Olmazor mahallasida “Quyoshjon” oilaviy nodavlat maktabgacha taʼlim muassasasi ochildi

Yurtimizda qutlugʻ sanalar va katta bayramlarda ijtimoiy soha obʼektlari va xalqimizga xizmat qiladigan tadbirkorlik shoxobchalarining foydalanishga topshirilishidek xayrli anʼana bor. Mamlakatimiz mustaqilligining 28-yilligi arfasida ham bu anʼana davom ettirildi. 28-avgust kuni Olmazor mahallasida “Quyoshjon” oilaviy nodavlat maktabgacha taʼlim muassasasining ochilish marosimi boʻlib oʻtdi.

Muassasaning ochilish marosimida tuman Maktabgacha taʼlim boʻlimi, hududdagi korxona-tashkilotlar masʼullari, fuqarolar yigʻini raisi va boshqalar ishtirok etdilar. Tadbirda soʻz olganlar taʼkidlaganlaridek, keyingi yillarda Amudaryo tumanida maktabgacha taʼlim muassasalari soni 59 taga yetkazildi. Ulardan 49 tasi davlat, 7 tasi oilaviy va 3 tasi davlat-xususiy sherikchilik asosidagi nodavlat maktabgacha taʼlim muassasalari hisoblanadi.

Tuman hududidagi 3-7 yoshdagi bolalar soni 15 ming 407 nafardan iborat boʻlsa, shundan 6 ming 165 nafari maktabgacha taʼlim muassasalarida taʼlim-tarbiya oladi. Oʻtgan yilning shu davriga nisbatan maktabgacha taʼlim muassasalar soni 10 taga koʻpayib, maktabgacha yoshdagi bolalarning qamrovi 25,9 foizdan 40,1 foizga oshdi.

Maktabgacha taʼlim tizimini rivojlantirish boʻyicha olib borilgan jadal ishlar tufayli bunday samarali natijalarga erishildi. Oʻtgan yili davlat investitsiya dasturi asosida 3 ta maktabgacha taʼlim muassasalari rekonstruktsiya qilinib, “Obod qishloq” dasturi asosida 4 ta maktabgacha taʼlim muassasasida qurilish-montaj ishlari bajarildi. Mahalliy byudjet hisobidan esa taʼmirga muhtoj 10 ga yaqin maktabgacha taʼlim muassasasi joriy taʼmirlandi. Shuningdek, Vazirlar Mahkamasining qaroriga asosan tumanda 7 ta oilaviy nodavlat maktabgacha taʼlim muassasasi tashkil etildi, yana 5 tasiga ruxsatnoma olinib, ish boshlash arafasida.

Olmazor mahallasida ilgari maishiy xizmat koʻrsatish shoxobchasi sifatida qurilgan xususiy binoda tashkil qilingan mazkur muassasa 25-oʻringa moʻljallangan boʻlib, yangidan 2 ishchi oʻrni yaratildi. Binoda bolalarning sogʻlom oʻsishi va tarbiya olishlari uchun zarur shart-sharoitlar mavjud. Shuningdek, yongʻin xavfsizligi hamda sanitariya-epidemiologiya nazoratining sanitariya qoidalari, normalari va gigiyena normativlariga mos. Bolalar yotoqxonasi, mashgʻulotlar xonasi kerakli jihozlar bilan taʼminlangan, ovqat pishirish uchun, bolalarning kiyinishi uchun ham alohida jihozlangan xonalar bor.

Olmazor mahallasi aholisi hududda oilaviy nodavlat maktabgacha taʼlim muassasasi tashkil qilinganidan va davlatimiz tomonidan yaratilgan imkoniyatlardan nihoyatda mamnun boʻldilar.

O.Xudoyberganova