlar rahbarlarining asosiy vazifalaridan biri qilib belgilanganligi bois tumanda barcha hududlarda qishloq xoʻjaligi rivojlantirilishiga sektorlar rahbarlari tomonidan alohida eʼtibor qaratib kelinmoqda.
Tumanimizda agrar sohada salmoqli natijalarga erishilgani uchun qishloq xoʻjaligi xodimlari kuni arafasida Oʻzbekiston Pespublikasi Qishloq xoʻjaligi vazirining buyrugʻi bilan Amudaryo tumanidagi sektorlar rahbarlari – tuman hokimi S.Yoʻldashev, tuman prokurori J.Muftullayev, tuman Ichki ishlar boʻlimi boshligʻi D.Ibragimov va tuman Davlat Soliq inspektsiyasi boshligʻi B.Kamolovlar “Oʻzbekiston Pespublikasi qishloq xoʻjaligi fidoyisi” koʻkrak nishoni bilan taqdirlandi.
“Oʻzbekiston Pespublikasi qishloq xoʻjaligi fidoyisi” koʻkrak nishoni bilan taqdirlangan tuman prokurori J.Muftullayev ish faoliyatini qishloq xoʻjaligi sohasida boshlagan boʻlib, u Ellikqalʼa tumanida Veterinariya boʻlimining laboratoriyasida vet-sanitar, keyinchalik “Qishloqxoʻjalikkimyo” AJ Ellikqalʼa filialida huquqshunos vazifalarida ishlagan. Tuman hokimligining huquq maslahatchisi, tuman prokuraturasi katta noziri, ish oʻrganuvchi tergovchi va tergovchilikdan tuman prokurori katta yordamchisigacha boʻlgan vazifalarda xizmat qilib, keyinchalik Oʻzbekiston Pespublikasi Bosh prokuraturasida masʼul lavozimlarda faoliyat koʻrsatgan. J.Muftullayev Oʻtgan yildan boshlab, Amudaryo tuman prokurori lavozimida xizmat qilish bilan birga tumandagi 2-sektorga rahbarlik qilib, hududlarning jadal ijtimoiy-iqtisodiy rivojlanishiga hissa qoʻshib kelmoqda.
Tuman Ichki ishlar boʻlimi boshligʻi, 3-sektor rahbari D.Ibragimov ham bir necha yillardan beri Ichki ishlar tizimida qator masʼuliyatli lavozimlarda xizmat qilish bilan birga oʻtgan yildan boshlab tuman Ichki ishlar boshligʻi vazifasini sidqidildan bajarib, oʻzi rahbarlik qilayotgan 3-sektor hududida fermer xoʻjaliklarida ish surʼatining yanada samarali boʻlishi yoʻlida qator chora-tadbirlarni amalga oshirib kelmoqda.
“Oʻzbekiston Pespublikasi qishloq xoʻjaligi fidoyisi” koʻkrak nishoni sohibi boʻlgan tuman Davlat Soliq inspektsiyasi boshligʻi B.Kamolov ham oʻz sohasining bilimdoni boʻlish bilan birga, bor bilim va salohiyati bilan tumanimiz iqtisodiyotini yanada rivojlantirish, xalqimiz turmush darajasini yanada yuksaltirish yoʻlida fidoyi mehnat qilib kelayotgan kadrlardan biridir. Oʻz malakasini qator masʼul lavozimlarda xizmat qilib oshirishga erishgan B.Kamolov ham oʻtgan yildan boshlab tuman Davlat Soliq inspektsiyasi boshligʻi vazifasida ishlab kelmoqda. Uning rahbarligidagi 4-sektor hududidagi fermer xoʻjaliklarining deyarli barchasi davlatga paxta va gʻalla topshirish boʻyicha shartnomaviy rejalarini ortigʻi bilan bajarib, hosildorlikni yil sayin oshirib kelmoqda.
Qishloq xoʻjaligi xodimlari kuni munosabati bilan soha rivojiga qoʻshgan salmoqli hissasi uchun “Oʻzbekiston Pespublikasi qishloq xoʻjaligi fidoyisi” koʻkrak nishoni bilan taqdirlangan barcha sektorlar rahbarlarini davlat va xalq ishonchiga erishgani bilan tabriklaymiz va kelgusidagi faoliyatida zafarlar tilaymiz!
“Taraqqiyot koʻzgusi” gazetasi tahririyati.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
