O’zLiDeP tuman Kengashining hisobot konferentsiyasi oʻtkazildi

Tadbirkorlar va ishbilarmonlar harakati – Oʻzbekiston Liberal-demokratik partiyasi tuman Kengashining XI konferentsiyasi boʻlib oʻtdi.

14-oktyabr kuni tuman hokimligining majlislar zalida oʻtkazilgan konferentsiyada O’zLiDeP tuman Kengashi apparati masʼullari, partiya aʼzolari, deputatlar, boshlangʻich tashkilotlardan saylangan delegatlar ishtirok etishdi. Unda partiyaning saylovlardagi ishtiroki, belgilangan vazifalar, O’zLiDeP Qoraqalpogʻiston Pespublikasi Kengashining XII konferentsiyasiga faollardan delegatlar saylash masalalari koʻrib chiqildi. Shuningdek, O’zLiDeP tuman Kengashi apparat rahbari Muqaddas Beknazarovaning hisoboti tinglandi.    

Konferentsiyada O’zLiDeP tuman Kengashi tomonidan 65 ta boshlangʻich partiya tashkilotlari va 2875 nafar partiya aʼzolari bilan birgalikda ish olib borilayotgani, partiya tuman Kengashi tomonidan koʻrsatilgan nomzodlardan Qoraqalpogʻiston Pespublikasi Joʻqorgʻi Kengesiga 1 nafar, tuman Kengashiga 11 nafar deputat saylangani taʼkidlandi.

Partiyaning tuman Kengashi apparat rahbari Muqaddas Beknazarova oʻz hisobotida partiya safiga joriy yil davomida 1765 nafar aʼzo qabul qilingani, yangidan 6 ta boshlangʻich partiya tashkilotlari tashkil etilganini aytib oʻtdi. Shu bilan birga  saylovlarga tayyorgarlik koʻrish jarayoni partiya aʼzolaridan faollik va tashabbuskorlikni talab etishi, bu yilgi saylovlar oldingi saylovlardan tubdan farq qilishi sababli deputatlikka nomzodlarning ishonchli vakillarini, kuzatuvchilarni tanlash, saylov okruglarida targʻibot-tashviqot ishlarini yanada kuchaytirish eng dolzarb masalalardan hisoblanishi taʼkidlandi.

Aytish joizki, Tadbirkorlar va ishbilarmonlar harakati – Oʻzbekiston Liberal-demokratik partiyasi mulkdorlar qatlami, kichik biznes vakillari, tadbirkor va ishbilarmonlar, fermerlar, jamoat tashkilotlari vakillari, ishlab chiqarish sohasidagi mutaxassislar hamda oʻz tadbirkorligi va tashabbuskorligini rivojlantirish evaziga xalq farovonligiga erishishga harakat qilayotgan ijodkor, olimlar va barcha fuqarolarning manfaatlarini hamda siyosiy irodalarini ifodalovchi siyosiy tashkilot hisoblanadi.

Partiyaning bosh maqsadi siyosiy kuch sifatida birlashgan holda tadbirkorlar, ishbilarmonlar va fermerlarning yanada kengroq faoliyat yuritishlari uchun yangi imkoniyatlar yaratish, ularning istiqbolini ham nazariy, ham amaliy jihatdan asoslab berish, jamiyatning mazkur qatlami manfaatlarini himoyalash va ertangi kunini taʼminlashdir.

Bundan tashqari, davlatni boshqarish, jamiyatda shakllanayotgan qarashlarga taʼsir oʻtkazish, siyosiy va iqtisodiy islohotlarni amalga oshirishda faol ishtirok etish, ijtimoiy muammolarni hal etishda koʻmaklashish, Oʻzbekistonning xalqaro obroʻsini oshirishda, yurt tinchligi va osoyishtaligini saqlashda, millatlararo va fuqarolararo ahillik va totuvlikni mustahkamlash ishida faol qatnashish ham partiyaning asosiy maqsad va vazifalaridan biridir.

Partiyaning dasturiy maqsad va vazifalarini amalga oshirish boʻyicha belgilangan chora-tadbirlar ham qizgʻin tarzda, atroflicha muhokama etildi.  Shundan soʻng, 2015-2019-yillar davomida oʻtkazilgan targʻibot tadbirlarida faol ishtirok etgan  partiya aʼzolari tashakkurnomalar bilan taqdirlandilar.

Sanjar NAZAPOV, Tadbirkorlar va ishbilarmonlar harakati -

O’zLiDeP tuman Kengashi deputatlik guruhi ijrochi kotibi.